وسام بيكلم نفسه باستغراب "ايه اللي حصل ده! كهربا دي ولا ايه؟" بص وسام لجسمه لقى عضلاته بقت أقوى وأكبر وأعصابه وعروق جسمه بقت بارزة اكتر! جري بسرعة وخرج من الحمام ووقف قدام مراية اوضته لقى جسمه بقى أحسن ووشه ظاهر عليه النمو والتغذية وعينه بقت لامعة و اسنانة بقت بيضا جدا…
دخل ابوه عليه فجأة وبصله باستغراب!
ابو وسام: ايه يبني اللي مقلعك كدة؟ ( بيتحرك ببطء ناحية وسام)
: انت بقيت بتروح الچيم ياد ولا ايه؟
وسام: اه يا بابا انا فعلا بقيت بروح الچيم.
ابو وسام: طيب ما تقول انك كنت بتجهز لبطولة ، امال ايه عفاريت ونزلت تحت الارض و حواراتك اللامتناهية دي!
وسام: حاضر يابابا حاضر (بيقرب لباب الاوضة)
:بعد اذنك يا بابا علشان هلبس (وقفل الباب)
ابو وسام ضحك ومشي للصالة لقى مراته قاعدة حاطة ايدها على خدها...
ابو وسام: شوفتي الواد بقى غريب ، ما شاء الله بقى حاجة تانية الچيم بان عليه.
ام وسام: چيم ايه ده ، هو انت بتكلمني عن وسام تاني غير ابني؟
ابو وسام: بس اسكتي انتي مشوفتيهوش ، الواد اللهم صلي على النبي بقى حاجة كدة وعضلاته حلوة.
ام وسام: عضلات ايه وچيم ايه ما الواد من شوية كان ضعيف وخاسس ومتبهدل ومبطوح على دماغه وعمال يقول كلام مش مفهوم.
ابو وسام: هتلاقيه كان مع صحابه الرياضيين وحصل لدماغه حاجة انتي عارفاه عيل كتوم وهتلاقيه محضرلنا مفاجأة.
ام وسام: انا مش مرتاحة ربنا يسترها…
ابو وسام: متقلقيش الواد ده بمنظره ده يفوت في الحديد.
وسام قاعد في الاوضة بتاعته فاتح الدولاب عمال يدور على هدوم يلبسها علشان يروح لـمهرة ، بيقول لنفسه ايه الهدوم اللي كلها هلاهيل دي ، انا ازاي كنت بلبس الاستايل ده ، انا عايز كدة لبس ملوكي ، فجأة السلسلة نورت ولف عليه شعاع سكان وقماش ومعدن بقى بيتكون حوالين جسمه! وسام جري قدام المراية وقف متنح وفاتح بؤه من الصدمة!…
لابس لبس ملوكي شبه اللبس الفرعوني في استايل بدلة سوارية مع أحجار كريمة ومتزوقة بدهب وفضة
ايه الجمال ده ، هو انا بقيت ملك بجد ولا ايه! بقى الفخامة والعز ده كله ألبسه علشان هقابل مهرة! تتحرق مهرة على اليوم اللي شوفتها فيه ، وقلع البدلة وعلقها في الدولاب ودارى عليها بالهدوم ولبس طاقم عادي (الهدوم أصبحت ضيقة على جسمه) ، و فجأة التليفون بتاعه رن
مهرة بتتصل عليه…
مهرة: الو يا وسام انت فين؟
وسام: انا خلاص نازل أهو.
مهرة: طيب ممكن تستعجل نفسك شوية؟
وسام: حاضر حاضر…
مهرة: يبني انت كلامك اللي قولتهولي ده مشوقني جدا على الرغم ان انا فطسانة ضحك هههههه بس برضو مستغربة من اللي انت قولته ده!
فجأة التليفون يتسحب من مهرة ، وصوت شاب بيقول: هي البطل بتكلم مين؟
مهرة: بتصرخ وبتقوله انت مالك ، اوعى يا حيوان هات التليفون!
وسام: الو الو ، مهرة! مهرة! (الخط قطع)…
_________
يا ريت لو عجبك الجزء ده من القصة متنساش تعملي:-
متابعة ➕👤
وتعملي تصويت ⭐
وتقولي رأيك في تعليق 🗨️
ولو عندك مقترحات ياريت تبعتها في رسالة ✉️
أنت تقرأ
مملكة الظلام
Mystery / Thrillerتحكي القصة عن إحدى الممالك المظلمة الخيالية ، التي يكون فيها إنسان من المختارين ملك على كائنات أرضية في باطن الأرض... القصة من وحي الخيال ، رعب ، فانتازيا ، خوارق ، غموض.
