بيبص وسام للراجل المريب إللي شافه في الحلم واللي شافه في الصيدلية بإستغراب وخوف…
وسام: انت مين وعايز مني ايه؟
الراجل المريب: لقد فعلتها المملكة مرة أخرى! واختارت انسان ضعيف…
وسام: مملكة! مملكة ايه دي؟
الراجل المريب: مملكة كِمَر.
وسام: يعني انا فين دلوقتي؟
الراجل المريب: انت هنا في الإمارة الثانية في مملكة كمر
: مملكة كمر إحدى الممالك التي تقع تحت الأرض.
وسام: انا مش فاهم حاجة! طيب انتم جبتوني هنا ليه؟
الرجل المريب: لا تتعجل عليك بالصبر والذكاء.
وراح الراجل المريب شاور على حجر شفاف شبه الهرم بيطلع منه ضوء أبيض شديد وبيعكس ألوان ولمعان قوي
وبيمسك وسام من ايده وبيمشي بيه خطوات لحد اما بيوصل للحجر وبيحط ايد وسام على الحجر بيحصل اهتزاز ارضي شديد وبيتجمع كائنات المملكة وبيجروا بشكل دائري حولين وسام وبيزحفوا ناحيته…
بتكتر صرخات شعب المملكة وبيصيحوا بأعلى صوت بكلمات غير مفهومة ، وسام بيخاف وبيفضل يصرخ يصرخ لحد اما ايده بتسيب الحجر وبيقع على الأرض وبيرجع لورا على ضهره وبيغمى عليه!
(صوت واحدة ست مشوش): وسام! وسام!
وسام بيفتح عينه والرؤية مهزوزة ومشوشة
ام وسام: ليه تحرق قلبي عليك يا ضنايا؟
وسام: انا فين! انا فين؟ (بفزع)
ام وسام: انت في اوضتك يا حبيبي.
وسام: انا جيت هنا ازاي! انا جيييت هنا ازااي؟
باب الشقة بيتفتح وبيدخل ابو وسام الشقة
ابو وسام: انا عملت محضر ان الواد متغيب بقاله أكتر من ٣ ايام…
ام وسام: وسام رجع! وسام راجع.
بيستغرب ابو وسام وبيجري على وسام بعضب ومفاجأة…
ابو وسام: انت كنت فين يا حيوان؟ انت قلقتنا عليك.
وسام: متخافوش يا جماعة انا كويس؛ لأ أنا مش كويس (بدموع في عينه)
ابو وسام: ايه اللي حصلك؟ انت كنت مختفي فين؟
قعد وسام يحكي كل إللي حصله وابوه وامه متفاجئين والصمت بيعم في المكان!…
ابو وسام: انت مش طبيعي! الكلام اللي انت بتقوله ده مفيش عيل صغير يصدقه انت اكيد بتكدب علينا يا اما بتتعاطى حاجة…
وسام: يابابا صدقني اللي انا قولتهولك ده كل اللي حصل.
ابو وسام: انت كداب ، انا لما سألت عليك في الجامعة قالوا انك مظهرتش من ساعت اما اتخانقت مع واحد اسمه فارس…
ام وسام: مين فارس ده يا وسام واتخانقت معاه ليه؟
وسام: مفيش يا ماما ده واحد اتخانقت معاه على جروب الدفعة قبل ما التليفون يضيع مني في الكورس ولما شافني في الجامعة جه هو وصحابه واتخانقنا في الكلية مع بعض.
ابو وسام: تليفونك واحد جابه مع الشنطة بتاعتك من يومين ، تقدر تقولي انت كنت فين من غير حوارات؟
وسام: انا اللي عندي قولته ومعنديش حاجة تانية أقولها ، ايه تليفوني رجع! هو فين؟
وجري وسام يدور على الشنطة بتاعته ولاقاها على السفرة ؛ فتح الشنطة وطلع التليفون ولكن التليفون فاصل شحن ، قعد يقلب في الشنطة لقى سلسلة من معدن غريب أخضر في اسود مضيء فيها حجر مُصغر من الحجر اللي شافه في المملكة!…
_________
يا ريت لو عجبك الجزء ده من القصة متنساش تعملي:-
متابعة ➕👤
وتعملي تصويت ⭐
وتقولي رأيك في تعليق 🗨️
ولو عندك مقترحات ياريت تبعتها في رسالة ✉️
أنت تقرأ
مملكة الظلام
Misterio / Suspensoتحكي القصة عن إحدى الممالك المظلمة الخيالية ، التي يكون فيها إنسان من المختارين ملك على كائنات أرضية في باطن الأرض... القصة من وحي الخيال ، رعب ، فانتازيا ، خوارق ، غموض.
