"Hindi na kita mahal"
Ito ang mga huling katagang aking binitawan nung ika'y aking iniwanan
Walang pasubaling kinalimutan ang mga pinagdaanan at ang limang taong relasyon na sabay na pinaglaban
Iniwan kitang tuliro
Wasak na wasak
Na parang puso ni Nasty Mac
Na para bang pahina lang sa kwaderno na basta na lang pinunit, nilamukos at binasura
Na para bang bubblegum na nung nawala na ang tamis kung saan-saan na lang dinikit
Na para bang ballpen na basta na lang tinapon nung naubos ang tinta
Pero bakit tila bumaliktad ang mundo?
Ako itong nang-iwan pero bakit ngayon ako na ang naghahabol?
Ako na ang nasasaktan
Ako na ang nahihirapan
Bigla kitang na-miss
Ikaw na yumayakap sa'kin sa tuwing nababalutan ng lamig ang gabi
Ikaw na kayang pumunit ng labi ko sa mga paandar mong waley at minsan lang havey
Ikaw na walang ibang ginawa kundi ang busugin ako ng pagmamahal
Ikaw na siyang nagsabing ako ang dahilan sa lahat ng mga bakit mo
Ikaw, ikaw na hinding nandiring hawakan ang kamay kong pasmado
Palagi ko pa ring naiisip kung kumusta ka na kaya?
Kung naiisip mo pa rin ba ako?
Kung umiiyak ka pa rin ba?
Kung mahal mo pa rin ba ako?
Paano kung hindi na?
Paano kung okay ka na habang ako nasasaktan pa?
Paano kung naka-move on ka na habang ako nagkukumahog pa?
Yung tipong kahit anong sulsol ko sa puso ko na hindi na dapat kita mahal, kahit ilang beses ko mang sabihin na ako na lang,
Ako na lang ulit
Mahal, hindi ka na babalik
Dahil she had you at your worst
I had you at your best
But I chose to break your heart
Meron ng siya na pumalit sa pwesto ko, diyan sa puso mo
Meron ng siya na kasama mo sa pagtupad ng mga pinangarap natin
Pero mahal pa rin kita
Dahil kahit anong hakbang ang gawin ko hinihila ako ng nararamdaman ko pabalik sa pagmamahal na nakasanayan ko
Nasasaktan ako
kasi hindi na ako ang tinatawagan mo kapag malungkot at masaya ka
Hindi na ako ang gusto mong kayakap sa tuwing giniginaw ka
Hindi na ako ang nagpapaluha at nagpapangiti sa'yo
Hindi na ako ang una at huli mong iniisip
Hindi na ako ang tinatawag mong Mahal
Hindi na litrato ko ang nasa pitaka mo
Hindi na ako ang dahilan sa lahat ng mga bakit mo
Hindi na ako ang mahal mo
Masakit pero tatanggapin kong hindi na ako ang mundo mo
Hindi madali
Pero kakalimutan kita
Kahit na kamay mo pa rin ang gusto kong hawakan
Mukha mo pa rin ang gusto kong makita
Mga braso mo pa rin ang gusto kong kayakap
At kapag naaalala kita uupo na lang sa isang tabi at iiyak na naman
Dahil sa tuwing naaalala kita naaalala ko lang ang lahat ng masaya
Lahat ng malungkot
Lahat ng masakit
Kaya iiyak ako hanggang sa
mawala na ang hapdi
Iiyak ako nang iiyak hanggang mapagod ang puso ko
Iiyak ako nang iiyak hanggang sa makasanayan kong hindi ka na akin
Iiyak ako nang iiyak hanggang sa maramdaman kong okay na ako
Iiyak ako nang iiyak hanggang sa makatayo ulit ako sa sarili kong paa at masabi ko
Masabi kong..
"Hindi na kita mahal.."
Nagmamahal pa rin,
Basha
