فصلية ولكن بشروط

البارت الثاني

#فصلية_ولكن_بشروط

للكاتبة : زهراء الشويلي

...............................

يوسف : ماناوية تصعدين ؟

صفنت بوجهة شيريد مني

جاوبت بتلعثم : يي راح اصعد ، تصبحين على خير ام جمال .

جاوبتني بكل هدوء : وانتِ من اهل لخير .

مشيت قبله ، وهوَ بقة واكف بمكانة

يوسف : تصبحين على خير يالغالية .

وتقرب منهة وباس راسهة

جاوبتة : وانتَ بالف خير يمة .

التفتت عليه

اسلوبه شكد حلو وية اختة حسبالك صدك امه

طلع وطبك الباب وراه ،، بقيت واكفة بمكاني منتظرتة

عافني وصعد فوك

بقيت مترددة ، معقولة ليوم يبات يمي
زين لبارحة ليش ماقبل يبقة برغم اني عروس

طيرت التفكير من راسي وصعدت فوك
لكيتة كاعد بالغرفة ع الفراش ويكلب بجهازة

رحت للكنتور طلعتلي تراك خفيف مال نوم واخذت منشفة ورحت للحمام

سبحت وكملت بس ما اكدر اطلع
احس صعبة لان ملابسي خفيفة
زين اني حجابي لحد الان مانازعتة كدامة
يعني شعري ماشايفه بس البارحة ولافتة كله بالتسريحة

شلون راح امشط كدامه

شكلي تاخرت هواي بالحمام

لفيت شعري بالمنشفة ،، ولبست ثوب الحمام فوك ملابسي وطلعت

دخلت للغرفة لكيتة بعدة على كعدتة

رحت للمراية

خليت عطر ، وبديت اخلي بالمكياج

اتقرب وكف بصفي وبدة يقلب بالعطور ويشم بيهن واحد واحد

مديت ايدي ردت اخذ المشط
وهوَ راد ياخذ العطر

فبالغلط طخت ايدي بأيدة

اني لا ارادياً سحبت ايدي
جانت ردت فعلي سريعة

حسيتة ضاج من تصرفي

دار وجهة وطلع برة ،،

اني شسورت شعري وكملت
رحت للفراش كلت بلكي اغفة قبل لا يجي

بقيت اتكلب ،،شوية وحسيتة فتح الباب

دخل وبقة يفتر بالغرفة اخر شي وكف يم الشباك

طلع جكارتة وبدة يدخن

اني اختنكت من ريحتهة ،، غطيت راسي وشكلت عندي كحة قوية بسبب الريحة لان اول مرة اشمهة
وهم عندي تحسس من الروائح القوية