بِحبها تعافيت 🖤 (كاملة)

3- حلم مجنون

"بِحُبها تعافيت "
بقلمى فيروز مغازى

(الفصل الثالث)

نزلت مرام على بعد الضهر وهى مش قادره تفتح عيونها، كانت عايزة تنام لانها سهرت جداً امبارح.

بمجرد ما نزلت تحت لقت جاسر قاعد مع كارمن بيتكلموا ، حست بالتوتر، وجوده معاها فى نفس المكان بيخليها متوترة ومش على بعضها، بتبقي خايفه يحرجها فى اى لحظه..

مرام ابتسمت بتوتر: صباح الخير

جاسر بصلها بهدوء تام ومردش انما كارمن ردت بابتسامة: صباح النور يا حبيبتى، كل ده نوم

مرام بحرج: اه اصلى كنت سهرانه امبارح اعذرينى يا طنط، هو حضرتك محتاجه حاجه..

جاسر بسخريه: وسهرانه لوحدك بقي !!

مرام اتحرجت: نعم، حضرتك تقصد ايه.

جاسر ببرود: أنتِ عارفه كويس اوى قصدى ايه.

كارمن بعدم فهم: فى ايه يا جاسر، مالك مستلم الدكتوره كده من ساعه ما نزلت، تعالى يا مرام.

مرام بصتله بضيق مكتوم وتمتمت:

-هو عرف منين انى مكنتش سهرانه لوحدى، مغرور انا هسميه مستر غرور.

جاسر بصلها بضيق: بتبرطمى بتقولى ايه يا دكتورة..

مرام بصتله بابتسامة مصتنعه: ها لا ابدا، بشكر فيك يااا مستر غرور اقصد يا جاسر بيه، بقول ان حضرتك قد ايه بتراعى مشاعر الاخرين..

كارمن ضحكت، وجاسر اتغاظ منها اوى.

بس تجاهل كل ده

وانتبه لسؤال كارمن عن مراد.

جاسر بص لمرام بسخريه: مراد كان سهران امبارح يا امى، هو انتى متعرفيش..

كارمن بتعجب: سهران !! بس هو مش بيسهر وبينام بدرى جداً عشان شغله، ايه ده هو مرحش الشغل!

جاسر: الاكيد انه منزلش النهارده، عربيته بره..

كارمن نادت على الخادمه عشان تطلعله

لما قلقت عليه.

طلعت الخادمه لفوق.

وبعد دقايق معدودة نزلت وقالت بصياح:

- الحقى يا هانم، مراد بيه تعبان جداً، ووبيرتعش بطريقه فظيعه وهو نايم..

كارمن بخضه: مراد ابنى.

طلعت جرى ع فوق ومرام طلعت وراها.

جاسر فضل مكانه وحس انه متغاظ اوى..

من ردت فعلها، ميعرفش ليه بيضايق منها.

كارمن قعدت جمب مراد على السرير وفعلا لقت جبهته بتتصب عرق، وبيرتعش، حطت ايدها على جبهته، لقته مولع حرفيا.