🔰 The bum 🔰
Part - 1
အင်္ဂလန်နိုင်ငံ.....ဒုတိယကမ္ဘာစစ်အပြီး ပြန်လည်ထူထောင်ရေးများ ပြီးစီးခါစ အချိန်ကာလ။
ပင်းနိုင်းတောင်တန်းကြီးကို မစ္စကရော့ဖဲက ငေးစိုက်ကြည့်ရင်းမှ နှင်းမှုန်တွေကြားထဲ အတန်ကြာရပ်ကာ ပတ်ဝန်းကျင်ကို အကဲခတ်နေမိသည်။ ဒီနားမှာ အိမ်ခြေသိပ်မရှိပဲ ခပ်လှမ်းလှမ်းမှာ အိမ်အိုကြီးတစ်လုံးကိုသာ နှင်းမှူန်တွေကြားထဲ မသဲမကွဲ လှမ်းမြင်နေရသည်။
" မစ္စကရော့ဖဲ......အိမ်ထဲဝင်ပါ။ အပြင်မှာ နှင်းတွေ သိပ်ကျနေတယ်။ ပြည်မကြီးက လာတဲ့သူတွေက ဒီနှင်းဒဏ်ခံနိုင်မှာ မဟုတ်ဘူး။ "
မြင်းကုန်းနှီးပေါ်မှ သူမ အဝတ်ထုပ်ကို ဆွဲချသယ်လာသည့် အက်ဘီက လှမ်းသတိပေးလိုက်သံပင်။ အက်ဘီက သူ အခုဝယ်လိုက်သည့် အိမ်ကြီးမှာ နေတာ ငယ်စဥ်ထဲကပင်။ အက်ဘီ့အဖေက သူမ အမျိုးသား ဟာလေကရော့ဖဲ အမေ၏ လူယုံပဲ ဖြစ်သလို ကျန်းမာရေးကြောင့် အနားလာယူသည့် သူမ အတွက်လဲ အက်ဘီနဲ့ သူ၏ဇနီး မစ္စမွန်နာအက်ဘီက တာဝန်ယူပေးမှာပင်။ အမေ နဲ့ သူတို့ကတော့ အင်္ဂလန်မှာပဲ နေသလို နန်းတော်မှာ အမှုထမ်းကြသူတွေမို့ သိပ်မအားပေ။
အိမ်ထဲဝင်လာခဲ့သည်နှင့် မီးဖိုမှ အနွေးဓာတ်ကို ခံစားလိုက်ရသည်။ နွေးထွေးသွားပြီမို့ ကိုယ်ပေါ်ထပ်ဝတ်ထားသည့် သားမွှေးဝတ်ရုံရှည်ကို ချွတ်ရန်ပြင်တော့ မွန်နာက လာကူချွတ်ပေးကာ အင်္ကျီချိတ်သည့်နေရာတွင် ချိတ်ထားပေးလိုက်သည်။
" ခရီးဝေးကလာရတာ ပင်ပန်းရောပေါ့ မစ္စကရော့ဖဲ။ အဆာပြေ ကော်ဖီနဲ့ကိတ်မုန့်လေး အရင်စားပြီး နားလိုက်ပါ။ မစ္စကရော့ဖဲအခန်းကိုလဲ သေချာပြင်ထားပေးပါတယ်။ "
မွန်နာအက်ဘီ၏ ပုံစံက အရပ်ပုပုကိုမှ ကိုယ်ခန္ဓာက ပြည့်ပြည့်ဖြင့် သွက်သွက်လက်လက်ရှိလွန်းသည်မို့ သဘောကျသွားရသည်။ ထမင်းစားခန်းထဲ ဝင်လာတော့ သပ်ရပ်နေသလို အငွေ့တထောင်းထောင်းထနေသည့် ကော်ဖီနံ့က မွှေးလွန်းနေသည်။ တကယ်လဲ ဝမ်းထဲဟာနေသည်မို့ စားသောက်ပြီးစီးသည်နှင့် အပေါ်ထပ်တက်လာခဲ့သည်။
YOU ARE READING
The bum
Romanceမင်း ကိုယ့်ကိုထားပြီး ထွက်သွားမယ်ဆိုရင် ကောင်းရာမွန်ရာ မရောက်ပါစေနဲ့လို့ ကိုယ်ကျိန်မယ် ဗစ်ကီ။ တမလွန်မှာ မင်း ဒုက္ခရောက်ပါစေ။
