အပိုင်း ( ၁၅ - ဇာတ်သိမ်းပိုင်း )
ဘမ်သည် သူ့ကို မသိနိုင်တော့ဘူးဆိုသည့် ဗစ်ကီ၏ အခြေအနေအား သိရသောအခါတွင် အကြီးအကျယ် ထိတ်လန့်တုန်လှုပ်သွားလေသည်။ သူသည် စကားနဲ့ မယုံနိုင်သေးပေမယ့် မမှားနိုင်ဘူးဆိုတာတော့ စိတ်ထဲက သိနေသည်။ ဗစ်ကီသည် မြို့ပေါ်မှာ ဘာတွေများ ဖြစ်ပျက်ခဲ့သနည်း။ ဘမ်သည် ဗစ်ကီနှင့်တွေ့ခွင့်ရရန် ကြိုးစားတော့သည်။ အသင့်တော်ဆုံး ၊ အကောင်းဆုံးအခြေအနေသည် ဘုရားကျောင်းတက်ကြသည့် တနင်္ဂနွေနေ့ဖြစ်တာမို့ ထိုအစေခံအား သေချာမေးမြန်းကာ ဗစ်ကီနှင့်တွေ့ရန် ကြိုးစားတော့သည်။
“ မစ္စတာဟာလေက တနင်္ဂနွေဆို ရွန်နီဆင်းဂါးနဲ့အတူ ဘုရားကျောင်းတက်မှာပါ။ အိမ်က အစေခံတွေလဲ တက်ကြမှာပါပဲ။ ကျွန်မကတော့ မစ္စကရော့ဖဲကို စောင့်ပြီးနေပေးရမှာပါ။ မစ္စကရော့ဖဲက ဘုရားကျောင်းတက်နိုင်တဲ့ အခြေအနေ မရှိပါဘူး။”
ဘမ်သည် သေချာစဥ်းစားကာ တနင်္ဂနွေနေ့တွင် ကရှ်ချူးစံအိမ်ကြီးဆီ သွားရန် ဆုံးဖြတ်လိုက်သည်။ တနင်္ဂနွေမနက်ထဲက ဘမ်သည် ကရှ်ချူးစံအိမ်အနား အစောကြီးရောက်နေကာ ဟာလေကရော့ဖဲ နှင့် ရွန်နီဆင်းဂါးတို့အတူ ဘုရားကျောင်းကို ထွက်သွားသည်အထိ စောင့်ကြည့်နေသည်။ ဟာလေကရော့ဖဲ ထွက်သွားသည်နှင့် ဘမ်သည် ကရှ်ချူးစံအိမ်ကြီးအနား ရောက်လာသလို အစေခံက တံခါးလာဖွင့်ပေးသည်။
“ မစ္စကရော့ဖဲက မီးဖိုနားမှာ အနားယူနေတယ် ။ “
ဘမ်သည် အိမ်ထဲဝင်လာသည်နှင့် မီးဖိုဘေးရှိ ခုံတွင် အနွေးထည်လေးဝတ်ကာ အနွေးဓာတ်ခံယူနေသည့် ဗစ်ကီအား မြင်လိုက်ရသည်။ သူ့ကို မြင်တော့ စိမ်းစိမ်းလေးငေးကြည့်နေကာ ထိုင်နေရာမှ တဖြည်းဖြည်း မတ်တတ်ထရပ်လာသည့်ပုံစံက တကယ်ကို သူ့အား သိပုံမရပေ။ ဘမ်သည် ဗစ်ကီအနားသို့ တန်းရောက်လာပြီး သူမကို ပွေ့ဖက်နမ်းရှိုက်ပစ်လိုက်ပါသည်။
“ ဟင်....”
ဗစ်တိုးရီးယားသည် ထိတ်လန့်အံ့ဩသွားပုံရပါသည်။ သူမကိုယ်လေး တုန်တက်သွားတာ အလန့်တကြားပင်။ သို့ပေမယ့် ထူးဆန်းသည်က ဗစ်တိုးရီးယားသည် ဘမ့်ကို တွန်းထုတ်ပစ်ခြင်း၊ ရန်မူခြင်း၊ငြင်းဆန်ခြင်းကို မပြုပါချေ။ ဘမ်သည် ဗစ်တိုးရီးယား၏ ကိုယ်လေးကို လွတ်ထွက်သွားမည်စိုးသည့်အလား တင်းတင်းကြပ်ကြပ်ဖက်ထား၍ မျက်နှာလေးကို တရှုံ့ရှုံ့နမ်းနေသည်မှာ အဆက်မပြတ်ပေ။
YOU ARE READING
The bum
Romanceမင်း ကိုယ့်ကိုထားပြီး ထွက်သွားမယ်ဆိုရင် ကောင်းရာမွန်ရာ မရောက်ပါစေနဲ့လို့ ကိုယ်ကျိန်မယ် ဗစ်ကီ။ တမလွန်မှာ မင်း ဒုက္ခရောက်ပါစေ။
