Winter Begonia [Burmese Translation]

အပိုင်း - ၃၈ (ရှောင်ကျိုးဇီ - ၂)

လူတိုင်း၏ညွှန်းဆိုချက်များကြောင့် ရှန်းရှီရွေ့သည် ချန်ဖန်းထိုက်ကို ယွမ်ရှီအတန်းအားခေါ်လာခဲ့သည်။ ယွမ်ရှီ့အတန်းမှသရုပ်ဆောင်များကို ရွှေယွမ်မျှော်စင်မှသရုပ်ဆောင်များ‌နှင့်ယှဉ်ကြည့်မည်ဆိုပါက သူတို့အားအမီလိုက်ရန်အများကြီးလိုနေသေးသည်။ သူတို့မှာ အနောက်တိုင်းဆန်ဆန်ပြင်ဆင်ထားသည့်ပြဇာတ်ရုံမျိုးတွင် တစ်ခါမှမဖျော်ဖြေဘူးကြ။

သူတို့အားလုံး ထျန်းချောင်အနီးရှိ ဇာတ်ရုံအဟောင်းတွင်နေကြသည်။ ဇာတ်ရုံနောက်ရှိခြံဝန်းတွင် ယောကျ်ားများ၊ မိန်းမများနှင့် ကလေးများပါမကျန် အားလုံးစုပေါင်းနေထိုင်ကြခြင်းဖြစ်သည်။ သူတို့အသိုက်အမြုံ၏အပြင်သို့ ဘယ်သောအခါကမှမထွက်ဖြစ်ကြဘဲ တစ်ရက်ပြီးတစ်ရက် လုပ်စရာရှိသည်များကိုလုပ်ကိုင်ရင်းနှင့်သာအချိန်ကုန်သွားကြ၏။

ယွမ်ရှီအတန်း၏တည်ထောင်သူမှာ ချင်မင်းဆက်အကုန်တွင်ကျော်ကြားခဲ့သူတစ်ဦးဖြစ်သည့် စီရှီအာဆိုသူဖြစ်သည်။ ထန်းကျောင်းအာအဖြစ်ကျော်ကြားခဲ့သည့်အချိန်တုန်းကဆိုလျှင် သူသည် နဉ်းကျူးလန်လောက်ကိုလူကြိုက်များခြင်းခံခဲ့ရသည်။ ထိုကဲ့သို့ဖြစ်ရသည့်အကြောင်းမှာ နဉ်းကျူးလန်သည်နန်းတော်နံရံများကြားတွင် အချိန်အတော်ကြာရှိနေခဲ့သော်ကြောင့် သာမန်လူများမှာသူ့အားတွေ့ခွင့်မရခဲ့ကြပေ။ ထို့အချက်ကြောင့်ပင် စီရှီအာ၏ဂုဏ်သတင်းမှာ ပို၍ပို၍ကြီးမားလာခဲ့သည်။

ရှီအာသည် သူ၏ရှေ့မှအရင်လူများကဲ့သို့သောလမ်းစဉ်အားလိုက်ခဲ့သည်။ အော်ပရာများသီဆိုရင်းသူ၏ခန္ဓာကိုယ်အားရောင်းစားခဲ့သည်။ ထိုအချိန်တွေတုန်းကတော့ အရာရှိတွေကုန်သည်သူဌေးတွေရဲ့နှစ်သက်မှုကိုသူရခဲ့သည်။ ဒါပေမယ့် ဒေါသထွက်လွယ်ကာသဝန်တိုလွယ်သောသူ့စိတ်ကြောင့် အကြိမ်တိုင်းလိုလိုပင် သူ့မှာ ဥစ္စာရှင်သခင်များ၏တံခါးအပြင်သို့မောင်းထုတ်ခြင်းခံခဲ့ရသည်။

ထိုအချိန်တွေကိုလွန်ကာ အသက်သုံးဆယ်နားရောက်လာတော့ ငယ်ရွယ်စဉ်ကဖြုန်းတီးပျော်ပါးခဲ့သည့်အကျိုးဆက်များကစတင်လာခဲ့သည်။ အသံနှင့်ရုပ်အသွင်အပြင်မှာစောစီးစွာယိုယွင်းလာခဲ့ပြီး ခန္ဓာကိုယ်မှာလည်း အဖိုးအိုပေါက်စလိုစတင်ပြောင်းလဲလာခဲ့၏။ သူနောက်ထပ်အော်ပရာမဆိုနိုင်တော့။