YOU ARE GOING TO FALL FOR ME

III

Ka pa chuan chhung inkhawm chu a hruai a, a din chhuah rual chuan "Le, thla leh lam chuan mo hmel kan hmu tawh dawn in alang a. April thla tir chauh ani a, inbuatsaih lam a hautak vak dawnlo bawk a, palai pawh kan tir thuai ang.

Mary pawh inthlahrung lo la, keini chuan kan lo lawm che a, mo anga i rawn lawi luh dawnah pawh thuam chhawm tihfel kha angai miahlo nia, i thuam chhawm ai chuan nangmah kha kan duh ber che tih hi i hre dawn nia" a ti a, kan chhungkua chu kan nui tha hlawm a, mo thar neih chu kan chak tawh hle anih hmel.

Chhung inkhawm kan hman zawh chuan u Mimitei nen chuan putea chu kan chhaih a, ani duai bik duhlo chuan min chhang ve zel a, lai duh thaklo lehnghal.

Ka pain chaw ei a rawt takah chuan kan tho chhuak thuai a, dawhkan a kan chhawp vek tawh vangin kan hawng zung zung a, kan chhungte ho pawh an rawn phei thuai bawk.

Chaw ei lai chuan kan nui hak hak zel  inneih chungchang an sawi te chuan u Mary chu a lai nasa thei lutuk. Mo neitu lam theme chu butterfly ani dawn a, Monu lam erawh chu Flowers ani thung ang.

U Mary haw hnu chuan kan chhungkua chuan kan sawi ho a, pute pawh u Mary a thlah kha a lo let leh tawh. "Keichu flower girl ka ni dawn ania" nuisanga ka tih chuan "I hun tawh lo" u Mimitei chuan a lo ti vat.

"Eng nge? Ka la naupang a, kan chhung lam hrim hrimah pawh ka hmeltha ber" ka ti chu min nuih hak hak hlawm mai.

"Mate, Lalai te, Remi te leh midang pawh an tam alawm. Nang chu kum 18 I tling tep tawh a bakah i sang vei phian sia, I putea bialnu hlui chan te pawh i chhang palh ang" ka pa in a rawn ti ve leh a, an la nui tha hlawm reng.

"Kan chhungte dang inneihah pawh ka ni ziah tho alawm. Putea inneih ah pawh ka ni dawn tho tho, a tunu te zingah min duat ber bawk" titau aw tak chuan ka tileh.

"Mate, I nula ve tawh dawn alawm, a hun tawhlo kan ti mai ania. Flower girl I nih loh vang khan ka duat ber nihna tang i tla dawn pawh ani lova" putea chuan a rawn ti ve leh a, kan inhnialna ka ngaihtuah a, ka naupan chhiat zia ka hriat chuan ka nui hak mai.

"Anihchuan in phal tak tlat silovah chuan u Mimitei nen pangpar tur chu kan design thung ang" ka ti a, an pawm aniang chu an bu tliar tliar mai.

"Pute, anih min awmbo san dawn em?"

"Dawnlo. Tah hian kan awm ve reng ang"

"Yes, u Mary rawn lawi hunah sual kan lo chhuah der vel ange"

"A tul miahlo"

"Aw... Nakin zel atan a sawi turah a tha alawm"

"Mate, fahrah ania, amaha inluah ani bawk. Chutianga ilo tih chuan ka tan pawh anuam dawnlo asin. Chhungkua hlimna la pawh ve miahlo ania, chu chu kan pek tur zawk chu ania lawm" putea'n a tih chuan u Mary chu ka khawngaih takzet.

"Ka ti leh miahlo ang, chhungkaw pawimawh zia leh kan hlimna te hi tem ve zawk rawh se" ka ti a, ka sam a rawn chul hliau hliau mai.

"Pute, fa nei vat ru aw" ka tih chuan an nui hak hak hlawm a, â min van tihhmel hlawm tawh tak.

"Ka duat rei hman nang che" a tih leh chuan "Nia" tiin ka inngaihtuah let leh rauh rauh mai.

"Pawilo, nei hmanhmawh ula nimai. Naute awm tur an awm anga, kan inchhung reh lutuk thin pawh a nuam deuh ang" ka ti a, ka chhungte chu an mittui a tla phung tawh.

"Nangte hi ruih i nei mi a?" ka pa in a rawn tih chuan "Ka hlim em ani" ka ti a, ka sawi zawh rualin Mercy ka hrechhuak nghal zat, naktuk a ka hrilh hunah a hmel leh awmdan tur ka hre chak zek zek ani ber.

"Mate, Mimite, han mu tawh rawh u, naktuk class kal in ngaih kha" ka pain a tih chuan kan tho tharh a, kan room lam panin kan chho nghal tharh.

"U, muttui aw" tiin room ka luh hma chuan ka ti a, "Nangpawh muttui le" a tih chuan in nuih sakin kan room ah chuan kan lut nghal zat mai.