မကြွေလွင့် ဝေသင့်ခဲ့လေသော

Part - 8 -

Unicode

Loyal Flora Company ရဲ့ ရုံးခန်းတစ်ခုထဲတွင် MD တစ်ဖြစ်လဲ ဦးခန့်ထက်နိုင်တစ်ယောက်ငြိမ်သက်စွာထိုင်နေသည်။ အမှန်တော့ ငြိမ်သက်နေသည်ဆိုတာထက် တစ်စုံတစ်ခုကို တွေးတောနေတာဖြစ်ကောင်းဖြစ်နိုင်သည်။ သူ့ရဲ့မျက်နှာချင်းဆိုင်ခုံတွင်တော့ မင်းယုယသွင်သည် အေးစက်စွာထိုင်နေခဲ့၏။ သူ့မျက်နှာမှာ ပြတ်သားခြင်းအရိပ်အယောင်တို့ ပြည့်နှက်နေသည်ကိုလည်း အထင်းသားတွေ့နိုင်ပေသည်။ 

"ဆုံးဖြတ်ချက်ကိုမပြင်တော့ဘူးလား မင်းယု "

"ဟုတ်ကဲ့ အကို ကျွန်တော်မပြင်နိုင်ပါဘူးဗျ "

"အကယ်၍ မင်းသာမလုပ်ဘူးဆိုရင် အကိုက ဒီနေရာကို ချစ်ခွန်းကိုထည့်လိုက်မှာ "

"ဟုတ်ကဲ့ ရပါတယ်အကို ။ ကျွန်တော်အဆင်ပြေပါတယ်ဗျ "

ခန့်ထက်နိုင်တစ်ယောက် မျက်နှာကိုစိတ်ပျက်လက်ပျက် လက်ဖဝါးပြင်နှင့်ပွတ်သက်လိုက်ရင်း ...

"မဟုတ်သေးပါဘူးကွာ ... မင်းငြင်းပယ်လိုက်တဲ့အခွင့်အရေးတွေ ဘယ်နှကြိမ်တောင်ရှိနေပြီလဲဆိုတာကိုရော သိရဲ့လား ။ 

မင်းအနေနဲ့ screen ပေါ်မှာပါလာပြီဆိုတာနဲ့ ဒီလောကမှာ နေရာတစ်ခုအပြင် အောင်မြင်မှုတွေပါရလာမှာ ။ ငါက မင်းရဲ့အရည်အချင်းတွေကို နှမြောလွန်းလို့ပါ "

မင်းယုယသွင် အေးဆေးတည်ငြိမ်စွာပြုံးလိုက်တယ် ။ ပြီးမှ ...

"ကျွန်တော့်အတွက်အောင်မြင်ခြင်းဆိုတာက အေးချမ်းစွာနေနိုင်ခြင်းပါပဲအကို ။ အခုလက်ရှိဘဝကို ကျွန်တော်သဘောကျပြီး ပျော်ပါတယ် "

"မဟုတ်ဘူးလေ "

"ဟုတ်ပါတယ် ... ကျွန်တော် ပန်းတွေနဲ့ထိတွေ့နေနိုင်သေးသရွေ့ ကျွန်တော့်ဘဝကို ကျွန်တော်ပျော်နေဦးမှာပါ ။ ဒါကြောင့် နောက်ထပ်လည်း ဘယ်လိုအင်တာဗျူးပဲလာလာ ၊ ဘယ်လိုအစီအစဉ်ပဲလာလာ ကျွန်တော်လက်မခံနိုင်ပါဘူးဗျ "

နောက်ဆုံးမှာတော့ ခေါင်းမာလွန်းစွာငြင်းဆန်နေသူအား ခန့်ထက်နိုင်တစ်ယောက်လက်လျော့လိုက်ပုံရသည်။ သက်ပြင်းရှည်ကြီးတစ်ချက်ချပြီးနောက် ...