"احببت عيناك وانا أقل الناظرين إليها"

"احببت عيناك وانا أقل الناظرين إليها"...12

مراد : قلت ل خواتك يزينون لهم فرش؟
هميم هز راسه ب *ايه * : بس ابو مشعل وزوجته امرهم سهل نحطهم بغرفة الضيوف بس عيالهم؟
مراد :مشعل مع العيال بالملحق وخلاص
هميم : ايه وبناته؟
مراد عقد حواجبه : يوه ذاللي م حسبنا حسابه!
هياف : وشو؟
هميم : بنات ابو مشعل وين يجلسون فيه
هياف : مع خواتك وين يعني؟
هميم تقدم بيطلع : زين
طلع ليث ورا هميم : وين رايح ؟
هميم : عندي شغل بغيت شي؟
هز راسه بنفي : بترجع قبل الفجر ولا
هميم ابتسم : نقول ان شاء الله
ليث قرب منه : احلف مو مهمه ؟
ضحك : لا والله مو مهمه شغله اخلصها واجي
دخل ليث : الله يحفظك اجل
قفل الباب زفر ونطق بهمس : آميين ويحفظكم
دق جواله : * ابراهيم *
ابراهيم : السلام عليكم ياطويل العمر
هميم : عليك السلام
ابراهيم : بتجي؟
هميم هز راسه ب * ايه * : ذاني بالطريق
ابراهيم : زين فاامان الله
عم السكوت لدقايق انتظارًا من ابراهيم بأن هميم يقفل
نزل راسه للجوال وانتبه ان المكالمه للأن م تقفلت وقفلها
تقفلت انوار بيوت الديرة مُعلنه نوم الجميع ، بس هالمره كانت غرفة هميم هي اللي انوارها مفتوحه
بغرفه هميم :
اخذت لها شاور ونشفت شعرها وحطت كريماتها ومن هالاشياء
فتحت درجها وطلعت المكرات حقتها وبدت تركبها ع شعرها ،وحطت الماسك حقها وجلست تقرا وردها اليومي بعد م انتهت من صلاة الوتر ،
طالعت ساعتها ونطقت بتوتر : شفيه ذا تأخر ولا قالي وين هو رايح له
لبست جلالها وطلعت بأمل انها تلقاه برى
دخلت الصاله وصرخت من شخص مسكها بقوه من كتفها ،
نطق بحدّه : من انت !
رويدا بألم : ليث فكك فككك يعور
ابعد يده ونزل راسه ع طول يصد : رويدا! وش مطلعتس هالحزه
رويدا والدموع بعينها : ادور مسّود الوجه اخوك !
ليث وهو يكتم ضحكته: افا ياام عزيز وش مسوي لتس هميم ؟
رويدا : وين هو فيه م قالي وين رايح
رفع راسه لها وطاح يضحك من شاف جلالها شكله غريب مع المكرات : اهخخخ وش ذا
رويدا عقدت حواجبها : وشو؟
اشر ع راسها وهو طايح يضحك
رويدا بااستنكار: مكرات
استوعب ع نفسه وسحب منديل يمسح خشمه : السموحه السموحه ، هميم عنده شغل بس م ادري وين شويات وهو جاي
طلعت للغرفه وهي تزبد : مسوي ضريف هو ووجهه واخوه مسوي ثقيل وم يقولي وين هو ذالف له ولا كأنه متزوج الاخ!
دخلت وقفلت الباب بالمفتاح : نشوف كيف بتدخل تنخمد يااستاذ
طاحت نايمه من الخرشه ودقات قلبها تتسارع
بمكتب هميم :
جلس ورفع راسه: ايوا ؟ من ذا
ابراهيم نطق وهو يزين الاوراق ويحطها ع مكتب هميم: مفلح بن عايض آل خليفه
رفع حواجبه ونطق بحدّه : ايه طيب وش يبي ذا ؟
ابراهيم تنحنح : لا بس اسأل كانك تعرفه لأنه وصله موقعك
هميم عقد حواجبه : وصله موقعي؟ من ذا هو معروف ؟
هز راسه بنفي : لا ليه؟
هميم : اجل كيف جبتلي اسمه الثلاثي وش دراك عن اسمه؟
ابراهيم رفع راسه: ايه مو هو له سوابق وم ظنتي ناوي بك خير خصييّصًا ان معه جاسوس وشخص ماكر جدًّا وهو جايب له كل معلوماتك ومنها نقطة ضعفك
ضحك ورجع ظهره لورا : ايه ووش هي نقطة ضعفي؟
ابراهيم : م يبي لها ليث اكيد
عقد حواجبه وعدل جلسته : اللي افهمه انهم ماخذين ليث طُعم عشان يستدرجوني؟
هز راسه ب * ايه * : ايه طال عمرك
زفر بعمق : خلاص يصير خير
ابراهيم : ايه صح وموقع بيتك عنده واسامي اهلك كلهم
هميم بشبه حدّه : ومن هالشخص اللي يجيب له معلوماتي ع قولتك!
بلع ريقه بخوف ورفع كتوفه بعدم معرفه : م اعرف والله بس احد من اخوياه اكيد
هميم : بكرا تجيب لي كل شي عنه سمعت؟
ابراهيم : ابشر ابشر
هميم : تقدر تتوكل
دق تحيه وطلع بعد م سمح له هميم
بعد نص ساعه :
خلص الاوراق اللي بيده وطلع لبيت ابوه
ببيت حمد وبغرفته :
طلعت مرزوقه : حمد يا حمد اصحى
حمد والنوم مسيطر عليه : نعم يابنت الحلال نعم
مرزوقه : اطلع شوف بنتك نايفه تصارخ
حمد حرك يده : تلقينها متهاوشه مع نوال ع شيء خليهم
مرزوقه : لاا هي بغرفة طارق
فز حمد : وشو !!
مرزوقه : اي روح شوف شنو مهبب ولدك
قام حمد وهو يشوف جنون الارض تنوقز فوق راسه متوجه لغرفه طارق
طلعت النايفه ووراها طارق يضحك
النايفه برعب : والله ياطارق مالك داعي
طارق وهو يضحك : بلا دلع ترى م يخوف بالعكس
النايفه : يبوي وش بالعكس رعبب مدري وش تستفيد
طارق طاح يضحك : متعه يابنتي وش عرفك انتي
النايفه كشت عليه : اي متعه الله يصلحك قرف اقسم بالله
طلع حمد : بنت !! وش تسوين
لفت بخوف من نبرته : هلا يبه
سحبها ولف ع طارق ونطق بحدّه: اهخ ياللي م تستحي ع وجهك وش تسوي اختك معك بتالي هالليول !!!!
رفع حواجبه وناظره بقرف ع تفكيره : وش اللي وش تسوي هديها يالغالي تراها اختي يعني وش بسوي مثلًا
عطاه كف بااقوى م اوتي من قوّه : وصراخها ل وش مثلًا؟ صدق اني م عرفت اربيكم !
طارق ضحك وهمس: اي الصراحه الله يسعدك ع هالتربيه عشت احسن طفوله مع تربيتك يالغالي
دفه حمد للباب : توكل لا بارك الله فيك والله لا يهنيك لابنومك ولا بقومك يالعاق ولا اشوف لك وجه توطوط لي هنا !
طلع طارق وسحب حمد النايفه لغرفته : وش كان يسوي لتس ؟!
النايفه : وش يسوي مثلًا يبه كنا نتابع فلم وكان يخوف بس والله
رفع حواجبه : لا تستهبلين ع مخي ووش القرف والكلام البايخ اللي تو سمعته ؟؟؟!!
النايفه : هو قرف عشان الفلم كله دمَّان وقتل وقتِيل ومتعه لان طارق يحب هالاشياء شدعوه يعني ياابوي وش هالتفكير وش بيسوي مثلًا
حمد بحدّه وهو يرص ع يدها :اقسم بالله يالنايفه لو اشوفتس داخله غرفت هالسربوت م يحصل لتس خير سمعتي !
النايفه : يبهه شدعوه!!
سحبها بقوه بيدها : لاتراددين!!
سكتت ودموعها تنزل ع وجنتيها وطلعت لغرفتها تبكي بقهر ع ظلم ابوها لأخوها وهي عارفه ومتأكده انه م بيفكر كذا عبث وانه من امها لكن م تقدر تسوي لها او تقول لأمها شيء لانها بالنهايه امها ، طلع طارق ومن حظه انه صادف هميم
هميم طلع من سيارته وابتسم : ارحب
طارق تقدم ووجه واضح مغبون : تبقى
ضحك : وش مصحيك هالحزه يالعاقب وش مسوي من بلاء؟
نطق بطنازه : ولا شي بس كنت اسويها ومن معي *ضحك وكمل *: اختي بعد
عقد حواجبه ونطق بلخمه : هاه ؟ وش تسوي
ارتفع صوته بقهر وغضب : عمك هو ونيته مدري شقول طلعت ااااخخختتييي من عندي ويهاوشني يقولي وش كنتوا تسوون وطلعني برى وعاد مدري وش سوا به
عقد حواجبه بمحاوله منه بأن يفهم : دقيقه دقيقه يارجال يعني مستحيل بيقول هالكلام الا شايف شي
طارق بعصبيه : همييمم!! لا تجنني وتغبني زود ما انا مغبون يعني ابوي ونقول بنت الكلب مرزوقه ذي تلعب بمخه وتفرمته بكم كلمه وانت وش وضعك!!
ضحك : لا يرجال صل على النبي بس وش السبب يعني
زفر بقهر : عليه افضل الصلاة والسلام ماقلنا شيء بس اخخختيي وركز بهالكلمه جتني عشان نتابع فلم وشغلت لنا فلم رعب وهي جلست تصارخ وجانا يهاوش اقسم بالله مو تفكير اب
هميم رفع حواجبه بفهم : ياارجاال يا جاء بكرا حب راسه واعتذر ووضح له واكيد بيتفهم تراه ابوك مهما صار يعني
طارق : والله م اعتذر ولا شي ولا اني مسامحه ع سواته يعني انا ولده ومن لحمه ودمه ويصدق بنت الناس النكّرْه اللي هناك؟
هميم : لا يارجال استهدي بالله مهما صار هو ابوك ترى والشيطان ما مات تعوذ من بليس
ضحك : ابويي ؟؟ ابوي يعذبني بطفولتي ويخليني انام بالشارع والغريب يشفق ويعطف علي وهو اقل ماعليه يكبر ما تحت راسه وينام ولا يفكر باليتيم ولا حتى اهتم بوصية طليقته ف ولده؟؟؟ولده اللي ينام ليله بهالشوارع ظلم واهانه! ويخلي زوجته تسوي بي النون وما هم لا يعلمون ؟؟  وهو جايزٍ له ساكت م يتحكى هذا اب يا هميم ؟؟
مسك كتفه وطبطب عليه : خلاص امش معي تنام مع العيال لين ربي يحلّها امش امش وتعوذ من بليس
دخل هميم طارق بالحوش ودخل ل غرفته يجيب له فرش، وقف عند باب غرفته وحاول يفتحه ولقاه مسكر : شوضعها ذي مقفله الباب وش تحس فيه!
طلع لطارق وابتسم بفشله : شكلي بنام معكم
ابتسم طارق وتقدم هميم يطق باب الملحق ، فتح هياف :بسم الله شفيكم؟
هميم ب ابتسامه عريضه : شسمه بننام عندكم
طاح هياف يضحك : ابو هشام حياه الله بس انت يالسلوقي شكلك مطرود
رفع حواجبه هميم : تخسي والله مو مطرود ولا شي بس بجي عندكم
طلع الياس راسه وهو يضحك : الا والله شكل اختي طردتك يابو عزيز تسلم يد اللي رباهاا يشييييخ
هميم : لا يا عيال شدعوه انطرد بس بجي عندكم
طلع ليث : الا بالله طاردتك بعد هالسب اللي لقمته وجاك منها
هميم : شسالفه اي سب؟
ضحك : مسكينه والله خرشتها وخرشتني بهالليل وحولت عليك
طلع غيث يجيب فرش لهم
وكان مشعل وهياف وراكان وغيث يلعبون بلوت
والياس وليث وهميم جالسين ع جنب يسولفون
اما طارق اللي طاح يهوجس من جاب له غيث فرشه يفكر ب النايفه ووش سوا فيها ابوه ووش سالفة وعد ومازن وكيف بيقابل حسام بكرا كان عقله مشوش وماهو راضي يثبت ع موضوع واحد ويحس عقله ينبض رفع راسه وقام متقدم لدوره المياه يتوضى ويصلي له ركعتين بأمل منه تخف افكاره ويهدأ عقله وينام براحه،
ليث ضحك : هبلتني هي  وهالدوائر اللي فراسها
الياس ضحك : اما عاد دوائر ذي موجوده فكل زاويه فبيتنا المكرات خواتكم م يحطونها
ميل هميم راسه وهو رافع حواجبه ونطق ليث : الياس بطنك يحكك ودك اتوطى فيه؟
الياس ضحك : اما عاد انت يالبزر تتوطى فبطني اصبح اصبح بس
هميم بشبه حدّه: الياس لا تفلّها قلنا تمون ع زوجتي بما انها هي اختك خواتي شعندك يالخوي تمون؟
حك قفاه بفهاوه : ايه يارجال نسيت وشدعوه لا تشدّها ماني قاصد
هميم : ايه خابر منْك قاصد لو قاصد توطيت فيك بس امسك لسانك
اشر الياس ع طارق : شبلاه
نزل هميم اصبع الياس : م فيه الا كل خير
ليث : الا اكيد هالسعلوه مسويه له شي
هميم هز راسه بنفي :وليته بس هو حتى بنتها م سلمت منها
الياس ميل راسه : كيف؟
رفع راسه ويده: ياجعلها الساحق الماحق والرصاص المتلاحق
الياس ضحك : آآممييننن
قام هميم بينام متجاهل الرد ع اسئلتهم : ناموا قبل صلاة الفجر يالله
غيث : وويين يبوي بقى ساعتين يجيك الحين الشايب يفجر فينا نم بعد الصلاة
انسدح هميم ونام من التعب بعدم رغبه منه بس التعب والتفكير طغى عليه وكثييير
بعد ساعتين كل واحد فيهم بزاويه نايم
دخل راشد وضرب اول شخص قدامه من جنبه : الصلاة قوموا يالله !
مشعل ب ألم : ياعمم الله يهديك
ابتسم : ماعليه ياولدي لاتواخذن متجدعين لي تقل جثث م ينعرف راسكم من قفاكم قوموا للصلاة
تقدم راشد وصار يصحيهم واحد واحد وصل لطارق وسحب بطانيته ، انصدم من لقى طارق عيونه حمر اثر بكائه وعروق وجهه بارزه
غطاه ورفع ظهره : يالله ياعيال ولا احد يقرب طارق
قام غيث ولف ل الياس : شسالفه؟
الياس والنوم طاغي عليه : يبوي شدراني زين ادري انا للحين احلم ولا لا
ضحك: سكراان!!
طلعوا العيال ولحقهم طارق بعد م طلعوا
بالمسجد :
خلصوا صلاة وتقدم شخص وجلس جمب طارق
لف طارق وزفر بغضب وجاء بيقوم
مسكه : ويين ياخوي اجلس وش عندك بتهج؟
طالعه طارق بغضب ودفه : حسام ابعد عني ماني ناقصك!
ابتسم : حلويين تصدق؟ اشتقت لك وواااجد بعد
طارق : وتصدق انك مريض نفسي وواااجد بعد؟
قام بغضب يطلع ولحقه هياف : شبلاك؟
طارق رفع نظره له : م فيني شي
طلع دخانه عشان يدخن وجاء الياس وسحبه منه
طارق بغضب : الياس رجعه كان ودك تسلم!
الياس ابتسم: وان م رجعته؟
طارق قام ونطق بحدّه : الياس رجعه !
تقدم الياس يركض وطارق يلحقه وقف قدام ذياب وتحمى فيه الياس ، ذياب : شفيكم للحين بزران؟
غمض عيونه بغضب: ياعم خلي البزر اللي وراك يعطيني الدخان
لف ذياب ل الياس : عطه
الياس هز راسه بنفي : لا ماهو نافعه يبه
تقدم حمد من جمبهم ورمق طارق بنظره وهمس : سود الله ذالوجه
استغفر طارق بغضب ولف ل الياس : خله لك زين!
تقدم لسيارته وراح متوجه للعزبه
ذياب لف ل الياس : الله يهديك بس وشوله ذا كله ؟
الياس ضحك ودخل علبة الدخان فجيبه : احسن عشان يهجد عنه
طلع هياف من وراه : طيب عنده غيره فالسياره م استفدت شي تراك
ضحك : اما عاد ليتني نايم
غيث : فعلًا يعني الحين انت بتحاول تخليه يترك شي مو بيده انه يتركه
الياس :  و كيف مو بيده؟ مثل م استخدمه وهو عارف انه بيضره يتركه وهو يعرف اني م سويت تسذا الا لمصلحته
تقدم غيث يمشي ورا اخوانه
وقف له ليث :اعجل
طلعوا كل واحد لبيته ينام معاد طارق
بالعزبه:
قرر طارق م يطلع للمدينه ويأجل شغله للأسبوع الجاي ويرجع لبيت ابوه بعد كم ساعه لما يهدا الوضع
طلع سعود ونطق بخرشه : بسم الله فيكم شي؟
ابتسم : لا بس م تعودت ع جياتي؟ بجي عندك
ضحك: ينور المحل بوجودك يابو هشام
فرش سعود فراش ل طارق معاه عشان ينام ، بس افكار طارق كانت قاتله ماهي قادره تتركه تعب كثير وهو يتقلب : شكلي ازعجتك بطلع اشم هوا
اما سعود اللي كان غاط ف نومته ولا رد عليه
ببيت راشد :
دخلوا العيال للملحق ومراد لغرفته وراشد بعد :
تقدم هميم للمطبخ عشان يجيب له مويه
صرخت برعب من انفتح باب المطبخ : بسم الله !!
هميم بحدّه تقدم ونطق : بنت صوتتس فيه رجال!
رويدا بغضب : اففف منك انت واخوك شبلاكم تهبلون فيني!
تكتف : وش عندتس مقفله الباب ياهانم؟
رويدا تخصرت: عشان تستوعب انك متزوج وم تطقها من راسك وتطلع م تقولي
هميم رفع حاجبه : وليه اقولتس يعني؟
جلست تناضره بدون رد ولفت بتطلع
سحبها وصارت مقابله له بالضبط : ع وين؟
رويدا : وين يعني؟ للغرفه
فك يدها وتقدمت بتطلع
نطق : باب الغرفه لا يتقفل
طلعت للغرفه وهي تشتم فيه وقفلت الباب بس بدون المفتاح
جلست ع السرير وتذكرت المنديل الي هي اساساً كانت طالعه عشانه : اففف مدري وين كان عقلي
طلعت عشان تجيبه
هميم : وين؟
رفعت نظرها له : اصبر اصبر
دخل متجاهلها ورفع حواجبه منصدم من الحر اللي فالغرفه
دخلت وراه ورفعت المنديل : كنت رايحه اجيبه
لف لها : قيضض ليه مقفله المكيف؟
رويدا ضحكت : ابرد بسرعه
رفع حواجبه : اما عاد تبردين فهالقيض
رويدا : لا والله برد!
تقدم وفك المكيف
رويدا : هميم اقولك برد شدعوه!
اشر ع البطانيه : تغطي زين انا احتر بسرعه
رويدا : لا يشيخ
هميم : ايه ي شيخه
بغرفه مراد :
جلست بالم : مراد
همهم لها والنوم مسيطر عليه : هممممم
سناء : مرااد! بطني توجعنيي اهخخ
رفع راسه : اما عاد مو وقته ابد
لف له : شو اللي مش وقته؟ بطني توجعنيي!
ضحك: لا م فيتس الا العافيه تعالي نامي بس
سناء بخوف : حاسه اني خايفه هالمره اكتر من ولادة راشد
قرب منها وحضنها : ان شاء الله سهالات لاتوترين نفستس وم بيجيتس شيء
غمضت عيونها وزرفرت بتوتر : ان شاء الله
حاولت تنام بس المها كل ماله ويزيد طغى عليها النوم ونامت من قوة المها ،
بالظهر :
بصاله بيت حمد :
حسام بعدم فهم عقد حواجبه: كيف يعني؟
مرزوقه : اختك امس طالعه من غرفه هذا طارق بنهايه الليل تصروخ
حسام رفع حواجبه وهو معقدّها : ايوا؟
دخلت نوال وهي تسمع امها تحشي راس اخوها ع طارق
نوال : اوفر يا ماما طارق م سوا شي كانوا يتابعون فلم رعب لا تصعدون الموضوع وترا النايفه طول الليل وهي تبكي حرام علبكم
حسام بحدّه : بقلعة وادرين ان شاء الله وحرمه عيشه الظالم
طلعت نوال : بروح اصحي النايفه
طلعت للحوش وهي تضحك ومعاها كوبين مويه :
وقفت عند باب الشارع : والله اني داريه انكم هنا
طارق ضحك : ليه؟
نوال : رحت لغرفتنا م لقيت النايفه وطلعت لغرفتك م لقيتك ف توقعت انكم هنا
مدت كوب ل طارق : وجبت لك مويه
النايفه ابتسمت : وانا؟
مدت لها : خذي حقي شربت نصه
طارق لف للنايفه : يعني مد يده عليتس؟
هزت راسها ب * ايه * : الى متى بتجلس بالعزبه؟
رفع كتوفه بعدم معرفه ونطق بفرحه وابتسم بوسع ثغره : بخطب الوعد اليوم !
النايفه ابتسمت بفرحه: اسألك بالله ؟؟
نوال بعدم فهم : شسالفه بينك وبين وعد شي؟
ضرب طارق راسه بخفه: اوف صح م تدرييي
لفت لها : نوال لا يطلع تمام؟
هزت راسها بفهم :بس الوضيفه؟
ابتسم : امس بالفجر جتني رساله وقبلوني بالعقارات
نطت النايفه تحضنه بفرحه : طارق يونسسس احسني فخووووره فيككك
ابتسم بوسع ثغره : يابعد الدنيييا والله
ابتسمت نوال : مالي نصيب بهالاحضان؟
تقدم طارق وحضنها بقوه
رفعت راسها تمنع نفسها تبكي : يالله خلصت دموعي من امس وانا ابكي
طارق : م يستاهل والله م سويتي شي تراتس
ضحكت : ويين يابوي م فكرت بس ضربته الغالي امس توجع
مسح ع كتفها : بسيطه ان شاء الله تعيشين وتبلعين غيرها
النايفه كشرت وهي تضحك : وي الله لا يقوله فال الله ولا فالك
طلع راسه من سمع صوت الياس يناديه
طارق : هلا؟
الياس تقدم : عمي راشد اعطاني مفتاح الدكان تجي معي ؟
هز راسه ب * ايه * وطلع وقفل وراه الباب
الياس : طارق لا يكون زعلت ؟
طارق : من وش ؟
الياس : من اللي صار اليوم
ضحك: لا وين بس ابيها من الله ودي اهج
مد يده : هاته الحين طيب
الياس ضحك : لا طبعًا
طارق ابتسم : ترى عندي غيره
تقدم الياس ل غيث وليث متجاهل كلام طارق
ببيت راشد :
قامت رويدا متأخر وظهرها يوجعها من نومتها الغريبه ومن براد الغرفه : اوففف ياظهري ولا حامل!
رفعت نظرها للمكيف : يعني ع الاقل يطفيه اف بسسس
دخلت دورة المياه وصلت وزبطت شعرها وطلعت :
فتحت الباب ولقت عمها راشد وهميم وهياف وابو مشعل وولده
لفت من ابو مشعل تكلم: كيف حالك يابنتي؟
ابتسمت : بخير ياعم
نطق راشد : ترى الحريم ب الصاله يتحرونك
هزت راسها بفهم وتقدمت للمطبخ تاخذ مويه
اخذت مويتها وطلعت للحريم وسلمت عليهم
نهى : تعالي يا رويدا افطري
ابتسمت : لا ياخاله بالعافيه م ابي
انمار : ترى مراسيل تقول ان جاتكم رويدا خل تمرن تتحراتس
طلعت ل غرفه رولين وانمار ولقت مراسيل جالسه تسوي ميكبها
لفت لها من فتح الباب : شفت رسمتك تهبلل!!
رويدا ابتسمت : صدق اعجبتك؟
مراسيل : والله تهبل صدق صدق
ابتسمت : يابعدي انتي
مسكت مراسيل الدفتر حق رويدا ورفعت راسها : ادري اني ملقوفه بس خذيت فره فيه
ضحكت : حلالك شدعوه بس صح
مراسيل : ايه؟
رويدا : وش كنتي تبين بي
مراسيل : ابد بمدح رسمك بس ههههههههههههه
رويدا ضحكت : تخيللليييي مين جاء؟؟
مراسيل :مَن؟
رويدا طاحت تضحك : حسام
عقدت حواجبه : الله لا يسد نفسك قولي اميننن
رويدا : اتخيلت شكلكم لما تتقابلون هنا
مراسيل : يخسي بنطلع بعد شوي
رويدا عقدت حواجبها بحزن: امااا بترجعونن!! مو منجدك
مراسيل : احس صرنا نمون واجد زودناها وحنا جالسين عند عمك وهو م قصر والله
رويدا : ماعليه حولوا ع بيت ابوي
ضحكت : لا يشيخه
بالحوش :
ابو مشعل : ماشاء الله يا مراد ذا ولدك؟
مراد ابتسم : ايه ياعم
راشد ابتسم وحضن راشد : هذا راشد الصغيّر واول حفيدٍ لي!
مشعل : الله يحفظه لكم
نطق ابو مشعل : عنده اخو ولا اخت
مراد ابتسم بوسع ثغره : ان شاء الله هالاسبوع نقول
ابو مشعل عقد حواجبه وضحك بفهاوه : وشيّ؟
مراد: جايه بالطريق له اخت
ضحك بفرحه : ماااشاء الله الله يقوييكك
قام هميم : انا طالع للدكان
راشد : خذ معك مشعل اجل
قام هياف وهميم ومشعل متجهين للدكان
طلع هياف متقدمهم يركض للدكان
مشعل ابتسم : الحين م تملون من روتينكم المتكرر؟
هميم ضحك : عن نفسي راضي بس غيري ماهو راضي
بالدكان :
الياس وهو يضحك : طيب جيبهم
غيث : ياخوي سر والله م تشوفها
دخل هياف : وشو؟
ليث وهو ميت ضحك: البومات الصور حقاتنا
جلس : ايه شبلاهم؟
ليث رفع راسه يمسح خشمه: الياس يبي يشوفهم وغيث م يبي عشان ذيك الصوره
ضحك هياف : للحين م تخطيت
غيث : ولااني متخطي يبوي صوره غير لائقه مدري وش كانت تفكر فيه امي يوم صورتها
ليث طاح يضحك: والله غلط فحقي انت تؤامي ومصورينك وانت تتروش يغلطون علي ترى
قام غيث يصفقه : اهجد بس
هياف طاح يضحك : والله لا اجيبها
دخل هميم ومشعل : السلام عليكم
هميم : وراكم؟
ليث طاح يضحك مره ثانيه : تذكر البوم الصور حقي وحق غيث والصوره حقت غيث ذيك
هميم ابتسم : وانتوا صاملين تراه لك مب ل غيث
عدل ليث جلسته : اعقب!
قام غيث يضحك: ظهر الحقق!!!
صفق هياف كتف طارق من شافه يهوجس: وين وصلت؟
طارق ابتسم : هنا م رحت مكان
دخل حسام ب ابتسامه مستفزه : السلام عليكم مجتمعين؟
هياف زفر بغضب : ايه بس للأسف م به محلٍ لك
لف هميم ل هياف وهمس : شبلاك انت عيب
ابتسم حسام وطاحت عينه ع طارق :زين انا بطلع توصون شي؟
هميم قام : لا يارجال وين بتروح
مسكه هياف وهز راسه بنفي : اجلس الله لا يشغلك الا بطاعته اجلس!
هميم لف عليه من طلع حسام : فيه شي؟
دخل بعد دقايق شخص غريب ومو معروف
انس : السلام عليكم
رد الكل : وعليكم السلام ورحمه الله
انس عقد حواجبه : فيه من بينكم هميم بن راشد آل كايد؟
همس الياس ل ليث وهو يضحك : وكل شوي واحدٍ مطبح يعني
ليث ضحك : شكلنا مانا خالصين
نطق هميم : ايه نعم مَن انت؟
مد يده ليصافحه ونطق ب ابتسامه عريضه : تشرفت ياحضره اللواء !
ابتسم هميم : لي الشرف اعرفك؟
ضحك : لا انت م تعرفني بس انا اعرفك زيين
عقد حواجبه بشك : ايه زين امرني؟
انس : م يامر عليك عدو عندك اخو اسمه ليث صح؟
هز راسه ب * ايه * : ايه ،*كمل وهو يضحك* ماشاء الله عليك تخبرنا زين ؟
انس ضحك من ضحكته : ايه طيب اي واحد فيهم ؟
زفر بعمق واشر ع ليث
هميم : اقدر اعرف اسمك ؟
انس ابتسم : سامي
هميم : آل؟
انس سأل سؤال متجاهل سؤال هميم : وين بيت علي خالد آل حاسم؟
وصف له هميم وقام : انا طالع لبيتنا
هياف ضحك : بجي معك اطلع الالبومات
ليث : هيه ياعيال خل نتأكد من فالصور بعدين طلعوا ع كيفكم
غيث : هه لا يحبيبي سر بس
عند انس : طلع من الدكان ركض لبيت علي ليقابل نوره
وقف عند الباب الخلفي واتصل عليها
نوره : هلا انس
انس : اسمعي انا ورا بيتكم تعالي احتريك اعجلي
شهقت : صاحيي !! والله لو شافك احد اخواني ان نموت انا وانت!!!
انس بحدّه : اخلصي ومحد شايفنا
طلعت له : وش بغيت؟؟
انس : ابيك تجيبين لي كككلل شي عن اللي م يتسمى هميم وعضيده
عقدت حواجبها : هميم وليث؟
انس هز راسه ب * ايه: ايه واذا تقدرين تجيبين لي عن زوجته الجديده بنت عمه رويدا
تخصرت : انس! وش تبي فيها
مسك يدها بقوه : وش صار ع اللي فبطنك؟
نوره بتوتر : م ثبت م فيه شي
فكها وزفر براحه : زين واتمنى محد يدري اني جيت عشان اقابلك ولا انك كنتي معي يوم هربتي عُلم؟
نوره : طيب انس وش تبي ب رويدا ذي؟
انس : يابنت الحلال مو انا مفلح طالبني بمعلوماتهم بس
نوره هزت راسها بفهم : زين
انس : اسمعي ان احد سألتس فيه من جاء لبيتنا قولي ساامي اسمي لا تذكرينه وقولي انك صرفتيني اي شي
استوعبت : صح وش دراك ان ذا بيتنا؟
انس : اخذته من هميم
شهقت : يووييلليي !!! صاحي انت والله ان يجيب حتى فصيلة دمك لو بغى!!
انس ضحك : خل يجيبها طيب ترا قلت اسمي سامي ماهو عارفن
هزت راسها بنفي : والله ان يجيبكم واذكرك بعدين
انس : زين ادخلي وسوي اللي قلت لك عليه عُلم؟
لفت بتدخل : يصير خير
-
ببيت راشد : دخل هياف وهو يركض ووراه ليث يلحقه
وقف عند امه وحب راسها : يمه وين البومات الصور؟
نهى ابتسمت : شوي شوي طيب شفها جمب مغاسل الحريم بالصندوق
طلع يركض وليث طلع للعيال
بالمطبخ عند رولين ورويدا :
رويدا ضحكت :مستحيييل احس ليث اطيب واخف من هميم
رولين : ليث مستحيل م يتقارن مع هميم يختلفون مرهه بس عشان بالمواقف الجديه ليث دايم يذكرني بهميم بس بباقي الاوقات شخص ثاااني
رفعت راسها للدفتر اللي في يد رويدا  : وش ذا
رويدا ابتسمت : ارسم عيون مراسيل ودي اعطيها اياها بيوم تخرجها
رولين ابتسمت : تهبل والله
جت انمار : خلصت القهوه؟
ابتسمت رويدا وقفلت على النار : ايه
تقدمت بتطلع ورجعت ل رولين وغمزت لها : والله محد يهبل غيرك
ضحكت : وتوتس تستوعبين وتردين
رويدا ضحكت: اهم شي وصلت
عند هياف :
صار يقلب بالالبومات وابتسامته شاقه وجهه لين وصل ل البوم وتلاشت ابتسامته وصار وجهه مسود ومكتوم
فتح الالبوم وصار يقلب فيه صوره صوره ويده ترجف ،وقف عند صوره كفيله بأنها تدمره احفاد عبدالعزيز ملتمين عليه بيوم العيد الابتسامات مليييئه بهالصوره عبدالعزيز بالوسط قدامه هياف ونصف هياف شهق من طاحت عينه عليه دموعه صارت تنهمر بشكل مخيف جدًا ،ليث مبتسم ومطلع لسانه ع جمب بشكل مبهذل ولطييف جددًا وغيث يضحك ع شكل ليث هميم كلعاده شكله مثالي ومرتب جمبه الياس يحاول يخليه يبتسم رفع هياف عينه على نصفه وهو حاضنه قرب من الصوره وصار يبكي اكثر واكثر : ليه تركتني ليهه !!
طلعت مراسيل من غرفه الحريم الصغيره وحطت طرحتها عليها من شافت هياف : هياف ؟ كيف حالك عسى تحسنت ؟
انصدمت من شافته يرجف بصمت وهو حاضن صوره
قربت منه : هياف انت كويس؟؟!!
صار يبكي بصوت اعلى واعلى لين وصل للكل صوته
قام هميم من اوراقه طالع للمغاسل بفجعه من صوت بكاء هياف اللي امتلى البيت فيه
وقف قدام رويدا : وش فيه؟؟
رويدا ودموعها بعيونها وبصوت راجف: نيّاف
تقدم هميم ولقى هياف وجهه منغرس بحضن مراد يبكي بصوت مكتوم وبحسره : انا السبب بموته اناا !!
مراد بحزن: لا يابوي مالك دخل والله
رويدا لفت ل انمار : قبل 17 سنه وللحين يلوم نفسه؟
انمار : ولين يموت الله يهدي جدي بس لو انه م لامه كان م صار اللي صار
** قبل 17 سنه **
ببيت الجد عبدالعزيز :
نهى من عند المطبخ : نيّااف
جاء هياف يضحك : يمه
مسكته : وينك يانيّاف صارلي ساعه اناديك
عقد حواجبه : يمه انا هياف! نيّاف يلعب برى
ضحكت : يووه طيب رح ناد اخوك
هياف هز راسه بنفي : لا بنلعب السيل يمشي بنلعب وراه
نهى : زين انتبه لا تطيح فيه انت واخوك ويجرفكم السيل والبسوا شي يدفيكم
هياف ابتسم : ان شاء الله
طلع له يركض :
رمى نيّاف الكوره ل هياف : ناولني
مسك هياف الكوره وضحك: بعطيك وحده اتحداك تصدها
نيّاف ضحك: يالله اتحداك
رمى هياف الكوره وطاحت بالسيل
نيّاف بغضب : هياف قلنا شوتها بقوه بس مو كذا!
هياف ضحك : طيب رح جيبها
راح نيّاف يحاول يجيب الكوره و للأسف طاح فالسيل
تجمد هياف بمكانه وهو يناظر تؤامه واخوه يغرق قدامه ،استوعب ع نفسه وراح يركض ينادي احد يساعدهم
طلع يركض وهو منهااار يبكي واول من طلع قدامه جده عبدالعزيز
طاح يبكي قدامه : نيااافف نياافف
طلع عبدالعزيز معاه هياف وللأسف انهم جو بعد مامات نيّاف غريِق
واللي زاد النار حطب الجد عبدالعزيز اللي عيش هياف تحت تأنيب الضمير بأن هو سبب وفاة اخوه
•-نرجع للحاظر-•
رفع مراد راسه ل غيث : خلاص خليهم يبعدون لين يهدأ
طلع مراد وهميم هياف لغرفته عشان يهدأ
هميم بجديّه : هياف اسمعني يعني نيّاف م مات الا قضاء وقدر انت مالك علاقه
رفع راسه ووجهه احمر اثر البكاء: انا اللي قلت له يجيب الكوره كيف مالي علاقه!!
هميم: طيب؟ انت اللي ذبحته؟ لا خلاص ليه تلوم نفسك؟
مراد : هميم مو وقتك اسكت
هميم لف عليه : ليه مو وقتي؟ جايز لك وضعه يعني؟
مراد : بس كلامك م هو وقته خلاص اسكت
قام هميم متجاهل مراد واول م طلع قابل راشد
راشد : كيفه الحين ؟
ابتسم ومسك كتف ابوه : بخير يبه لا تشغل بالك امش تعال ارتاح
طلع ابوه للصاله عند نايف وراح يطمن امه
طلع للمطبخ : رويدا
رويدا طلعت له : هلا؟
هميم : وين اوراقي اللي كانت بالمقلط
رويدا : شلتها لان جاء راشد يلعب فيه تلقاها بالغرفه
طلع هميم للغرفه واتصل ع ابراهيم :
هميم : السلام عليكم ورحمه الله
ابراهيم : وعليكم السلام سّم؟
هميم : وش صار ع اللي قلت لك عليه
ابراهيم عقد حواجبه :جبت عنه شوي معلومات بس م تكفي ومو انت قلت لي تبيهم بكرا؟
هميم بحدّه : مفلح ذا يقرب له احد اسمه سامي؟
ابراهيم : لا بس اللي عرفته اللي جاب له معلوماتك اسمه انس
هميم : بجيك للمكتب بعد نص ساعه احتريني
ابراهيم : ابشر
_______________________________________
لاتنسون النجمه ❤ ، يتبع !!