الزّبرقان "غرور الأثمد"

Part 29

#الزّبرقان

مثل نار بگطن مابينت مهموم
بارد بالوجه واني احترگ سكته

لا تنسون التصويت ، التعليق بين الفقرات ، مُتابعة الحسابي
__________________

تقدمت جسمي كله يرجف من صياحهم وضربة شاهين حسيت فقار أنتهىٰ ، خالة تصرخ ورُسل واگفة مصدومة ترجف وسارة بنفس مكانها تبچي لطمت علىٰ خدي وصرخت من رجع دفرة شاهين وهو متمدد بالگاع

ركضت عليّ وگفت گدام شاهين وصرخت بوجهة حتىٰ يبتعد وهو عينة علىٰ فقـار يخزر بي سَحبته رُسل من گدامي ودرت اباوع

علىٰ فقـار الرفع عينة يباوع الشاهيـن بخذلان وعيونة جامدة بيهن الدموع حاجبة ينزف دم من اثر ضربة شاهيـن ماعرف شسوي حتىٰ ضرغام ماموجود

خالة والبنات واگفات يم شاهين وهو صاير اعصار من الغضب والعصبية وأنا وحدي ويا فقـار ماعرف شنو الصار وسبب بعصبيـة شاهين هيچ

علىٰ حسب كلام شاهين أنُ فقـار سكران ! چان ذابل ودايخ كلش بـس ما حسيته سكران اتذكر ايمن من تحرش بيه واتذكر حالتة شلون چانت تختلف بـ هواي عن حالة فقـار هسة

فزز تفكيري كلام فقار يحچي بخذلان :- مو سكران انه شاهين

دار علي شاهين وحچة بدون وعي
:- ااامشي لك سكييير وبعده أله عين ويحچي اگتلك واللّٰـه اگتلك اذا لمحتك يمها بعد .

:- م ماسويتلها شيء مثل ما تخاف عليها وتحبها أنه اخاف عليها اكثر منك

هو حچة هيچ وشاهين تخبل رگض علي گومه من الگاع جرة من ملابسة ويضرب بي وهذاك ما يدافع عن نفسه الصريخ ملئ المكان

روحي فرفحت علىٰ فقـار ألليّ بكل ضربة يضربها شاهين هو يبتسم وكأنما يريده يندم علىٰ شكوكه وكلامه بس لا حياة لمن تُنادي

صرخت وروحـي رايحة
:- شاهييين عوفة عووووفة تخبلتتت راااااح يموووت

دفعة شاهين وهو رجع ليورا يتطوطح من الضرب مسح وجهة وحچة :- دمرتوني وبعدتوني عنكم خليتوا لا ليلي ليل ولا نهاري نهار وهسة تلوموني وتطلعون وأنتم الصح وأنه الغلط .