බ්ලැක් ස්වෝන් 🎲 || Ongoing BL

Introduction

-හැඳින්වීම-

හැඳින්වීමටත් කලින්ම කොටස් පහක්ම කියවලා ඉවර කරපු නිසා බ්ලැක් ස්වෝන් නවකතාවේ ආකෘතිය (structure) තරමක් වෙනස් කියලා ඔයාලා දැනටම දන්නවනේ. ඒ ආකෘතිය ගැන වෙනම කර්තෘ සටහනක් (Author Note) දෙන්නම් මාර්ගෝපදේශයක් (guideline) විදියට. හැඳින්වීමෙන් මම නවකතාව ගැන සරල කරුණු කිහිපයක් ගැන කියන්න හිතුවා.

Swan කියන ඉංග්‍රීසි වචනය බ්‍රිතාන්‍ය උච්චාරණයට (British accent) අනුව "ස්වෝන්" කියලා කතාවේ නමට මම පාවිච්චි කරනවා. කතාව ඇතුලේ Swan කියන වචනය ඇමරිකානු උච්චාරණයට (American accent) අනුව "ස්වාන්" කියලලා යෙදෙන තැන් තියේවි. නවකතාව ඇතුලේ "ස්වෝන්" විදියට තිබ්බත්, "ස්වාන්" විදියට තිබ්බත් Swan හෙවත් හංසයා කියන වචනය එතනින් නිරූපණය වෙනවා. 🦢

බ්ලැක් ස්වෝන් නවකතාව සම්බන්ධ මගේ පළවෙනි කටුසටහන ලියවුණේ ගෝල්ෆේස් අරගල කාලයේ ඇඳිරි නීතිය නිසා ගෙදර ඉන්නකොට. ඒ කියන්නේ අහසම ගුගුරා Facebook එකේ පළවෙන කාලයේ. මේ කාලයේ මම කම්මැලිකමට වගේ SKAM France ටෙලිනාට්‍ය මාලාව දෙවනි පාරට නරඹද්දි හිතට ආව අදහසක් මගේ කටුසටහන් පොතේ ලියලා තිබ්බා. ඒක මගේ ප්‍රියතම ටෙලිනාට්‍ය මාලාවක්. මුලින්ම මේක ලියවුණේ ගෑනු-පිරිමි ප්‍රධාන චරිත යුගලයක් පාදක කරගෙන වුණත් අවුරුදු දෙක, තුනක් පුරා විවිධ සංස්කරණවලට භාජනය වුණාට පස්සේ කතාවේ එක ප්‍රධාන චරිතයක පොඩි වෙනසක් කරන්න තීරණය කරපු නිසා කේන්ද්‍රීය චරිත දෙක පිරිමි චරිත දෙකක් බවට පත්වුණා. ඉතිං මේ බ්ලැක් ස්වෝන් කටුසටහන නවකතාවක් බවට පත්කරන ක්‍රියාවලියට ලොකුම දායකත්වයක් සහ හයියක් දුන්න දෙන්නෙක් ඉන්නවා. ඒ එක්කෙනෙක් ඔයාලා හොඳටම දන්න මගේ සහෘද ලේඛිකා ශාමින්දි විජේසිංහ. අනික් කෙනා එයාගේ නම ප්‍රසිද්ධ කරන්න අකමැති හාදයෙක්. හැබැයි මට විශ්වාසයි බ්ලැක් ස්වෝන් කියවගෙන යද්දි ඔයාලට එයාව හමුවෙයි කියලා.

ඒ දෙන්නා ඇරුණම ශයනි අක්කා, නිල්නි අක්කා, විලෝචනා නංගි, තවත් නිර්නාමික හාදයෝ දෙන්නෙක් සහ තවත් කිහිපදෙනෙක් මට මේ කතාව ලියන්න ගොඩක් උදව් කළා. ඒ ගැන මම Acknowledgement (ස්තූතිය) එකේදි දීර්ඝව සඳහන් කරන්නම්.