توبة رمضانية

الحلقة 1

أول يوم من أيام رمضان هو أفضل حاجة احساس الصيام والتحمل في سبيل الله ونتا عارف بالأجر اللي راح تديه تصلي صلاتك فوقتها وتقرأ القرآن حاجة بزاف شابة وراحة نفسية عظيمة..
اليوم كي العادة بقات ساهرة وراه وقت السحور لازم تنوض توجد لأنو في رمضان العائلة تحبس عبارة علاش راكي ساهرة وتولي اسهري حتى السحور ونوضينا 🤣

دخلت للكوزينة وبدات تجبد فالحليب والقهوة لانو عايلتها يحبو يتسحرو بيه اما هي(وقفت مقابلة الفريجيدار)
روان:يوو الشربة خلصت باه نسحر انا..اواه يظهرلي نقلي فريت بزربة قريب يأذن انا منقدرش كرشي تولي تزغرت مبعد كن مناكلش مليح ضك
ابراهيم:رواان ختيتو ديريلي بوراك حمبوك
روان:ياا برهوم راني نخمم فالشربة باه نسحر انا ضك؟
ابراهيم:ديري البوراك وسخني طاجين لحلو تاع لبارح وسيبون نتي ثاني عندك كارطون مش ليسطوما
اووب" ويجي كاس البلاستيك في جبهتو"
روان:ليسطومتي سر سعادتي بركا متعلق عليها سينو نخليك تطيب بوراك وحدك ديجا طير نوض يما وبابا يتسحرو قريب الآذان
ابراهيم:ااه يا كرشي كن مش نتي كن راني قتلت هاد الطفلة من زمان
مشا لشومبرة والديه وجا يدخل ومبعد حبس
ابراهيم:اواه وكن نشوف منظر غير لائق الاب يظل جيعان الليل معاه يخوف
تبسم بخبث على الفكرة اللي جاتو ورجع على وراه قاصد الهول
ابراهيم:1.2.3 وانطلق صوت مستشعرة تسرب الغاز فالدار حارق الدنيا بقوتو هو غطا وذنيه وقعد يستنى انكشار العائلة الكريمة
ابراهيم:نخطيكم تضييعو نوضو لحباب تسحرو
برهان(اب روان وابراهيم)خرج من بيتو يجري:ابراااهيييييم ليوم  نقتلك اولديي
روان جرات من الكوزينة حبست لاباراي تاع الغاز وامها وقفت قدامها
حليمة:روان شحال من مرة نقولك متعوليش على المهبول تاع خوك
روان:بصح ماما هو دارها براسو مش أنا
حليمة:الناس تنوض تسحر وانا نوض على سكرات الموت
برهان حاكم ابراهيم من وذنو ويعيط:وقتاه تكبار نتا ااه؟؟وقتاه ناوي تعقال؟؟
ابراهيم:كي نتزوج ابابا كي نتزوج زوجني نستعقل ها افهم روحك اسيدي
برهان زير عليه كثر يشهد:لالا نتا مش ولدي معنديش ولاد ميحشمو ميخافو شوف معاك ختك
ابراهيم:واا باا شوي قدر وعلاه تطيح اي بنتك ثاني
روان:وانا علاه تجبدو فيا علاااه
حليمة:ياربييي وش هدااا؟؟

برهان:ابرااهيييم ولدي اني نقتتتلك

حليمة:ياراجل العن الشيطان ياهااه

روان:واا ماما رانا رمضان مكانش شياطين وجنون تسما او في كل قواه العقلية خليه يقتلو نتهناو منو

ابراهيم:رواان اني نطيشك

برهان:علاه تطيشها ولدتها ونسيتها

حليمة:ياناس اتقو مولاكم واركحوو شبيكم
"الله اكبر الله اكبر"
دقيقة صمت وهدوء ملا البلاصة ونظرات الحقد تصبت فبلاصة وحدة..على ابراهيم
روان:ابراهييييييييم
برهان:بنتي هزي تلفونك عيطي لعمامك يجو يوجدو معايا للجنازة
ابراهيم شمها قارصة يمشي على وراه وداير يديه للقدام للدفاع مستني الهجمة تطيح عليه
ابراهيم:بابا خير برك شكون مات
برهان: نتااا بسم الله ياربيييي
وقرب ليه حكمتو حليمة وابراهيم طار لبيتو
ابراهيم:بابا الدم عمرو يولي ماء كالم توا تعييش
.........
في دار ثانية متلمين كامل فالصالون بعدما صلاو جماعة وقعدو منهم اللي يذكر ومنهم اللي يقرأ قرآن
وقف صافي بقاميصو قرب لأختو الصغيرة اللي بعمر 8 سنين وقاعدة تقرأ فالمصحف
صافي:وش حفظتي ليوم🥰
ميار:صافي حفظت سورة الأعلى كامل 😍
صافي:اوو برافو عليك شطورتي فليل ورا صلاة التراويح نديرو العرض وليك مفاجأة اوكي؟
ميار:اووكي صافي نحببك
صافي:وانا نموت عليك اميرتي
...........
العاشرة صباحا
حليمة:روااان روااان نوووضي  نسيقو الدنيا كامل غبااار
روان:اممم خلوني نرقققد
حليمة:اييه ارقدي ارقدي انا نسيق ونطيب ونتي ارقدي واهملي من الجامع للدار والله ومتنوضيش ضك غير متزيدي تعتبي باب برا
روان وقفت مستنفرة:هاا سيبوون سيببون نضت وينهو لفريطوار
حليمة تبسمت وراحت تجيب الماء وهي هزت فراشها مع هواشها لراسها
روان:ااه ياربي الدار شحال تعيي وقتاه ترجع لقرااية
حكمت فكرشها اللي زقزقت معاها:الله لا تربحك يا ابراهيم راح سحوري بسبتك وش يكملي النهار اووف
ابراهيم وسط احلامو:اييه كففتةة كفتةة روااااان تاكليها عينيك نقللعهمم
ااااه
فطن يعرق لقا روحو فبيتو شاف للساعة لقاها العشرة ونص
ابراهيم:ااه ياربي وش يكملي النهاار راني جعععت
روان دخلت تفتح فالتاقة وتعرش:نتا السبة كن نوضتنا كي الناس رانا عاودنا لفطور اه قصدي سحرنا
ابراهيم:حبيت نوضهم بالخف هيا هوما ربحولي العيب
روان:هاهااهااا نوض نوض بركاك لجياحة نتاجك تزوجو وبولادهم كن جات الدنيا دنيا انا ومرتك رانا بالتور على لفطور مش وحدي💔💔🥺
ابراهيم:تربحي فالأجر اقلبي معليش 🥺❤(وقف باس راسها وخرج)
روان:اخوتي التبلعيط هدا كامل باه منقولوش هز بلاصتك ياربييي

.....
في المسجد قاعد ولام بيه الأولاد الصغار لابس القميص والكبوسة تاعو👳🏻‍♀ ومقابلين المصحف ودايرين جلسة عرض وحفظ آيات القرآن الكريم
صافي:شاهين نسيت الغنة عاود
....
صافي:معاد راك تقرأ قرآن مش تغني عدل نبرة صوتك 
...
دخل شيخ الجامع الكبير وتبسم كي شاف صافي والأطفال دايرين بيه
الشيخ:السلام عليكم
ردو عليه الولاد وصافي:وعليكم السلام يا شيخنا
الشيخ:واش راكم؟
صافي:الحمد الله ونتا يا شيخنا
الشيخ:والله يا ولدي صافي الدين كي نشوفكم هكا نفرح ونرجع لبااس علياا
صافي:الحمد الله الذي ثبت الهداية في قلوبنا
الشيخ:سبحانو كريم يمد من عندو وينحي من عندو...بعد يومين راح تبدا مسابقة أفضل قارئ وقارئة ونكرمو اللي حفظو كتاب الله كامل مدامنا فهاد الشهر الفضيل
صافي:اوو فكرة بزاف شابة هكا يتحمس الباقي ويهتمو اكثر للحفظ والتعلم
الشيخ:ايه ياولدي الله يقدرنا على فعل الخير

صافي:آميين ياربي
الشيخ:هيا مالا ربي يعينكم اولادي ويثبتكم ونفخرو بيكم نشالله متنساوش باللي لحافظ القرآن أجرًا عظيمًا عند الله؛ فإن القرآن يشفع لصاحبه يوم القيامة، ويُعلي منزلته ودرجته في الجنة؛ فيكون مع الملائكة السفرة الكرام البررة، ويتعدى نفعه لغيره في الدنيا والآخرة، ويكون له عظيم الأثر في حياته وبعد مماته، وفي هذا يقول النبي صلى الله عليه وسلم: «مثل الذي يقرأ القرآن وهو حافظ له مع السفرة الكرام البررة ... ]كما أن حافظ القرآن يَلبس والداه تاجًا يوم القيامة؛ إكرامًا لهما على تربيته على حفظ القرآن، يقول النبي صلى الله عليه وسلم: «من قرأ القرآن وعمل بما فيه، أُلبس والداه تاجًا يوم القيامة، ضوؤه أحسنُ من ضوء الشمس في بيوت الدنيا لو كانت فيكم، فما ظنكم بالذي عمل بهذا]
الشيخ:تخيلو يا ولادو المكانة اللي تكسبوها فالآخرة والفرحة اللي تمنحوها لوالديكم كي تلبسوهم هداك التاج والباقي متمنيين لو ولادهم ثاني دارو هكاك وخلاوهم يعيشو هاديك القيمة والفرحة
الولاد بابتسامة فخر وشوق لهاديك الدقيقة:ان شاء الله نقدرو نلبسو والدينا هداك التاج يا شيخ
الشيخ تبسم بفخر:سبحانو يوفقكم للمليحة نتوما اقبلو برك وربي معاكم
صافي:سبحانو..وحنا ندعموهم حتى يلحقو
الشيخ:جزاؤك عند خالقك يا ولدي
وقف الشيخ جا خارج وقف معاه صافي
صافي:نوصلك للباب شيخنا
الشيخ:لالا يا ولدي ريح روحك
صافي الدين:لالا مفيهاش تعب يا شيخ 

..........by:aya lz.............

نهاية أول بارت تعريفي للأبطال والأجواء اللي راح نعيشوها راح نسيي نخلي الكرو هادي نظيفة وفيها قيم دينية وكلي امل انو نتعلمو من بعض ونتهداو مع بعضانا كامل

رمضان مبارك تصومو بالصحة والهنى..صوم مقبول وذنب مغفور ان شاء الله