-﮼روح فَــاطـم. (متوقفة)

البارت 4

عرفت
شلون احطها الروح
بالتابوت
لتعلمني ماخذ عالنجف شمرة 💔

________________________________________
________________________________________

فتحت عيوني بصدمة من السمعتة
_ انت انت شدكول شنو ماتت شنووو ما ماتتت مستحيلل

كضني عمو يهديني تخبلت مستحيل ماما ما تتركني رحت اركض لغرفتهة طبيت لكيتهة مددة على السدية ومغطيهة بجرجف ابيض شلت الجرجف عن وجهة وعيوني تصب دمع

_ ماما حبابة كومي فدوة اروحلج لا تعوفيني والله مالي غيرج ماما لا تركينا اني وعلي ماما فدوة يلة كومي انتي مترديلي طلب ادري بيج حبابة لخاطر علي شكلة اذا رجعت وانتي مو وياي

ضليت احجي وياها بس ماكو رد هنا تأكدت راحت ماما بعد ما شوف عيونها الحلوة بعد ما اسمع صوتها تخبلت ضليت اصيح اجو طلعوني من الغرفة وعمو حاول يهديني بس فقدت ما ردت شي بس يكلولي ماما ما ماتت موقف كلش صعب ويوجع الكلب حيل

عمو كاظم خابر عمو احمد وخبرة بل الموضوع شوية واجة تكفل بكلشي بل الغسل والدفن مقبلو ابقى رجعت ويا عمو كاظم لبيتهم

مرت ثلاث ايام على الفاتحة سوووهة يوم واحد وخلص كلشي نور كل يوم تجيني تبقى من لصبُح لليل وياي متركتني بس اني مو وياهم عزلت نفسي بغرفة ثلاث ايام واني ما مستوعبة موتت ماما ثالث شخص افقدة بحياتي كلهم راحو من دون موعد

رفعت راسي على صوت طكة الباب شفت عمو احمد دخل اجة كعد يمي باوعلي وكال

_ كافي سوين هيجِ بنفسج بنيتي امج ماتت راحت لدار حقهة هذا يومهة ليش جاي سوين هيج بنفسج

ما حجيت ولا رديت علي صوتي احسة اختفى من وفاة ماما
_ بنيتي والله ترة جاي تعذبيها هيج انتِ مو زين عليهة البجي واللطم اذا ترديهة ترتاح صلي الهة اقري الهة قرأن صدكيني راح ترتاح

كمت ابجي من سمعت كلامهة تنهد وكال

_ كافي بجي بابا والله مو زين عليج فكري بأخوج على الاقل اذا صار بيج شي منو الة لازم انتي هسة تكونين الة ام ثانية وسند

فكرت بـ علي ما اعرف شلونهة صالي ثلاث ايام
ضل عمو يحجي وياي حاول يخليني احجي واسولف ويا بس يأس من شافني ساكتة تنهد وكام طلع ضليت كاعدة لثاني يوم اجت علي نور سلمت علي وكعدت ضلت تسولف حاولت بأي طريقة ماكو فايدة ذكرت علي اريد اشوفهة رفعت راسي الهة وكلت

_ علي وين

نور _ هنا هسة راح اصيحلهة يمة عبالي بعد متحجين ونبي

ما رديت عليهة راحت صاحت لـ علي شوية واجة كعدت يمي وحضني من شفتة كمت ابجي تنهدت نور وسكتت مسحت دموعي وكتلهة

_ اريد نرجع لبيتنة

نور _ شنو صدك تحجين أفاطم تردين تعيشون وحدكم بيتكم