Unicode
အခန်း ၅ ။
စုန့်ချောင်ရှီသည် မြည်တမ်းသံတစ်ခု၏ အနှောင့်အယှက်ကြောင့် နိုးသွားရသည်။ အိပ်ရာမဝင်မီက နှစ်နှစ်ခြိုက်ခြိုက် အိပ်ပျော်စေရန်ဆိုပြီး မေမေစုန့်က သူမနှင့်ချူကျင်းကို နွားနို့တိုက်ခဲ့သော်လည်း သူမမှာ ခဏလေးပဲ အိပ်ရပြီး ပြန်နိုးလာလေသည်။
နိုးနိုးချင်းဖြစ်၍ မူးဝေကာ ထုံပေပေဖြစ်နေသေး၏။ ထိုစဥ် တစ်ယောက်ယောက်က တိုးတိုးလေး ရှိုက်ငင်နေသည်ကို ရုတ်တရက် ကြားလိုက်ရသည်။
ထိုသည်နှင့် သူမလည်း အိပ်ရာမှထကာ အရှေ့သို့ နည်းနည်းတိုးပြီး ညာဘက်ဘေးကို ကြည့်လိုက်သည်။
ထိုတွင် ချူကျင်းသည် အိပ်ရာလေးပေါ်တွင် ဆန့်ဆန့်ကြီးလှဲနေပြီး ရင်ဘတ်ပေါ်တွင် လက်ချောင်းသွယ်များကို ခပ်တင်းတင်းယှက်ကာ တင်ထားလေသည်။ မျက်လုံးများကို အတင်းစေ့မှိတ်ထားပြီး မျက်မှောင်ကျုံ့ထားမှုကြောင့် မျက်ခုံးနက်များက တွန့်လိမ်နေသည်။ ထို့ပြင် မျက်ရည်စများကလည်း သူ့မျက်လုံးများမှတစ်ဆင့် ပါးပြင်ပေါ်သို့ စီးဆင်းနေခဲ့လေ၏။
သူ့အမေကို လွမ်းလို့ ငိုသည်များလား။ သို့တည်းမဟုတ် အိပ်မက်ဆိုးများ မက်နေသည်လား။
အတွေးနှင့်အတူ မဝံ့ရဲသည့်တိုင် သူမလက်ကလေးများကို ဆန့်ထုတ်ကာ စုန့်ချောင်ရှီသည် ချူကျင်း၏ လက်မောင်းတစ်ဖက်ကို အတတ်နိုင်ဆုံး ခပ်ဖွဖွလေး ပုတ်ကာ နှစ်သိမ့်ချော့မြူလိုက်ပါ၏။
"မကြောက်နဲ့ ဘာမှမဖြစ်ဘူးနော်။ မကြောက်နဲ့။"
လူကြီးလေးတစ်ယောက်လိုမျိုး သူမက ပြောသည်။
ချူကျင်း၏ စုကျုံ့ထားသော မျက်မှောင်က ပြေလျော့လာပြီး အသက်ရှူသံပုံမှန်ပြန်ဖြစ်သွားသည့်အချိန်မှသာ တဖွဖွပုတ်ပေးနေသော သူမလက်ကို ပြန်ရုတ်လိုက်သည်။
ဗိုက်ထဲ ဖောရောင်နေသလို တင်းကြပ်ကြပ်နှင့်မကောင်းပေ။ အသက်ရှူကြပ်သကဲ့သို့ ခံစားနေရသည်။
YOU ARE READING
၁၉၉၀ ခုနှစ်က ဖက်ထုပ်လုံးလေး
Romance1990 ခုနှစ်ဆီသို့ ကလေးလေးအဖြစ်ကူးပြောင်းသွားတာမျိုးပါရှင့်။