الشفره

البارت الثانى

الشفره
البارت الثانى

إستيقظ ليجد نفسه يجلس فى غرفه مغلقه ذات إضاءه بيضاء ويبدوا أن الغرفه مبطنه ومعزوله لمنع تسرب الأصوات ، و إنتبه إلى وجود نور إلى جواره منعزلين بتلك الغرفه ورغم وجود الكراسي و المنضدة فقط إلا انه إستشعر  أن هناك من يراقبهم رغم عدم رؤيته لأي كاميرات للمراقبة .

كان يشعر بصداع شديد ونظر إليها ليجدها لازالت فى حالة اغماء ، حاول ان يحرك يده لإيقاظها لكنه فوجئ بسلسله فى يده اليمنى مثبته فى تلك المنضدة ، فأعاد النظر إليها ليجدها هى الاخرى يدها اليسرى مقيده فى المنضده .

*انتى ، انتى ، اصحى
-فى ايه انا فين ، انت عاوز منى ايه
*هعوز منك ايه ، كانت صدفه مهببه يوم ما شوفتك
-احترم نفسك يا اسمك ايه انت ، وبعدين انت مش مكسوف من نفسك
*أنا ! ليه؟
- بالروب الى انت لبسه ده
*نظر الى نفسه .. طيب اعمل ايه بس هو بمزاجى وبعدين ما انتى حالتك بالبلا انتى كمان
-ههههههه
*بتضحكى
-ايوه مش بيقولك هم يضحك وهم يبكى ، فأنا بضحك عشان شكلى شويه وهبكى ، احنا فين بقى دلوقت
*مش عارف بس شكلها غرفة تحقيق
-تحقيق ! طيب مين الى بيحقق معانا؟!
*معرفش ، ربنا يستر.
- هو ايه اللي حصل؟!و ليه! انا مش قادرة افهم حاجة.
* يعني انا اللي فاهم بس اكيد هيحققوا معانا بسبب الجثة اللي لقيناها في الجناح.
- ايوة و أللي من حظي طلعت بنفس اسمي
* تقصدي اسمنا
- ايوة. يا نهار ابيض احسن أكون أنا أللي كنت مقصودة اتقتل عشان يسرقوا فلوس الصفقة بتاعت الهدوم.
* يا سلام يا ذكيه. كل الهري ده عشان كام الف جنيه؟! يا بنتي الموضوع واضح انه اكبر من كدا ده قناصة و غاز و حوار كبير.
- طب يبقى مين الراجل ده و الناس دي عايزين منا ايه.
* مش عارف بس ربنا يعديها على خير.

فجأه فتح الباب ودخل اربعه من الرجال. اثنين بملابس مدنيه و اثنين بزي عسكري.
تكلم الرجل الاطول الى الرجلين ذو الملابس العسكريه  بلغه تركيه ، ليتكلم بعده الرجل الاخر

-حضرتك هتتفضلى معاهم
*انا ! هتفضل فين
-التحقيق لازم يتم بشكل منفصل

نظرت هى الى نور فقال لها ( روحى معاهم يا بسكوته متخافيش ) لا يعرف لماذا طمأنها بالرغم من انه كان يشعر حقا بالخوف

-انا اسمى سليمان مترجم السيد تولاى
*احنا فين اصلا انا مش عارف
-انت فى الامن التركى وهذا  السيد تولاى الضابط المسئول عن التحقيق
*انت عربى ؟
-انا سورى

نظر اليه تولاى وتكلم بالتركية وكان يبدو انه يستفسر عن ما يدور بينهم ، فأجابه سليمان

ثم بدأ تولاى فى الحديث باللغة التركية ليقوم سليمان بالترجمة إلى اللغة العربية

يقول :لماذا قتلت ذلك الشخص فى الفندق ؟
*قتلت مين يا عم انا مقتلتش حد انا لقيته جثه كده
-يقول اسمك نور سامح ابراهيم صحيح
*ايوه صح
يقول : ومن السيده التى معك
*معرفهاش بس واضح من كلامها ان اسمها على نفس اسمى ودى الصدفه المهببه الى جمعتنا
يقول : هل تعلم ان القتيل له نفس الاسم
*ايوه شوفت ده فى الباسبور لما كان بيضرب علينا رصاص من الشباك
يقول : الا ترى ان هذه صدفه عجيبه
*ايوه عجيبه جدا كمان ، بس انا مالى ، انا بلوجر حضرتك جى اصور البلد وجى بدعوه من شركة اعلام وتقدروا تتأكدوا من الكلام ده
يقول : سنتأكد ولكن من الذى كان يطلق عليكم الرصاص
*وربنا ما اعرف ، انا مليش دعوه انا جاتلي الدعوه المهببه دى وجيت وكان واضح ان فى مشكله قى الفندق بس فى الاخر حصل الى حصل
يقول : تعتقد لماذا قتل هذا الرجل ؟
*يا باشا انا هعرف منين ما انا قولت اول مره اشوفه وكمان شوفته ميت مش حى ، انا كنت جى اشتغل واتفسح بس هو كده قليل البخت يعضه الكلب فى المولد
يقول : كل الاسئله تجاوب عنها لا اعرف ، حاول ان تتذكر اى شئ حتى تساعد نفسك
*طيب هفتكر ايه بس ما انا معرفش فعلا انا كل الى فاكره ان الباسبور بتاعه كان اردنى وان اسمه فى الباسبور نور سامح ابراهيم زى اسمى
يقول  : لكن هذا الباسبور تم تزويره
*معرفش بقى المعلومات دى انتوا الى تقدروا تعرفوها مش انا.