اسرار لا تباح

حلقة _١_

#السر_الاول

#اسرار_لا_تباح

#فـޢޢـرآقـޢޢــډ + هـޢޢـآلـޢޢــةّ

🕊🕊🕊🕊🕊🕊🕊🕊🕊🕊🕊🕊

بسم الله الرحمن الرحيم 🫶🏻
بسم الله 🌺
والحمد لله 🌺
والصلاة والسلام على خاتم النبيين والمرسلين محمد الأمين🌺
وعلى آله الطيبين الطاهرين 🌺
وعلى صحبه الاشراف 🌺
والتابعين بإحسان الى يوم الدين 🌺

نبدأ النشر في يوم الثلاثاء...
المصادف ٢٥/٦/٢٠٢٤...
١٨/ذو الحجة // عيد الغدير الاغر 🌺

للعلم ولأبراء ذمتي امامكم....اقول لكم
٧٥ من اسرار الحكاية حقيقية
٢٥ من سرد قلم فراقد
الغرض من الأضافات هو لتعزيز اواصر حبكة الحكاية واضافة طابع المسلسل العراقي الدرامي اليها ...

ان شاء الله حيكون النشر بين يوم ويوم
الساعة ال ١٠ مساءاً

🕊🕊🕊🕊🕊🕊🕊🕊🕊🕊🕊🕊

اللهم إحفظ دخول و خروج كل رب أسرة
يحارب الحياة لأجل قوت أهله
و احفظ رجوعه لبيته و لأولاده ..🤲

السنة // ٢٠٠٦

ـ يمعوووود شبيك ميت خو ما ميت ! صار ساعة أنده بيك

ـ عوووذة لهل وجه ولهل مصبااح
شكووو منو احترگ؟

ـ اكعد وجاوب طارق اخوك حركني بالاتصالات وحارك جهازك وانت ميت

ـ اووو تلگي متلاغي ويه عروس البين
وتعال يا عمر وصلها لبيت اهلها

يوسف انگشع من يمي اريد انام شويه
ورايه سفرة لبيت المرأه

ـ للللك مو خلصت خفارتك كوووم ولي لأهلك

اتجاهلته...المخدة اهم شي بهذا الكون
انكلبت على صفحتي وانطيت وجهي للحايط
وتلفلفت بالجرجف مستمتع ببرودة البخيخ
الغرفة بارده والشمس عاكسه من الشباك بداية الصبح....
عيوني لحالهن يغمضن ويفتحن
رجعت لحالة الاسترخاء غمضت عيوني
ورخيت جسمي ،، ودماغي دخل بمود التخطيط

بيني وبين نفسي اتخيلت اليوم ...
كلت اليوم مابيها مجال ... ليش اليوم خو فد شوية انزل للريف لبيت عمي
هم أغير جو هناك ما دام باجر عندي عطلة

وهم اشوف المراه

وهم اشبع من هناك هوا نقي والنفسية ترتاح

وهم اخلص من هوسة طارق ومرته عروس البين

وهم اخلص كم ساعة من لغاوي البيت والمسواك وهاي السوالف الطلع الروح

اااي اليوم يجيني الريوگ المعدل
اموووت على خبز تنور طين
وياه كيمر العرب
وبيض العرب بالدهن الحر
لو دهن حر و دبس
يااابه اموع على روبة الدواب ام الگشوة الثخينة
خو العسل والمربى الطبيعية ،، بودي اغط بيهن