الفصل الثامن: مالك مكان.
دخل روح للبيت واستقبله سمير بحضن قوي قبل لايشهق بقوة لما شاف يده المضمدة بشاش ابيض " يبا وش ذا كيف تأذيت؟" تشنج وجه روح من الألم بسبب قبضة سمير القوية والي رخاها على طول بعد ماستوعب " تعورت بالغلط مو شي قوي ماعليك" ربت على كتف سمير وحاوطه ماشي ناحية جناحهم.
" شفت الصالة اليوم؟ عندهم حفلة" هز روح رأسه لسمير وكملوا مشي " مستغرب ان عندهم أفراح يفرحون فيها هه" تنهد روح ورد على سمير بهدوء " أراهن بمليار ان كل ذا عشان السمعة والتفاخر بس" ضحك سمير وهز رأسه موافق معاه " بس ترى مامعاك مليار وش لو خسرت؟"
ناظر روح ناحيته وابتسم " أبوك ماعمره قال كلام وما صدق فاهم؟" أطلق سمير تأوه بسبب قرصة روح ودفعه من ورى مدخله غرفته " طيب طيب يا أبو صدق انت روح غير الحين وتعال ناكل وأي ترى وصلت طلبية باسمك حطيتها على مكتبك" فصخ روح قميصه الأزرق مخلي جزئه العلوي النحيف عاري لأشعة شمس الغروب تمر عليه من الشباك.
" تعال افتحها ونزل الملاعق لتحت عشان ناكل فيها" قطب سمير حواجبه وراح يفتح الكرتون مطلع الملاعق الفضية من داخله " طالب ملاعق؟" سأل باستغراب ناحية روح والي تنهد مطلع بقية الشوك والسكاكين " مارح ناكل فيها بنجربها بس، سمعت ان الفضة تبين إذا كان الأمل مسموم ولا لا وفكرت اجرب"
ناظر ناحيته سمير وضحك " يبا ترى يلعبون عليك وأنت تصدق" صفق روح راس سمير بخفة ومشى " محد لعب علي أنا بنفسي قريت ان أيام زمان كانوا يستخدمونها ورحت دورت موقع يبيعها " هز سمير رأسه بفهم وأخذ زوجين من كل قطعة وخلى الباقي جوى الكرتون.
" جايب كثير" ناظر روح ناحية سمير وهو يدور مكان يخبي فيه الكرتون " احتياط " ومشى ناحية الحمام مغسل وجهه ومغير ملابسه بينما سمير انتظره فوق السرير وهو يقلب بجواله.
________________________
انكتب لرايد خروج من المستشفى بعد ما طلعت النتائج إيجابية لذا كان قاعد على حافة السرير بعد ماغير ملابسه ينتظر أبوه يخلص دفع ويطلعون، ابتسم يطالع بشاشة الجوال لمحادثة أصحابه والي كانوا يتهاوشون متى يحتفلون بمناسبة طلوعه من المستشفى.
" تراني عارف إني ما هميتكم وأنكم ماخذيني عذر بس عشان ترفهون على انفسكم" سجل رسالة صوتية راسلها على قروبهم قبل ماتمتلي الغرفة بصوت ضحكته الرنانة، مسح أطراف عيونه اللوزية من دموع الضحك بسبب ردود اخوياه بس قاطع لحظته دخول أمه تناديه للخروج.
اتفقوا على الطلعة اليوم بحكم أنهم كانوا بثاني أسبوع دوام والي يبدأ الجِد فيه لذا مارح يحصلون وقت مناسب يطلعون فيه بعدين، رجع رايد لبيته يرتاح شوي قبل طلعتهم.
