.
.
المكان: وسط البلد في القاهرة
أما الزمان فمن زمان
قصة حزينة مؤثرة
والقصة دي كان ياما كان
بنت بضفيرة ومريلة
ومادام في بنت فـ فيه وله
بيبُص م الشباك عليها لما ترقص ف الخلا
ضحكتله مرة ضحكلها
حبِّت حكايته وحبها
حلفوا انهم هيكملوا
كانوا كل يوم بيمثلوا
روميو وجولييت والقدر
واتفرقوا
سافرت ف رحلتها الطويلة
وهو ماباليد حيلة
كان كل يوم يجمع لعبهم ف الصالون
واهله شافوا ده جنون
من يوم ماسافرت قوس قزح
بقي ناقصه لون
المكان: وسط البلد في القاهرة
أم الزمان ف حالياً
نفس المكان علي قهوة بلدي
قاعد حزين مسترخياً
كوباية شاي واتنين جنيه
وقميص كارو مكتوب عليه
انا حبيتك... سيبتيني ليه ؟
عدِّت قصاده وشبهِّت
وبعد حبة انتبِّهت
ان الزمن غيّر كتير
مش هو ده نفس الامير
ولا هي طيره
اكيد ضحك مع واحدة غيرها
وهي حبِّت حد غيره
ولّع سجارته ف الهوا
دخانته رسمتهم سوا
اتنين صغار بنت ولد
الحلم مات لما اتولد
من وقتها والقاهرة
زعلانة من وسط البلد..
