.
.
خلينا أصحاب
شايفاك انسان طيب حسّاس
راجل ورقيق
تنفع كصديق
لكن كحبيب
عمري ما فكرت
تستاهل أحسن مني كثير
والله يا واد لا هاجيبها لك
نفسنا نفرح بقى بعيالك داعيا لك
وبحبك جدا صدقني وجوايا حاجات
بس احنا إخوات
بسأل نفسي أنا حبيتها
ولا الموضوع كان كله سراب
قلت لها أنا رافض نبقى اصحاب
يا تكوني معايا يا متكونليش
كانت فاهمة إن الموقف صعب
صعب حبيبتك تتعاطف علشان تواسيك
فأخدت قرار إني انساها
من يومها وانا بدونها معاها
براقبها بعين عيل محروم
وباقول ماطلبش واكلمها
وافكر هي بتعرف مين
وبتكلم مين
وباموت لو كانت بصّالُه
أصبحنا لا ننفع متصاحبين
ولا عدنا اصحاب
وبقينا برغم اللي ما بيننا
اتنين أغراب
تسعين في المية من الأشخاص المكتئبين
بيحسوا حنين لقلوب بتحن لناس غيرهم
الواحد ضَيّع وقت كبير
مع ناس مش شاغل تفكيرهم
هذا التفكير الغير صحي
هو المتسبب في القهوة
عمر خيرت وترى جبران
وفقلب نظام النوم بالعكس
وصداع القاولون العصبي
تضييع 16 ساعة في شات
ودخولك في مشاكل وحاجات
وخروجك منك آخر الليل
هاتروح لطبيب هايبص عليك
وهايكتبلك أدوية للنوم ومسكن
ويسيبك تمشي
وهاتفضل برضه مابتنامشِ
وهايفضل جسمك بيعاندك
كل الموضوع انك عندك
متلازمة حب اللي ما حبكش
انت ماعندكش سبب عضوي
يمنع عينك تقفل لساعات
السبب الأصلي في عدم النوم
انها شايفاكوا اتنين اخوات
بالنسبة لها
هي بتعشق في اللي قتلها
في اللي ما قدَّرش ودخلها
في مساحة كبيرة من الإهمال
بتحبو بتحب جنونه وعصبيته
وتحب انه ما بيكلمهاش
مع انه مكَلِّم ناس تانيين
بتحب عدم غيرته عليها
بتحب قساوته وهي تلين
بالنسبة لها
عمرك ما هتبقي اللي في بالها
افهم يا حزين
وأعرف دستور البني ادمين
عمرك بيضيع والوضع وضيع
والعالم أجمل من غيرها
عمرك ما هتيجي في تفكيرها
مع إنك شاغل ناس تانيين
وسايبهم في الدايرة بتاعك
خلينا صحاب
داين حتدان
ومافيش مجروح ما بقاش جارح
كله بيبحث عن ألمه الخاص
وكأن الحب بدون راحة
كإن الشوق لازمه جراحه
علشان ما يروحش لناس ببلاش
اعتبرو ما جاش
ونصيحة يا ريت إن كنتوا اصحاب
خليكوا أصحاب
علشان لو قولت على مشاعرك
هاتكون بتضحي بصداقتها
وإدا فعلا فعلا حبيتها
استنى عنيها تقول قبلك
واستنى الشوق فيها يقابلك
وساعتها يجوز تمحو المسافات
فيما عدا ذلك
فانت هاتسمع أنا آه حباك
بس إحنا اخوات
