يومها ابويا قالي حاسب
لما تتكلم مع اختك
اصطفي الشكل المناسب
قولها لو مش هضايقك بعد اذنك
هي حبا فيك هتعمل
اوعى تطلب وانتا غاصب
اصطفي الشكل المناسب
اي ست بكلمة حلوة بتبقى راضية
حتى لو مكنتش فاضية
هتلاقيها بتعمل الاشياء بحب
لما تتحط في ميزان قدام عيناها
كفتك على طول تطب
اوعى تجبر واحدة تتعلق بحبك
اوعى تأذي أي واحدة بترفضك
حقها في الدنيا تختار اللي ليها
وانتا قدامك بنات الدنيا ياما
اوعى تترك في اللي مش قابلاك علامة
اوعى تغلط أو تهدد أو تقرب من السلامة
البنات زي الامانة وانتا تهديدك خيانة
حقها ترفض وجودك
وانتا متعديش حدودك
وأما تكبر اما تتجوز حبيبتك
قدم الخير هتلاقيه
امدح الحُسن اللي فيها
قولها ان الحياة مش بتكمل الا بيها
اي الجمال دا كل يوم تحلوي اكتر
الحكاية مش غرام وهيام وبس
ربنا قال في الكتاب رحمة ومودة
قال المودة يعني ضحكة يعني وردة
يعني شكلك مرهقة من الشغل جدا
مش ضروري تعملي اكل النهاردة
يعني متشكر لانك شايله همي وحاسه بيا
الهدايا والبيوت البيوت الواسعه
مش هيا القضية
الاهم الحب وسلامة النوايا
ياما رجاله بفلوسها فقرا بالغل في نفوسها
ياما رجاله مظاهر للاسف ناقصين رباية
يا ابني احترام الست مش ضعف وهزيمة
احترام الست قوة وجاه وقيمة
لما تلقي في عيناها شيله
حتى لو رافضه تبين كون حنين
خلي فتحتك للباب عليها فرحة ليها
تبقى حاسة بالأمان حتى في خصامكم
تبقى مش حاسة بسلام من غير كلامكم
واما يكبر جرح بينكم طيبو بحسن المعاشرة
مش كفاية كلام لمرة مرة تانيه خمسه عشرة
طول ما لسه كلام ما بينكم يبقى خير
وانت فاكر أن انا وامك حياتنا ماشية عال
يكش فاكر ان انا وامك حياتنا ماشيه عال
دا احنا بينا حروب تدرس في الجدال
واختلفنا بس بالوقت ائتلفنا
طحنا في الخناقات وسوقنا بس نده الحب فوقنا
الحياة من غير مشاكل شين وبايخه
كل يوم تفاح تمل وانتا عينك على اللي بينكم
اوعى يا ابني في يوم يقل لما تغلط هيا
خد وقتك في غضبك في الخروج مع ناس صحابك
فرغ الشحنه في مشاغلك
واعى تحكي سركم يفضل ما بينكم
اي واحد يسألك ليه مش معاك
قولهم مشغوله حبه عندها البيت النهاردة
اي حاجة اي حجة الا ناقص بينكم شي
وأما ترجع اوعى تخلف ظنها وتخش ساكت
بوس جبينها جفف الدمعات في عيناها
الحجات دي يا ابني حظكم
من العشرة لما يقوم خلاف
يخلص الراجل لبيته مهما لاقى
ومهما عانى ومهما شاف
حتى لو اوضه بسريرها حتى لو لقمتكم حاف
أسمى درجات الشهامه رحمتك وياها
حتى لما تغلط اعلى ايات الرجوله
احترامك ليها وقت الاختلاف
مات ابويا ولسه فيا كلامه كأنه بقاله ساعة
يعلم القادر يا ولدي يشهد الرحمن عليا
حتى يومنا عمري ما مديت ايديا
عمري ما عنفت واحدة
عمري ما هددت بيت
لسه على الوعد اللي بينا
مهما بيا العمر عدّى
كلمتك لسه في وداني
المودة المودة المودة..
