بسم الله الرحمن الرحيم
-
« بعد ايام | بيت يزن »
رفع راسه بـ انتباه لـ دخولها و اشر لها تجلس قدامه ، اقتربت منه و جلست قدامه بـ استغراب و سكتت تنتظره يحكي ، مسك جوالها اللي كان على الطاوله و مده لها ينطق : دقي على عمتي و قولي لها انك حامل
رجفت كل خليه بـ جسمها من كلامه و اتسعت عيونها بـ ذهول تنطق : الحين !؟
يزن : اجل متى ؟ اذا اجلّنا اكثر بطنك بـ يكبر وقتها بـ يعرفون بدون ما نقولهم
مدت يدها بـ تردد و اخذت الجوال منه ، تجمعت الدموع بـ محاجرها و طالعت فيه تنطق بـ نبره راجفه : يزن خايفه
انعدمت المسافه بينهم من اقترب منها و حاوط وجهها بـ يدينه ينطق : لا تخافين ، لا تخافين انا معاك ولا راح اتركك
اخذت نفس تهدي نفسها ، رفعت يدها تمسح دموعها و طالعت بـ جوالها و فتحته ، دقت على امها و ماهي الا ثواني و ردت ، اخذت نفس و رفعت الجوال لـ اذنها و نطقت : ماما
استغربت زينب نبرتها لكنّها ابتسمت تنطق : يا هلا بـ بنيتي ، سمي
لارا : ابغا اقولك شيء
زينب : قولي يا ماما
زفرت بـ توتر تنطق : انا .. انا حامل
شهقت زينب بـ فرحه تنطق : صادقه يا بنيتي ! مبروك مبرروك
لارا : ايوا صار لي اسبوعين يمكن
ضحكت زينب و نطقت بـ سعاده : ابوك و اخوانك بـ يستانسون حيل ! تعالي انتي و يزن ننتظركم
هزت راسها تنطق : ان شاء الله
قفلت و رفعت عيونها لـ يزن اللي كان ماسك يدها و شد عليها من شاف دموعها ، رفع يده و حطها خلف راسها و ضمّها لـ صدره ، مسح على شعرها و نطقت هي : سمعت ؟ تقول بـ يستانسون يا يزن !
قبّل راسها ينطق : اهدي ان شاء الله كل شيء بـ يتحسن لا شافوننا سوا مستانسين
رفعت راسها و طالعت فيه تنطق : يزن انا اسفه ، انا اعرفك انت انسان ما تقدر ولا تعرف تكذب ، انا اسفه لأني انا اللي دليتّك على هالدرب
ابتسم بـ خفه ينطق : افا نسيتي يوم كنا صغار شلون كنت اعلمك كيف تكذبين على عمي و ابوي لا سوينا مصيبه ؟
ضحكت و رفعت يدها تمسح دموعها تنطق : صح من هذاك اليوم بديت اكذب
ضحك يزن و مسح دموعها ينطق : يلا قومي اجهزي عشان نروح لـ اهلك بعدها لـ اهلي
هزت راسها بـ ' الايجاب ' و قامت تتجهز
« العصر | 4:20 »
' بيت ابو غيث '
قعدت لارا بين زينب و يزن بعد ما حطت الصينيه على الطاوله و التفتت لـ اخوانها تنطق : انتهت مُهمتي انتوا اللي بـ تقهوون
قرصتها زينب و اقتربت منها تنطق بـ همس : عيب ما يصير قومي قهوي زوجك على الاقل
لارا : ماما انس يقهويه وش المشكله
انس : انا شدخلني تراه زوجك انتي
لارا : يعني مافي اجازه لأني حامل و كذا ؟
ضحك انس و هز راسه بـ ' النفي ' ، ابتسمت لارا و قامت لكن مسكها يزن و نطق : اقعدي لا تتعبين ما ابغا اصلاً
لارا : لا شدعوه كنت امزح بعدين تراها دله ما بها شيء صعب
هز راسه بـ ' الايجاب ' و ترك يدها ، قامت لارا و اخذت الدله و صبت له تحت انظار يزن ، رفعت راسها له و ارتبكت من نظراته ، اقتربت منه و مدت له الفنجال بـ يدها الراجفه ، لاحظ رجفه يدها و مد يده بـ ياخذ الفنجال بـ سرعه لكنّه طاح من يدها ، شهقت من فعلتها و نزلت الدله بـ سرعه و مسكت يزن تنطق بـ خوف : انا اسفه يزن اسفه ما انتبهت جاك شيء !
مشاري : طاح الشر !
هز راسه بـ ' النفي ' و مسك يدها يهدي خوفها ينطق : هدي ما جاني شيء انتي جاك شيء يدك تعورت ؟
لارا : لا لا ما فيني شيء
ابتسم انس و نطق بـ ضحكه : دامكم بـ تقعدون مفهيين بـ بعض بـ تحترق كثير يا النسيب !
ابتسم غيث و اقترب من انس ينطق بـ همس : انطم
التفتت لارا على يزن تنطق : ثوبك توصخ بـ اجيب فاين انظفه
اخذت فاين و انحنت له و بدت تنظف ثوبه ، ابتسم بـ هدوء من داهمته ريحه شعرها ، غمض عيونه و اقترب منها اكثر يستنشقه ، التفتت لارا عليه وهي لا زالت مُنحنيه ، اقتربت منه اكثر تنطق بـ همس : شفيك ؟
هز راسه بـ ' النفي ' وهو مو قادر يتكلم لأنه فعلاً كان تحت تأثيرها ، استغربت تصرفاته لكنّها سكتت ، نزلت الفاين و قعدت جنبه ، استقام غيث ينطق : عن اذنكم بروح انام
التفت لـ انس يُكمل : صحيني قبل المغرب
صعد غيث لـ غرفته و التفتت لارا على يزن تنطق : بروح غرفتي اخذ لي كم غرض و اجي عشان نروح لـ عمي
هز راسه بـ ' الايجاب ' و صعدت لارا و اتجهت لـ غرفه غيث ، دقت الباب و دخلت بعد ما سمح لها غيث ، طالعت فيه و أشرت على طرف السرير تنطق : اقعد بـ نتكلم
غطى راسه بـ البطانيه ينطق : مو الحين بـ انام
اقتربت منه و سحبت البطانيه و رمتها على الكنبه ، تأفف غيث و عدل جلسته ينطق : لارا تراني ابداً ماني رايق قولي وش تبين
قعدت على الكنبه و طالعت فيه تنطق : ليش قلت لها كذا ؟
غيث : قلت لـ مين بعد
لارا : هيام !
غيث : مابي اتكلم بـ هالموضوع
لارا : غيث حبيبي لو تركز شوي بـ تفهم اني ماني قاعده اخيّرك ! تكلم اخلص
غيث : وش بـ يفيد لا تكلمت ؟ بـ تصالحيننا ؟
تنهدت لارا تنطق : علمني السالفه بـ الضبط و انا اشوف تستاهل اصالحكم ولا لا
اخذ نفس و بدا يسرد عليها القصه ، سكت شوي و كمل : بعد ما سألتها عصبت و هاوشتني و الحين رافضه تكلمني ، ما ادري وش اسوي !
مسكت راسها تحاول تخفف صدمتها و نطقت بـ نبره شبه مرتفعه : انت غبي ؟ شلون تصدق وحده زي نجود صاحي انت !
نزل راسه و حط يدينه على رجوله و مسك راسه يسمع هواش لارا له ولا نطق بـ حرف لأنها كانت صادقه بـ كل حرف تقوله ، سكتت لارا بعد ما طالعت فيه و استوعبت قد ايش هو ندمان لكن بعد ايش ؟ فات الاوان ، رفع راسه و طالع فيها و نطق : اسمعي هاوشيني قد ما تبين بس اهم شيء صالحينا ، تكفين لارا
تنهدت و هزت راسها بـ ' الايجاب ' تنطق : بـ اكلمها و اشوف
