كابوس الوله

-الكــابوس الثالــث-

#كابوس_الوله

بقلمي انا : نورمين

لا تنسون التصويت والتعليق على الفقرات + اضافة لحسابي 🤍🦋.

.....

امـير

على ثيلة احد الملاعب الرياضية، وبين زملائي اللاعبين جنة دنتدرب استعداداً للمباراة الجاية الليلة!

لانه وصلتلنا اخبار بأن اكو كشافين من الاندية الجبيرة بالدوري رح يتواجدون حتى يختارون اللواعيب البارزين ويصعدوهم لان مباراتنا اليوم وية فريق جماهيري قوي، فأعتيادي الانظار حتكون مسلطة علينا ولازم نستغل هالشي لصالحنا.

كل واحد بينه جان ديتدرب بعزيمة وهمة وكأن رح نلعب نهائي كأس العالم

لان هاي هي فرصتنا والبوابة الي من خلالها رح نكدر نعبر لاحلامنا!

اني العب بنادي متوسط الشهرة، صح قوي بس مو بقوة اندية الصف الاول!

لذلك اني اليوم ناوي اقاتل باللعب، اي لازم لحتى اثبت نفسي للكشافين واخليهم يختاروني.

صار الليل والمدرجات انترست بالجماهير المشجعة والمحبة الي دتصدح اهازيجهم بعلوٍ، داعمة النا.

ربطت قيطان حذائي، واخذت كم قفزة احماء وبداخلي ادعي
" يا الله كون وياي، خليهم يختاروني خليني احقق حلمي يا رب  "

اجة صديقي سليم من ورايه، طبطب على جتفي التفتتله، ابتسم وغنالي : اليوم يومك يا بطل اليوم تلعب جولة

بتفائل بادلته الابتسامة بسعادة وصافحت قبضات ايدينا بعضها البعض ودكيت جتفي ع جتفه.

امير: ويومك هم يا بطل

هز براسه ضاحك وكمل الاغنية وهو يأشر باصبعه كعلامة تنبيه

سليم: اليوم نگلب الدنيا اليووم

طبعاً اني وسليم اجينة سوة لهذا النادي، وصرنه اصدقاء من اول يوم، لان الكل جان بيناتهم معرفة وميانة وبس احنه الغربة فتعاملهم ويانه جان شبه رسمي بالبداية، فقوت علاقتنا ببعض وبهالاثناء صرنة ثنائي يراهن عليه المدرب بحيث اذا لعبنا نخلي الخصم يصيح يا ويلي.

اني مركزي هجوم وسليم ارتكاز.

حان وقت المباراة وبلش الفريقين يطلعون للملعب بانتظام.

وية ما داست رجلي كاع الملعب وشفت كمية الجمهور المخيف رجف گلبي وحسيت بالمسؤولية الي اني بيها، مسؤولية ان اقدم اداء زين بالمباراة مو بس علمود نفسي، وانما علمود اسعد كل فرد من افراد هالجمهور العظيم هذا

صفّر الحكم وبلشت المباراة، الاعصاب مشـدودة والضغط كلش جبير من الجمهور الحاضر

الاصوات كلش قوية بس بدل متخليك تفقد تركيزك، تخليك تندمج وتعيش حلاوة كرة القدم من صدك