اطمع للغالي و ارخص لاجلك
قروب بنات نزلوا من السياره ، دخلوا مجمع الكوفيات والمطاعم فل كشخه ميكب وشعر اللي يشوفهم يقول "مضيعين القاعه" دخلوا وهم كلهم ثقه بنفسهم ومب هامنهم اللي حولهم ، اوقفوا بوسط المجمع
الريم : اففف احس لو متصلين من قبل وحاجزين لنا طاوله ابرك بننقع الحين عادي حول الساعه عسبت طاوله
سلامه : تعرفين بالويكند جي الزحمه المفروض تكونين مهيئه نفسج للوقفه حبي
ماريه : انا عندي لكم راي شرايكم كل وحده تروح لها كوفي وتشوفون اذا شي طاوله لنا او نحجز والكوفي اللي بيدق لنا بنسير له
سلامه : يلا زين انا بسير مع ريم
ماريه : منال معاي بتسيرين؟
منال : هيه معاج
راويه : وانا بنت البطه السوده يعني وين اسير؟
سلامه : تعالي معانا
افترقوا و راحوا يتمشون من كوفي لكوفي يحجزون لهم طاوله ، بعدها تيمعوا بنفس النقطه اللي كانوا واقفين فيها
سلامه : شكلي اوكييه ولا؟
ماريه : هيه
سلامه : عيل ليش اللي وراج جي يخزني كانه في شي غلط بويهي
ماريه : اوييه شعرج طاير
سلامه : اففف من هالشعر حرقته بالاستشوار ومب راضي يستوي ستريت
راويه : عادي حلوو ستايل
الريم : اقولكم كوفي *** يدقون لي يلا خ نسير
ساروا للكوفي شافوا طاوله فاضيه لاربع اشخاص بس ، كلهم قعدوا ماعدا سلامه ، الطاولات كلها قراب من بعض مافي سبيس من بينهم الا شووي
