رقص السراب

البارت التاسع والثلاثون

روايـــــــة "رقـــــــــــــــص الســـــــــــــــراب"

بقلم اسيا الشمري
للتواصل انستا Asia__313

البارت التاسع والثلاثـون

متابعة للحساب والتصويت
والتعليق بين الفقـرات لطفآ
∞∞∞∞∞∞∞∞∞∞∞∞∞∞∞∞

"ضحــى"

حچيت بگلبي اني باقيلي 300مليون الـ15 مليون ماتسويلي شيء بس يمكن تسوي للبنى تكدر تفتحلها مشروع تعيش بي بهالمبلـغ بس هي اصلآ مريم اخذتها يعني راح تتكفل بيها واني هالمبلغ همين راح يفيدني حطيت ايديه على رأسي مااعرف شأتصـرف سُرى بقت تلح بلعت ريك حسيت نفسي اخذت قراري حچيت بتوتر
- سُرى مستحيل اخذ ذهب لبنى لو حريتي تتوقف على ذهبها همين مااخذه خلاص نرجع للأبتـزاز ونجمع المبلغ بتعبنـا

-تمام سوي اللي تريديه
بقينا كاعدين بالمطعم وسُرى تشوفني الصور اللي ماخذتهن لجنطها واحذيتها الجديدة وراها تعشينا وطلعنا نفتـر بالمولات اشتريت ملابس للبنى صارت الساعة بـالتسعة ونص حسيت رجليه تكرمت حچيت بتعب
-بعد مابيه حيل افتر راح اخابر صفاء بلكت بعده موجود

اتصلت عليه مارد اهو هذا يمكن نايم هستوني اريد اخابر على سايق الحجية اتصل عليه صفاء صوته عبالك چان نايم حچيت بخجل
-شنو بس لاكعدتك

-شعندچ وين تريدين تروحين بهالليل

-مااروح اريد ارجع

-لا تكليلي بعدچ بـرا؟

-صفاء تجي تاخذني لو لا
-جاي مسافة الطريـق
كعدنا ننتظره برا المول حچت سُرى بتعب
-مداافتهم ليش الا هالسايق چان خليتينا نأجر اي تكسي يطلع كدامنا
-هذا ثقة اني مجربتـه تريدينا نصعد ويه واحد مانعرفه الساعة بـ10 بالليل

حچت بعدم مبالاة-شنو يعني واذا صعدنا ويه سايق وطلع مو زين شيسويلنا قابل اكثر شيء يعتدي علينا

-تحچينها بكل بساطـة
-اي عادي واذا اعتدى؟شنو راح يصير يروح شرفنا واهلنا يكتلونا اشو احنا تايهات لا عدنا اهل ولا سمعـة ولا حتى شرف

خزرتها حچيت بعصبية
-لاتحچين جمع اني بعدني محافظة على نفسي

-هههههههه رحتي ضحى من اليوم اللي اخذچ عابس انتِ صرتي تنحسبين منا وبينا

-لا اني مو مثلچـن

حچتها بمسايرة-صحيح

-اللي صار بوكتها غصب عني اني مو مثلچن بأرادتي مشيت بهالطريق

-ترا اول مرة كلنـا انجبرنـا ماكو بنية تقبل شخص يعتدي عليها بس وراها تعودنا خلاص احنا هاي حياتنا ولازم نعيشها شنسوي قابل ننتحر