#بقلم_هاندا
81
⚜️⚜️⚜️
تلمو عليا كل وحدة وش تقول وانا عقلي معاه مزلت عايشة في دوك اللحظات لي جمعتنا هنا في هاد الشمبرة والكلام لي كان يقولي فيه ،دخلت جدة عيطتلي -راه عمك حاب يهدر معاك ارواحي ،رحت توالو للصالو كان مع راجل عمتي وخوالي دخلت ناضو وقعدت انا وياه قالي مبروك عليك اني رايح بصح مزالت عندي هدرة معاك يامات ونزيد نجي هنا نهدرو ونتفاهمو قتلو وشي هي الهدرة -مشي اليوم جبد سوارد عطاهملي محبيتش نحكم ولا حطهم فوق الطابة وخرج دخل راجل عمتي تان باركلي قالي عيطي لعمتك رانا رايحين، فت قلتلها زيدي ابقاي معايا اليوم قاتلك منقدرش مرة جاية نجي ونقعد راحو يروحو هما وبنت خالتي راحت مع خوها ، بقات معايا غي مرت خالي ،بدلت قشي غسلت وجهي وعاونتهم ،بعد شي ساعتين ولا غفيت منعرف شحال كنت تاعبة جابولي التلفون-هاكي راجلك يعيط هزيت عليه -الو -حبيبي راكي راقدة تعبتي اليوم-ايه بزااف -يا عمري قتلتيني اليوم مخليتيش فيا قريب هربت بيك والفحل يلحقني -ههه وشبيك مزروب هكذا -علاه لي يشوف الزين هذا يبقالو عقل انا نورمالمو يمدولي جائزة على هاد الصبر لي عندي غدوة نبدأ إجراءات تاع العقد وتعرفي حنا سلك الدولة مشي ساهلة نحاول نستعمل نفود تاعي بش منوطلوش ونجيبك عندي-اييبه ان شاء الله بصح نعترفلك بحاجة جيت تهبل اليوم متزيدش تلبس هكذا -ههه مغيارة بصح عندك الحق نستاهل -ايه متديهاش في روحك بزاااف كنت نتاستي فيك برك .....بقا يتغزل بيا حتى درت لاكام ا ل مرة نحكيو بيها شافني راقدة قالي نورمالمو راكي توالي دك انا علاه نتمحن هكذا -سكندر احكم في روحك شوي راك فضحتنا اليوم النسا كامل بقاو يشوفو معايا -وش دخلنا فيهم راهم كامل فاتو عليها وحدة متلعبهالك في جرتهم انا نحرم روحي ولا ... بعد مكملنا عيطولي للعشا نضت مدقدقة كامل تقول كانو يهرسو فيا لقيتهم دارو عشا من كل نوع على حسب قولهم بيت سكندر لي جابو هاد الخير لحم وفواكه زاد دخل خالي عبد الرزاق انا كليت خفيف برك نطقت جدة تحكي على مرت بنها لي مجاتش ومحضرتش قتلها كي مجاتش خير منحبش النفاق ربي بعتلي حبابي لي نحبهم ويحبوني عاونوني ولي ميحبنيش علاه يحضرلي ،كملنا عشانا محبتش تخليني نغسل الماعن معاها قاتلي ريحي اليوم راكي عروسة ، جاو مروحين مخلاتهمش جدة بقات موراهم معانا حتى قبلو انا فرشتلها معايا بايتين نقسرو تشايخ عالكيف حكاتلي كي تعرفت بخالي وزادت جبدتلي لساني شوي حتى رقدنا لغدوة نضنا البنات قتلهم روحو اليوم شوفو الا مكانش قراية ارجعو باسكو سمانة لجاية يعقبو داهم خالي معاه ،انا بعد محكيت مع سكندر قالي راني نجري على العقد رحت ندير الغدا درنا المفور وزدنا بيري سلايط لاسوب وكاين وش بقا من عشا البارح انا قاتلي طاطا نضيرة مدامني هنا هاتي نكتبلك لاليست تاع الجهاز بدات تكتب وتنصح ديري هادي وهادي لا المهم قدرت نهز فكرة على الجهاز هذا اما الذهب تاعنا وتاع ماما من نهار الحريق منعرف الا داب ف النار ولا الناس هزاتو من تم ولا عمي لقاه وداه المهم منعرف والو عليه بيسك ديك الفترة انا مكنتش مركزة في هاد الأمور كان عقلي مشوكي وزيد مشاكل لي صراولي تهاونت شوي حتى طمبيل بابا طيشوها للفيراي باسكو مبقا فيها مايصلح مالقري كانت جديدة وغالية نص من رزقنا داتو النار والنص سيطر عليه عمي وميهمنيش الصح ف الهنا والاستقرار ، غير كملنا جات جدة قتلها جدة الذهب وش لازم نشري راهم عندي سوارد تاع الدار بصح منيش حابة نكون أنانية حتى البنات يسالو فيهم قاتلي يماك ربي يرحمها السانتورة تاعها كانت عندي هنا وراهي مخبية والخلخال عند خالتك مبعد نعيطلها عليه -صح !-ايه زيدي اشري حاجة خفيفة برك ولي عندي انا يبقاو لخياتك مرة خلاف ....#بقلم_هاندا
82
⚜️⚜️⚜️
