#بقلم_هاندا
21
⚜️⚜️⚜️
لليل كنا ف الصالو كامل نتفرجو ف الإفتتاح ليه ليه خلاص ناضو يتعشاو طبعا انا لا قلت من بعد وكش مندير نوكل ماريا وايناس راحو وانا بقيت نتفرج ف الماتش داك ونضحك قتلوهم ب لي بيت بقيت مركزة كشما نشوف خالي ولا ف المدرجات مكنش ، شوية وجات جدة ها خالك نعتوه مت بالضحك عليها-ههه جدة علاه ينعتوه هو راه يلعب ولا قلنا بلاك تقيسو الكاميرا بصح عينيا خرجو وانا نركز مكانش -شفتها قعدت شوي وراحت قاتلي انا هادو يصدعولي راسي رايحة نتكا في شمبرتي وانتي روحي تتعشي علاه قاعدة بالشر -ايه جدة دك نوض متخميش عليا، جاو لبنات بقاو يتفرجو معايا -يالله احكمو بلايصكم مشي مليح ليكم السهرة، نطقت إيناس-اوووف كاميليا وش وليتي سامطة -والله نوضي لا نوض ليك -خلينا نتفرجو ولخرى حاطة راسها مع الفيسبوك -هايي وانتي راني نشوف فيك هادو ليام ضلي مطابسة راسك تم خير -والو اني نكوناكتي ، بقيت نشوف معاهم علابالي راهم ف المراهقة وصعيبة هاد المرحلة يااارب وقدرني عليهم -هاندا ريفالدا للقصص- غمزت لإيناس قتلها روحي طلي شوفي ديك البرميل الا كملت الماعين نروح كش مندير نوكل لا نطيحلكم هنا ،راحت وجات قاتلي الضوء طافي مكانش ، وليت نضت دخلت للكوزينة شفت فيها لامة المواعين في باسينة وحاطتهم ف بوطاجي -والله مليحة هاذي ، جبدت مقلة حطيت فيها الزيت وقليت سكالوب ،قاعدة ونوكل حتى دخل داك خوها مامبا ميديرش الحس كي يدخل هزيت طابلية درتها على راسي سمطلي الماكلة ، هو كمل خرج للحوش وانا نظت من تم رحت مين لبنات وحد الربع ساعة سمعتها هبطت هي خوها تقوم بيه واحنا تتشنف علينا ، كنت تايهة مع التلفون حتى نسمعها تعيط وتخبط في الماعين مفهمتش حتى جات توالنا قاتلي-نتي شكون قالك اقلي سكالوب -علاه -كيفاش علاه هذاك جابو قبيل سفيان وقالي ديريهلي للعشا ودك لقيتك قليتيه وهو دك يبقا بلا عشا ولا ، قتلها مكنتش نعرف بلي تاع خوك سي نو والله مايدخل فمي اصلا ليسطومة تحسست كي قلتيلي ،راحت ومزالت تهدر دك هادي بدات تلعبي على اعصابي على طرف سكالوب دارت حرب باينة تربات جيعانة. رحت موراها قتلها لوكان مجاش الليل دك نخرج ونشري، قالي هو خلاص مديريش عليها عادي -لا اسمحلي ، ولات قاتلو دك كشما نديرلك وتتمخزر فيا طلعتلها حاجبي بلي راكي قريب تتعرفي على هبالي مبقاش،-هاندا ريفالدا للقصص- خرجت مبعد سمعتها تقولو عود سباقيتي هادي ولا قالها سباقيتي و بنينة تقززت منو منعرف وش ردتلو باسكو زربت دخلت قتلهم يالله نوضو امشيو ترقدو يالله ، طفيت لاتيلي والضوء ورحت صليت ورقدت .....#بقلم_هاندا
22
⚜️⚜️⚜️
فاتو 10ايام .وحد النهار ماتت خت جدي يعني عمة ماما تسكن قريبة من بيت جدي وكانت الشتا داك النهار انا كنت في الخدمة خرجت ع 11 باسكو علابالي مكان حتى واحد ف الدار والبنات يلقاو الغدا مكانش والبرد ديت إذن ف الخدمة وخرجت في طريقي عيطلي خالي ياسين قالي راني جاي هذا وين هبطت من الطيارة -ايا مليح طريق السلامة ، شريت الخبز وسكالوب و كملت للدار فتحت الباب وطلعت حطيت ساكي نحيت خماري و لافاست وشمرت قلت نديرلهم فريت ونزيد نقلي سكالوب وانا واقفة سمعت حركة ف الدروج خفت باسكو كامل راحو نورمالمو مبعد قلت بلاك مرت خالي لي لفوق مراحتش عيطت عليها -طاطا نضيرة هادي نتي -مجاوبتنيش وليت توسويت خرجت للدروج مكانش بلاك قط هرب من الشتا جا دخل ، كملت نقلي ف الفريت زدت طرونشيت سكالوب رايحة نقليه طار ليا الزيت وطاشاني نحيت تريكو زدت سمعت تلفوني يصوني ف الشمبرة رحت كنت ب البيستي برك غير طابست نهزو سمعت باب الشمبرة كي تسكر درت بالخف شفت داك الحيوان تاع سفيان عيطت على قدي بكلمة بابا نسيت بلي بابا راح وخلاني -باباااااااا كان هاز في يدو حاجة يتكيف فيها من الصدمة قتلو -وش وش راك دير هنا -ضحكلي كي الشرير -امممم بالسيف قدرنا نوصلولك يا الزرقة -بعدنييييي، حط يدو عليا -نحي يدك نحي اخرج منا اخرج -علاه راكي تعيطي منيش رايح ناكلك-اخررررررج ،هو جاي مقدم ليا ضربتو برجلي خفت كش ميديرلي حسيت الدنيا ضياقت عليا وليت نتمنى الموت سيكر عليا الخوف بلا يديا لي كانو فشلو والرجفة لي سرات فيا -هههههه راكي ترجفي دك من قبل لاعبتها فايقة ضهرتي تعضي ومتاكليش وش رايك دك هاااا - واحد رخيس فوق مراهم مسكنينك هنا تخون في عرضهم وليد الحرام -اشششش واحد مراح يسمعك انتي جيتي برجليك مكنتش دايرك ف بروغرامي اليوم حت لقيتك هنا حبيت نلعب معاك شوي -يااا ربي وليت نخبط في راسي للحيط حتى حسيت البرودة ف جسمي كامل وطحت متغاشيا ........... نسمع في صوت إيناس وخالي عثمان ونشم ف ريحة الدوا ، فتحت عينيا لقيت روحي ف سبيطار شغل جاني الإدراك ديك اللحظة مكنتش فاهمة وش جابني هنا وليت نمس في روحي ونطل لقبت روحي لابسة تريكو تاع بيجامة من فوق ساع تفكرت ترتقت ضربة وحدة بالبكاء ووحد العجوز توالي كانت راقدة كي شافتني نبكي بقات تهدر وقيل فيقتها ، صوت شهقاتي انا كاميليا وي ضعفت هاد المرة قدرو يريبوني باسكو كنت حاطة روحي خلاص فقدت اغلى حاجة عندي تفكرتو نضت من بلاصتي وخيط سيروم ف يدي نحيتو بكل قوتي فتحت الباب لقيتهم في وجهي كامل جات إيناس هي الأولى حضنتني منيش معاها خلاص كنت نحوس على الطبيب يخبرني يفهمني برك وش صرالي وفي راسي سؤال برك جا قدم عندي خالي عثمان قالي -ادخلي دك يجي الطبيب قاتلو إيناس ندخل معاها جبدتها وسكرت الباب اول مرة يشوفوني ضعيفة هكذا .....#بقلم_هاندا
