البارت الاول
"انتو السبب، انتو السبب في اللي احنا فيه، حقيقي مش مسامحة و لا واحد فيكم."
لبست هدومي بسرعة و جريت ورا عربية الشُرطة.
"أنا أمي جوا عايزة أدخلها."
"أمك جاية فـ ايه؟"
"إيصالات أمانة."
"هتطلع على النيابة الساعة ستة، ابقي روحي ليها هناك."
"نيابة ايه بس، أمي ماعملتش حاجة."
"امشي يا حبيبتي، و ابقي شوفيها في النيابة."
وقفت قصاد القسم ماعرفتش أعمل حاجة، ده بيقولي الساعة ستة، لسه فاضل أربع ساعات!
الحيرة أكلت قلبي و دماغي، ده أنا ماعرفش أي حد مُمكن يساعدني!
ماعرفش مُحامي حتى، مش معايا حق المحامي أصلًا!
رجعت لهم البيت، لقيتهم فارشين أكل و بياكلوا.
"و الله أبوكم فعلًا خلف رجالة، أمكم هتتسجن يا رجالة!"
ماحدش رد عليا و كانوا مكملين أكل، اتغاظت منهم و دمي غلي، باردين قوي، الشرطة خدت أمهم و هما قاعدين ياكلوا!
روحت رميت الأكل من وشهم.
"اتجننتي يابت، ايه اللي عملتيه ده!"
رمزي قام زعق فيا.
"أمك هتتسجن بسببك أنت و اخواتك و قاعدين تاكلوا!"
"نعملها ايه، شوية و نطلع على النيابة نتصرف."
مجدي رد عليا و هو بيلم الأكل من على الأرض، وقتها راضي كان بيلبس.
"خلاص يا حورية، كفاية رط، أنا هلبس و هحاول أتصرف."
"أمك هتطلع على النيابة الساعة ستة يا راضي، أتصرف و رحمة أبوك!"
كل اللي حصل ده بسببهم، بسبب إن أمي بتحاول تساعدهم و هما مش عارفين يساعدوا نفسهم..
استلفت فلوس عشان تساعد رمزي يسافر، و كُل مره السفارة ترفض ورقه.
و استلفت فلوس عشان تكمل جِهاز مجدي و يتجوز لإنه خاطب ليه تلات سنين و مش عارف يتجوز.
و استلفت عشان راضي يخلص تعليمه، مصاريف جامعته كتيرة قوي.
و آخر الحكاية ماعرفتش تسدد كُل الفلوس دي، و أصحاب الإيصالات رفعوا عليها قواضي و رافضين أي مُفاوضة و عاوزين فلوسهم تحضر حالًا.
كُنت قاعدة على السرير بفكر و مش عارفة أكلم مين يقدر يساعدني.
"آلو يا حورية."
"ايوه يا غرام."
"قال يابت اللي سمعته ده!"
"سمعتي ايه؟"
"عربية الشرطة خدت طنط صفية!"
"اه يا غرام."
"طب ايه، مجدي عرف؟"
"اه عارف."
"طب ليه يا حورية، و هتعملوا ايه! أنا قولت اكلمك أنتِ أحسن ما أكلم مجدي."
"ادعي يارب نعرف نتصرف، ده حُكم محكمة و ده تنفيذ."
"تنفيذ ليه هي عملت ايه بس؟"
"ماعملتش، و الله أمي ماعملت حاجة، اقفلي يا غرام و أنا لما هتصرف هكلمك."
"كلميني لو عوزتي حاجة يابت، أنا أروح معاكِ أي حته، أنتِ عارفة."
غرام صاحبتي أنا اللي خطبتها لمجدي أخويا، أوقات بحس إني ظلمتها لما خطبتها لإنسان مش مسئول و مش عارف يجهز نفسه و بيخلي أمه تساعده.
