يادانه بعين بحارك🩵

البارت السابع

نايف بنضره لاابوه وهو يشوف الفرحه بعيونه واضحه ولو حاول يثقل لان نايف عارف

توجهه الجد بعد الغداء إلى غرفة اميره
دق الباب وفتحت له وبااستغراب:يههللا تو تنور غرفتي

رد عليها ابوها وتوجهه للكنبه يجلس عليها وحط يده وهو يربت عليها تعالي يبنتي اجلسي عندي
اميره جت وجلست عنده بنفس الاستغراب :فيك شي؟
الجد بفرحه: توقعي من تقدم لك
اميره اخذت نفس عميق وهي توقعت انه خطيب جديد وبزعل:يبهه
الجد وهو كان متوقع انها بتزعل:لا المره ذي ماهو سليمان المره ذي خالد ولد عمك
اميره وكأن احد صب عليها مويه من الصدمه:ايشش!
الجد بضحك:فكري وردي لي ترا محد يعرف غيري انا وياك وهو فكري زين لاتستعجلين
خالد زوجك من زمان وابو ولدك وولد عمك
وصدقيني تكملون بعض
طلع مع باب الغرفه وقفل الباب واميره باقي على نفس الفرحه
ماتدري المشاعر مشاعر حُب مشاعر كرهه ولا مشاعر صدمه!
استجمعت نفسها ودقت على نايف :تجهز بنروح الحين
نايف بصدمه:مو على اساس العصر !وش فيك؟
اميره بتصريف :مافيني شي بس ابغا الحق عشان نوصل بدري باقي ابغا اطبع أوراق ومعاي شغل
نايف بااستغراب:تمام تجهزي شوي وجاي

اما عند خالد الي اصلن قد روح بعد صلاة الضهر مباشره كلم عمه وجلس شوي ومسك الخط

جهزت اميره وخلصت من اغراضها وطلعت الصاله تودع ابوها
ابوها وهو يشوفها تتقدم له وهي لابسه العبايه :بتروحين الحين!! اجلسي تقهوي معنا العصر وروحي وش فيك مستعجله
اميره وهي مستعجله ماتبغى تناضر في احد وخصيصاً ابوها :لازم اوصل بدري باقي عندي أوراق اسويها .. تقدمت تبوس راسه :يله يبه مع السلامه
الاب وهو يوصيها:لااوصيك فكري بالموضوع الي قلت لك عليه فكري زييين خالد يستاهلك وانتي ماتستاهلين الا خالد
اميره وكأنها تتهرب من ابوها:ابشر
طلعت لنايف الي تضن انه مايعرف الموضوع
ركبت وهي ساكته ولا فتحت فمها بولا كلمه

نايف وهو يحرك يده قدام وجهها وهو يسوق :هييه أميره فيك شي؟
**ملاحظه ممكن تلاحظون نايف احياناً ينادي امه وابوه بااساميهم السبب انه من يومنه صغير كان يسمع الي حوله ينادونهم بااساميهم فهي مسكت معاه لين كبر احياناً يقول امي وابوي وأحيانا خالد واميره **

اميره وهي تلتفت له :انت شفيك ماتخليني حتى افكر؟
نايف وهو يصدمها:ترا اعرف وش تفكرين فيه
اميره انقلب وجهها بورطه .. اي والله كيف راح عن بالها انو خالد مستحيل يخبي عن نايف شي فما بالها بشي زي كذا .. قالت وهي تتاكد:وش افكر فيه؟
نايف ب ابتسامه :خالد .. زواج .. خطبه ..
اميره بتافف :اففف منك ومن خالد
نايف بضحك:الحين انا شدخلني !
وبمحاوله.. :تكفين وافقي حققي امنيتي اني اشوفك انتي وابوي في بيت واحد
اميره وهي تناضر فيه وبحزن ولدها ماعاش زي الناس طفوله عاديه كان متشتت احياناً عندها واحياناً عند ابوه وكان غالبية الوقت عند ابوه وكان السبب الأول لتعلق نايف بخالد
والعلاقة القويه الي بينهم والان ببداية الثلاثينات وإلى الآن ماجرب الشعور ولا جرب شعور الاخوان
:ياامي انا بس اسمع اسمه اتذكر كل شي صار معي انت ماشفت كيف انا عانيت!ينايف طفله طفله زوجوني بذا العمر بدون اي حساب بلحضة ولادتك كنت بموت متخيل !!!
اتذكر جدتك ام خالد بعد ماانتهيت من الولاده وسمحو لهم بالدخول تخيل ماشافتني حتى!
ركضت عندك وتشيلك وتزغرط واانا مااكاني كنت بموت قبل شوي حتى تعبير ماعبرتني كلمه وحده زي الحمد لله على سلامتك ماقالتها!! وش هاذا الحقد على بنت صغيره عمرها ماتعدا ال١٥ !حتى شفقه مااشفقت علي انا ينايف لو وافقت على ابوك بترجع لي المشاكل من اول وجديد يعني وانا بزر ويكرهوني فما بالك وانا كبيره!
نايف بحزن وهو يناضر باامه وهو يعرف جدته وعماته كيف: طيب ابوي وش دخله فذا كله
اميره بانفعال:ماكان يوقفهم !!!مره عمتك منيره دخلت علي الغرفه وانا نايمه خذتك وطلعت !قمت من النوم ادور لك مالقيتك انهرت كيف وين راح ولدي !قمت ادور في البيت زي المجنونه عليك جت جدتك تهاوشني وشوي وبتضربني وتقول ليه تصايحين في البيت الولد عمته أخذته معاه في بيتها زوجها يبغى يسلم عليه !!متخيل كانت تقولها وبكل برود انا هنا عصبت ولاكن ماكان لي لاحول ولاقوه ماقدرت اقول شي ماكان علي الا اني اكمل بكا
جا ابوك وكان عمره وقتها ١٩ وكان توه داخل العسكريه تخيل قامت امه تقوله وبكل براءه ولدك خذته عمته بيتها وشوي بترجعه زوجها بيسلم عليه بس ..وقام هو يناضر فيني ليش ابكي !
وسئلني شفيك تخيل ينايف جيت بقوله الا وتسكتني!تقول مافيها الا الدلع زعلت ان عمته خذته تقدم عندي وقالي خلاص اطلعي الغرفه مارح يتأخر !
وبحزن..ماتحملت ولله ماتحملت اتصلت على ابوي وقتها بالتلفون وعلمته يجي ياخذني لان معد اقدر اكثر من كذا وانتضرت لين جيت واخذتك
اذكر ذاك المره لما قلت اني اتصلت على ابوي ومعد ابغى اجلس هنا تكلمت عمتك اول ماجت
وبرود ولا كاانها اخذتك مني بدون استئذان وهي اصلن داخله غرفتنا وانا نايمه ولا وزود سرقتك .. اميره وهي تقلدها بغبنه:والله مافيك الا الدلع روحي بيت ابوك فكه وترا الولد جالس عندنا ان شاءالله يتربى مع ابوه اما انتي بزر ماتعرفين تربين لو انك ام صدق كان حسيتي فيني يوم أخذته!!!
اميره والدموع في عيونها :تخيل كانت تقولي كذا!!