علمتنا الشمس نرضا بالرحيل

14

ناظره بدر: نسيت اني اتصلت في يوم عرسك بعد الحادث والعمليات الكثير اللي خضعت لها وانت شنو رديت؟
جاسم يحاول يتذكر: شنو؟
ابتسم بدر: مين بدر؟ ماعندي أخ اسمه بدر...
ارتخت ملامح جاسم بصدمة يتذكر كلامه لِـ بدر بصوت مُتعب ومُنهك من تأثير البنج والعمليات عليه ومحد من أهله وصل لأن الحادث صار فجأة والرحلة تستغرق ساعات، عيونه ضريرة ما يشوف شيء كل اللي يتذكره رسالة شوق انها بتتزوج اخوه وانهت العلاقة، طلب من الممرضة تفتح جواله وتتصل بأسم شخص مُسجل بلقب "أخوي جاسم"
بعد عدة محاولات رد جاسم على الرقم الغريب اللي ازعجه: الو من معاي؟
عقد حاجبه بدر وضيق عيونه الضريرة: مو حافظ رقمي؟
استغرب جاسم اللي كان جالس باليخت مع اصدقاءه وفاتح سبيكر يلعب بلوت مو فاضي يمسك الجوال: من انت؟
تنهد بدر بحسرة: انا بدر، أخوك بدر..
اصدقاء جاسم لفوا عليه يناظرونه باستغراب وتعجب
بلع ريقه جاسم ورمى الأوراق من يده: مين بدر؟ ماعندي أخ اسمه بدر..
قفل جاسم الخط بوجه بدر وناظر اصدقاءه: شكله مغلط
كمل لعبته ببرود، سمع من عمته ان اخوه سوا حادث وبتسافر تروح له امريكا اليوم لكن استغرب من اتصال بدر فيه، تجاهل الاتصال تماماً في ظِل نظرات تعجب ودهشة من اصدقاءه

قاطع شرود جاسم صوت سهيل: خير شفيكم شصاير؟
ناظر ابوه ينزل ومعاه هاجر والبنات كلهم
عزيز اللي كان توه يدخل البيت انصدم من المنظر، جاسم ماسك بدر من ياقته يتهدد وبدر مستسلم له ببرود وشمس تحاول تفك بينهم...و شوق مرمية على الأرض
صرخت عَالية: جاسم وخر عن بدر!
رد جاسم بنفس الصراخ: للحين تدافعين عنه؟
رفعت حاجبها عَالية: بدر حشم نفسه وحشمك وحشم زوجتك اللي ما تستاهل الحشيمة سنين...
شوق تبكي وقربت منها هاجر: قومي يا شوق فهميني شصاير
صرخت عَالية: وخري عنها! صرعتينا بنت سالم وبنت سالم اخرتها تدخل غرفة اخو زوجها بالخش والدس؟ قليلة أدب
بعدت هاجر عن شوق بصدمة: شنو تقولين يا عَالية!!
شمس تناظر هاجر بشماتة: اشوف ما عرفتي تختارين، بنت الحسب والنسب طلعت تلعب بذيلها من وراج!
جاسم فك قبضته من بدر وقرب يرفع شوق من الأرض يصرخ بوجهها: بحياتي ما مديت ايدي على بنت، خلي أبوج يتفاهم معاج...
سحبها قدامها مثل اللي يسحب أضحية العيد لأجلها، شوق كانت مرعوبة تعرف ان ابوها راح يذبحها مافيها كلام..مستحيل يخليها عايشة، على انها كانت تعشق وتتمعشق في امريكا وتزوجت وانسترت لكنها ما رضت بالستر ورجعت تحوم حول حبيبها السابق وتحاول تسترجعه وهي على ذمة شخص ثاني
ناظرت شمس اللي تنظر لها ببرود ولوحت لها بهدوء: باي
انهارت شوق وهي تركب السيارة مع جاسم يبتعدون عن القصر
حاولت تبرر لنفسها: والله شمس لعبت علي يا جاسم
ناظرها بحدة: شمس؟ هي اللي قالتلج تروحين تحضنين اخوي؟ انا شفت بعيني وسمعت كل شيء..
قاطعته: انا والله...ماعرف
صرخ عليها: اسكتي مابي ابتلش فيج!
استغفر ربه وضرب الدركسون بقوة وشوق خافت وبلعت لسانها وحضنت نفسها تبكي بدون صوت..
وصلوا قصر سالم ابو شوق ودخل جاسم للحديقة بدون مقدمات دق هرن وأزعج اهل البيت لين طلعوا له
طلع سالم بثوب النوم مستغرب ونزل له جاسم: عسى ما شر يا جاسم شعندكم؟
سالم يناظر بنته منهارة في السيارة: شفيها شوق؟
رفع حاجبه جاسم: هذي بنتك خلها عندك ولا تشوفها عيني ولا راح ارتكب فيها جريمة يا عمي! وورقة طلاقها بتوصلها
توسعت عيون سالم بصدمة: شتقول يا جاسم؟ تعوذ من ابليس اي طلاق واي جريمة؟
رد جاسم يقاطع سالم: بنتك تخونني! وفي بيتي!! عينها على أخوي قدام عيني شفتها وسمعتها! خذ بنتك ولا تشوفها عيني
انصدم سالم يناظر شوق بذهول، جاسم فتح باب السيارة يحاول يسحب شوق وينزلها شوق تعلقت بجاسم ونزلت عند رجوله: تكفى لا تخليني عنده والله يذبحني..ابوس ريولك
جاسم رفع صوته: وقفي!!
ما سمعته شوق وتعلقت برجوله تشوفه يجر نفسه يبتعد عنها لكنها ترفض تتركه: عشان ولدنا سهيل تكفى لا تخليني
ضحك جاسم بسخرية: توج تعرفين ان عندج ولد؟ عمره سنتين ولا مرة اهتميتي فيه..تحملتج عشان تجازيني بسواد الوجه؟ ذلفي عني
قرب سالم يداري سواد وجهه وسحب شوق بقوة يبعدها عن جاسم ناظرته شوق تبكي: يبه انا ما سويت شيء..
سالم بدون تردد صفقها كف قوي طاحت على الأرض من قوته، تناظر جاسم وتستنجد فيه: جااااسم لا تخلينيي تكفى
أبوها سحبها من شعرها: ادخلي سودتي وجهي الله ياخذج
جاسم يشوف سالم يسحبها من شعرها ويدخلها البيت، ركب سيارته وحرك ما يشوف طريقه ولا يدري وجهته وين، قلبه انقبض بقهر وحزن البنت اللي عطاها كل ما يملك وتحمل برودها وصدها وسوء تعاملها ويعذرها في كل مرة تطلع ماتحبه اصلاً؟ وعينها على أخوه وماضيها معاه...