#عرضت_عليك_نفسي_فهل_تقبل_ان_اكون_زوجة_لك
🚬مـــروى
اصبحنا واصبح الملك لله
ناضت تململ في بلاصتها فاتحة عين وغالقة عين مخسرة ملامحها وعابسة بوجها الطفولي وهيا تتفكر بلي عندها ساعتين تيدي... واش يعقب هوملها... نفضت لمخدة من عليها وناضت... تعدات طول لدوش عملت روتينها وغسلت وجها... هزات راسها للمرايا تشوف في وجها كيف ولى هزات يديها وحطاتها تحت عينها تشوف اذا نضولها هلات سوداء ولا نو ... تبسمت وقت لقاتهم مكانش.... طيشت لروحها بوسة في لهواء ... ونطقت
جنة: خمسة وخموس عليك...
تعدات للماريو حطات يديها على خصرها وهيا تخمم واش تلبس حتى طاحت عينها على تريكو بلو نوي طايح على لكتاف مع سروال جينز... عملت ضفرات لشعرها ورجعتهم لقدام... خلات وجها بدون مايكب... لبست سبدريلة في رجلها وهزات صاكها وهبطت طايرة في دروج... تعدات طول للكوينة لقات امها... صاي توجد في لفطور... وهيا تجي وراها... باستها على غفلة على خدها... حتى فجعتها تهزت وتنفظت من بلاصتها...
مريم: قداش من مرة نقولك عود دير الحس وقت تدخل..
جنة: ضحكت عليها.. وهيا تتدومر علاها... قول سخيلتيني حبيب القلب صلوحي وطلعتلها حواجبها...
مريم: هزات يديها فيها سربيتة... راح تضربها... على لخر هربتلها...
جنة: مش كل مرة... هزات كروصا وخرجت تضحك... خلات امها من وراها تسب وتعاير فيها..
كملت خرجت لبرى وهيا تجري راح علاها طوبيس... ضربت رجليها في الارض وكملت مشي على رجلها... وهيا تتمنظر مع خلق ربي... كل واحد واش خلقت فيه عيب... حتى وصلت للجامعة... ماكنتش بعيدة عليهم برشا... لقات احلام صاحبتها... تستنى فيها...شافت معاها من فوق لتحت على لبستها....كانت ليوم تاني منحياتو...
راحت ليها تجري... كانو خلاص بداو يدخلو... سلمو على بعضاهم...
احلام: بففف ديما روطار انت
جنة: اسكتي برك راح عليا طوبيس...وزيد باين النهار من اول كيف راح يكون... بففف على صباح عند هذيك الماسطة كون نصيب مانجيش
احلام:هيا ازربي...لوكان ندخلو من وراها تجيبنا لبرا
جنة: هزات كتافها ودخلو قعدت في بلاصتها كيف العادة حطات يديها على خذيها حتى فجأة جا في بالها تبسمت وضربت جبهتها... على تفكيرها...
شافت فيها احلام بالنص عين ودورت راسها بلا حولة ولا قوة...
ْقاعد مقابل المدير... يعمل في اخر الاجراءات لحتى ينتقل لهنا... كان تافقو على كل شيء...كانت هذي اول مرة يوافق انو يجي يدير محاضرات لهنا فالجامعة... تخص الشريعة الاسلامية كالمتطوع...
تافقو على الوقت واليوم لي يجي فيه واي واحد يحب يسجل كانت حصة خاصة ومبادرة من الجامعة... انها تفتح مناقشات ومحضارات على الدين الإسلامي....
خرجت من لكلاسة... طافية بعد ساعتين قراية كاملة... ماتنفستش حتى دقيقة...
حتى هزات عينيها وهيا تشوفو قدامها كان مقابلها يسلم على لمدير بعد ماانهى معاه الاجتماع.. وهيا تشرع عينيها فيه...
هزات يديها وحكت عينيها ورجعت فتحتهم لقاتو مكانش... ضربت خذها بكف لحتي تيفق... اكيد تتخيل فيه... والا واش راح يجيبو لهنا...
حتى جبدت احلام من يديها...
جنة: اشرتلها وين كان واقف... ماشفتي حتى واحد لهنا واقف مع مدير
احلام: بعدم فهم كيفاش... واش لي راح نشوفو زعما
جنة: اكيد كنت نتخيل... زعما نوصل لهذي الدرجة نشوفو وانا فاتحة عينيا... لالا ياربي اوفف جنيت واقيلة
احلام: تشوف معاها ومافهمة شيء...لالا مش واقيلة جنيتي مافيهاش شك... امشي... امشي قدامي... يتبع
أنت تقرأ
عرضت_عليك_نفسي_فهل_تقبل_ان_اكون_زوجة_لك
Romanceولنـا فـي الحـلال لقــاء " 🍂مقدمة🍂 ثـم قـال لهـا : أعِدکِ أن أكون لكِ السند والرفيق ولكن إياكي أن يمتلئ قلبُكِ بيّ فـَ أنا وغيري إلى زوال وإعلمي أن اللّه يغار عَـ قلوب عِبادِه. فـَ إذا شعَرتي بأن حُبًا دُنياوياً ملأ القلب وَفااض ! فاهربـي إلى اللّ...
