واگفة بعز الشمس گدام بناية قيد الأنشاء ومنتَچية على گواني الأسمنت انتظر سيارة تكسي تچي تاخذي للمكان الأشتغل بي..كاضة جنطتي مِنا وتَلفوني منا أگلب بي حتى اضيع وگت، فعلت نت الشريحة ودخلت على تطبيق الانستا تحديداً حسابي المتواضع الي يتابعه 42 متابع ..
گصيت صورة لگواني الأسمنت ونشرتها كاتبة
{شرايكم اعوف التمريض والتجئ للعمالة😂!}
ابتسمت على الفكرة وطلعت من صفحة الحساب ودخلت على صفحة الريلز اگلب بيها
قرآبة الخمس دقائق انا اتصفح بالانستا الى ان انتبهت على الساعة ولگتها بـ 7:44
مابقة شي على الدوام وانا بعدني انتظر رحمة اللّٰه تنزل علي ويچيلي التكسي.
انتظرت هواي بس مااجة التكسي فـتركته ورحت اتمشة للمحل.
مشيت قرآبة الربع ساعة ووصلت متأخرة بِفارق دقيقتين لكن صاحبة المكان الأشتغل بي طَيبة وماتهتم لو تأخرت اكثر العشر دقائق؛ لان عادة ماكو زبائن ساعة 8 الصبح!
دخلت للمحل وسلمت على صاحبه'سِت وسن'
لبست السترة الخاصة بالمحل كونه محل ملابس چبير ومعروف.
طلعت باچ الشغل من چنطتي ولبستة وبديت ارتب الملابس المْخربطة .
صاحتلي ست وسن من مكان الكاشير گايلة:
وسن: زَينب شوفي بالمخزن قطع فساتين اجت امس طلعيها وخليها بدل القطع المخلصة قياساتها.
رديتلها بـاي ورحت اسوي الي طلبته مني.
صحيح! بدايةً انا اسمي زينب واشتغل بمحل ملابس معروف ببغداد، راتبي متوسط الحمدالله وساد نفقات معيشتي.
انا يتيمه الأهل..قبل خمس سنوات تقريباً توفوا اهلي بحادث سيارة..ابوي، امي واخوي الصغير.
عندي خالة وحدة اسمها مها وعندها وَلَدين كبار بالعمر حسب مااتذكر اكبر مني بخمس سنوات،
ماعندي عمات وعندي ثلاث عمام واحد منهم مسافر خارج العراق مااعرف عنه شي.
والثاني عايش بغير محافظة والثالث موجود بنفس محافظتي وعندة اولاد وبنات خير من الله لدرجة مااعرف اسماءهم؛ متزوج ثلاثة.
اهلي من توفوا عمري ١٥ سنة، خالتي مها مارادت تاخذني علمود اولادها وحسب ماگالت بذاك الوگت:
انا مرة اخاف على اولادي، يعني بأختصار تدري انو اولادها طايحين حظ ومايتأمن بيهم وحتى لو رادت تاخذني انا ارفض.
بقالي عمامي الأثنين العايش بغير محافظة گال مااگدر اتحمل تكاليفها خصوصا ان هي بنية، والثالث گال نسواني ماتريدها.
بأختصار محد رادني!..لهذا وبگل بساطة اخذتني مرة چبيرة تعودلنا بس من بعيد، رجلها متوفي وماعدها اولاد فـمن سمعت بيَة اخذتني يمها.
أنت تقرأ
أحبيني
Fantasyعذراً عزيزي المشاهد 🖐🏻:- هُنالك بعض الملاحظات التي يجب عليك ان تعرفها قبل ان تبدأ بالقراءة واعطاء الرأي: ∆القصة خيالية! اكرر خيالية! لاتمس للواقع بِصلة عدى ان بعض الشخصيات حقيقية! . ∆لا تبدأ بالسبِ او الشتم لان هذا سَينُزل من قِيمتكَ لا اكثر. ∆...
