رواية روح الابهر
الكاتبة سواد
....
روح : صرخت بأعلى صوت ما بكيفكمم
الجد : صمي حلكج وعيب عليج تعلين صوتج وعمامج كاعدين
الاب : كومي اخذي بنتج
الام : صار امشي ماما روح وياي
اخذتها لان اعرف بيهم ما عدهم تفاهم نهائي وخفت لا يضربوها
روح : ماما شنو هذا الكلام صحيح الي حجا جدووو
الام : للاسف صحيح
روح : لاا ماما مستحيل شلون تسوون هيجي بيه اني بنتكم ماما حرام هيجي ما يصيرر
الام : هدي حبيبتي وهذا هو اسمعي كلام ابوج فهمتيني
روح : صرخت بوجه امي لاا ماكوو ما اقبل
الام : ضربتها
هاي حتى تتعلمين شلون تحجين ويا امج انطيتج مجال كثير بس مال تكفين بوجهي وتصيحين ما اسكتلج
روح : انصدمت معقولة هاي نفسها امي ضربتني وانسطلت ما اعرف شسوي بجيت وتندمت لان عرفت عمامي لو بقيت ما اعرفهم احسن
ما دار بين ابو روح والجد
الاب : يايع مو هيجي تحجي وياها
الجد : لعد شتريد اخذها بحضني هي هاي تربيتك بنتك تكف بوجه جدها وتصيح زلم شكبرها ما سوتها
الاب : يابه صغيرة اعذرهااا
الجد : بالحق يا وليدي معلمها تحترم الأكبر منها
الاب : معلمها والله بس هي ما تريد تزوج شلون
الجد : نحن من ايمت نمشي بشور النسوان هاااا
شوف كلمتي وحده وما تنعاد روح تبقى هنا يعني تبقى وما تزوج الا ابن عمها عمر فهمت
الاب : طلعت وعفته رحت لروح
بنتي افتحي الباب
روح : بقيت ابجي وحدي اجه بابا يريد يفوت بس الباب مقفول
بابا روحح لو صدك اني بنتك ما تجبرني
الاب : بنت الخاطر ابوج
روح : يابه كافي خلي نرجع البيتنا
الاب : تبشرين هسه نرجع بس افتحي الباب
روح : فتحته ورحت بحضن بابا
الاب : اشش كافي تبجين
وهسه نرجع للبيت
روح : اخذنا اغراضنا ورجعنا وقبل لا نطلع جدو صاح
الجد : انتو رايحين وروح وياكم بس ثقي بالله ييجي يوم نجيبج هنا غصب عنج
روح : طلعت ركض وعفت اهلي جوا انضربت بواحد ضخم شفته هذا نفسه الي جاب الاندومي الي
كتله العفو ردت امشي سحبني لناهية البيت اكو حديقة
ابهر : جدي كال خلي تجتمع العائلة حتى يتم الصلح بس جان شرط جدي روح تزوج عمر وهاي صرخت بأعلى صوته وكالت ما بكيفكمم جدي تخبل عليها اخذتها امها وبقينا كاعدين وجدي رزل عمي من وراها لسان شطوله طلعت وعفتهم ما الي خلك ورجع الراس مريت من يم غرفتهم وسمعت مرت عمي تكللها لا تعلين صوتج عيب وهي وكفت بوجه مرت عمي تصيح ضربتها وهاي وكعت بالكاع وتبجي انقهرت عليها بس ما بيدي شي تبقى بنت عمي ومن عرضي ما اقبل تنغصب واعرف عمر واحد كلب وهو ورا هذا الشي كله راح عمي عليها وطلعت وياا والبيتهم تريد تروح جنت برى وسمعت صوت صياحهم فتت وانضربت بوحده عرفتها روح جانت تبجي وكالت العفو سحبتها لنهاية البيت كتلها شبيج تبجين
روح : جدي يريد يزوجني غصب عني
ابهر : المنو يزوجج
روح : معرف واحد اسمه عمر
ابهر : كل عقلة يحجي جدي هذا واحد سكير وحيوان
روح : ببكاء والله لو اموت ما تزوجه ولسه ما يعرفون روح
ابهر : شسوين يعني
روح : ما يخصك
ابهر : لسانج
روح : ما رديت مشيت وعفته رجعنا البيتنا ونسيت كلام جدي وبقيت اسبوع ما احجي ويا اهلي ولا اكل وياهم بلشت امتحانات اخر السنة وبديت ادرس وعفت كلشي ونسيت كلشي ورجعت علاقتي طبيعية ويا اهلي نجحت من الخامس ودرست سادس وصلت الامتحانات الوزارية و اجه اليوم المشؤوم والمصيبة الوكعت على راسي يوم موت اهلي كلهم
.......
نرجع للاحداث
روح : بقيت ابجي واصرخ بس ماكو فائدة اجو عمامي ونسوانهم وعماتي وولدهم كلهم اجوو بس اني احس بفراغ احس بروحي وحيده بقيت وحدي بدون اهل منو الي
بقيت صافنه بالفراغ لحد ما شفت قبس
واجت ركض حضنتني واني بقيت ابجي واكللها قبس عافوني بقيت وحدي
قبس : لا تحجين هيجي يروحي واني ومنار وامي وين رحنا كلنا وياج يعمري كافي بجي
منار : وضع روح يبجي الصخر كل انقهرت عليها وجدي كال بس تخلص الفاتحه نرجع للبصرة وروح ويانا
ام ابهر : يمه روح كومي وياي خلي احطلج اكل
روح : ما اريد
قبس : بس يروحي ما يصير هيجي تبقين بدون اكل
روح : خليني بلا اكل بلكي اموت والحك اهلي
ام ابهر : لا يمه نا يصير هيجي تحجين كلنا على هذا الطريق
ابهر : انصدمت بخبر موت عمي وبقت بس روح هاي شلون تعيش وحدها شلون محد بقالها رحنا لبغداد وسوينا الفاتحه فتت جوا شفت روح تعبانه مو نفسها الشفتها قبل سنة ونص كتلها البقاء لله ما ردت عليا عذرتها حالتها حيل مو تمام رحنا ندفن اهلها وهاي تلطم وتبجي شسوت بروحها الا سحبتها عمتي بيداء هي والبنات حالها يبجي الصخر بس هذا امر الله ما بيدنا شي بقينا هناك لحد ما خلصت الفاتحه وجدي كال نرجع للبصرة
الجد : بويه روح باجر نرجع للبصرة وانتِ ويانا
روح : اني ما اجي وياكم اريدد ابقى ببيت بابا
الجد. : لا بويه تجين ويانا
روح : جدو الله يخليك خليني وحدي ببيتنا
الجد. : بلا لغوه زايده وتجين ويانا فهمتي لو لا ما ناقص بس نمشي بشور النسوان
روح : بقيت ابجي شلون يعني هسه بقيت تحت رحمتهم
قبس : لا تبجين يروحي الله يرحمهم
روح : حبابه احجي وياهم اريد ابقى بيتنا
منار : لا روح تعالي ويانا على الاقل نحن وياج هناك
قبس : اي صح على الاقل نحن وياج
روح : عفتهم ورحت لغرفة اهلي وأتذكر سوالفهم وضحكهم زعلهم وكلشي بقيت ابجي لحد ما نمت على تختهم
رسل : ضلينا ندور لـ روح وماكو
ابهر : ما معقولة طلعت من البيت شوفوها زين
رسل : ابهر ماكو والله
قبس : اخاف طلعت وما شفناها
ابهر : شوفها اخاف بغرفة عمي
منار : هسه اشوف
فتحت الباب شفتها نايمه وجانت تبجي الدموع ناشفه على خدها انقهرت على منظرها عافوها وراحو تيتمت على صغر شنو شفتي من حياتج روح حتى هيجي يصير بيج بعدين تعوذت الشيطان وكلت هذا قدرهم الله كاتب هيجي طلعت وعفتها نايمه
ابهر : ها وينها
منار : نايمه بغرفة عمي
ابهر : اي الحمدلله ديرو بالكم عليها لا تسوي شي بروحها
عفتهم وطلعت واني افكر شراح يسوي بيها جدي اذا ما قبلت تزوج عمر
العم علي : بويه لا تجبر روح على عمر بعد جرحها جديد على اهلها ولا تنسى صارت يتيمة
الجد : جاي تعلمني شلون اتعامل وياها
العم علي : لا بويه بس هي بعدها صغيره وحزنانه على اهلها خليها تعيش ويانا وتاخذ الحنيه من عدنا
الجد : اكيد تعيش ويانا وما تزوج لحد ما اني اكول
العم علي : طلعت وعفته ما يجوز الا يخلي البنت تهج ساعتها يرتاح
ابهر : شفت ابويه طلع من يم جدي
ها يابه شبي جدي
العم علي : والله يا بويه جدك ناوي يموت البنت
ابهر : شنو
العم علي : اي والله
ابهر : يابه غلط هيجي وجدي من يوم يومه يريد ياخذها العمر وعمي الله يرحمه ما يريدها العمر وحجيت ويا قبل لا يرجعون لبيتهم
العم علي : شحجه وياك
ابهر : كال
شوف ابني اريدك انت تاخذ روح ما امن عليها الا عندك لان اعرفك غير عن اهلي كلهم وجدك يريد يجبرها على عمر وانت تعرف عمر شلونه سوالفه مكسرة وابد ما خوش ولد وبالحيف هو محسوب على الزلم
ابهر : بس عمي اذا هي ما رايدتني شلون
كللها هاي وصيت ابوج واذا متت انت تاخذها وتحافظ عليها اما اذا بقيت عايش والاعمار بيد الله ازفها الك بيدي
اوعدني تاخذها ابهر وريح كلبي
ابهر : ان شاء الله عمي بعون الله صارت بامانتي
العم علي : معناته انت تاخذها ماكو غير حجي عمك حطها امانه عندك دير بالك عليها وليدي وهي بنت يتيمه وصغيرة
ابهر : بعيوني يابه
رحت ادخن وافكر بكلام ابويه وعمي شلون راح اخذها وهي ما راضيه بس ولو كان هاي وصيه عمي ولازم احافظ عليها مستحيل اخلي احد غيري ياخذها
قبس : ماما روح تجي ويانا اكيد
ام ابهر : اي يمه چا وين تروح
قبس : بس هي ما راضيه
ام ابهر : ترضى يمه غير نحن اهلها
منار : بس جدو حيل قاسي وياها ورايد يجبرها على الزواج
ام ابهر : هذا جدج بعد شنسووي ما بيدنا شي
روح : كعدت الصبح تقريباً بالـ9 لكيتهم كاعدين كلهم
طلعت وشفت جدو كاعد كال
الجد : يلا بويه تريكي حتى نمشي
روح : بس
الجد : بدون بس اسمعي الكلمه
روح : عفتهم وفتت لبست عباه وشال اسود وطلعت وكلهم لابسين بقيت بس اني اخذت الاغراض اللي احتاجها وملابس وطلعنا سلمت امري بيد رب العالمين نفسيتي تعبت كلش من بعد موت اهلي وحاسه بفراغ بداخلي رغم كلهم وياي بس احس نفسي غريبة عنهم مو منهم ولا مثلهم ناس عصبية وهمجيه بابا الله يرحمه ابد ما جان مثلهم
الطريق من بغداد للبصرة طويل حطيت راسي على الجام وغمضت عيوني اريد انعزل عن العالم ما اريد اشوف احد اريد اهلي وبس اريد اكعد كون هذا حلم والكي اهلي يمي بقيت اتأمل
ابهر : طلعو كلهم وروح وياهم تبين صغيرة لان ناعمه وضعيفه صعدت ورا وحطت راسها على الجام وغمضت عيونها واضح عليها التعب بقيت امشي لحد ما وصلت مطعم وخابرت ابوي كتله ناخذ استراحة غدا
وكفت سيارتي وسيارة ابوي ونزلنا كلنا
روح : جنت بعالم ثاني لحد ما حسيت قبس تكلي كومي ننزل سالتها وين كالت للمطعم ما أشتهي كلشي اكل احس نفسي بس اريد اتقيء بس ما ملكلة شي غير المي وغصب عني شربت
ابهر : ادحك عليها صافنه وعيونها مدمعه بقيت ساكت وجدي اجه سحبها من أيدها
الجد : يلا بويه امشي اكلي
روح : ما أشتهي
الجد : لا بويه ما يصير هيجي تسوين بروحج
ام ابهر : يلا يمه تعالي يمي
روح : رحت كعدت يمها وطلبو اكل مشويات
منار : صافنه بـ روح شكد تعذبت وهي بهل عمر الله يقويها
قبس : منار لا تصفنين اكلي احسن ما نترزل
منار : صافنه بـ روح شلون تعبانه
قبس : الله يعينها والله تبجي الصخر
روح : اجه الاكل وبدو ياكلون الا اني ما اشتهي أي شي
الجد : اكلي بويه لا تصفنين
روح : جدو والله ما اريد
الجد : الخاطر اهلج
روح : دمعت عيني لمن جاب سيرة اهلي اكلت شويه وبعد اللكمه بحلكي وحسيت راح اتقيء كمت ركض للحمام
ابهر : فتنا كعدنا و روح كعدت يم امي وجدي ضغط عليها حتى تاكل وهاي كبل ركضت للحمام راحت قبس وراها جابتها وجها اصفر وكوه تمشي....
أنت تقرأ
روح الابهر
Fantasyقد كسَّر البعدُ أغصانًا لنا يبسَتْ وجففَ الشوقُ نهرًا كان يروينا كنا وكنتم وكان الحبُّ يجمعُنا فهل تعيدُ لنا الأيامُ ماضينا .
