خاطفي هو منقذي (الجزء الثاني)

البارت التاسع

هلو قلبوشاتي🦋
خاطفي_هو_منقذي.

و يطَشَرني التَعَبْ و عيْونَك تلّمنِي.
♡♡♡♡♡♡♡♡♡♡♡
زينب: يابةةةة الله يخليك لا تكسرنييي شسوييي اني شسويييي افهمو هو عندة وحدة بحياتة.
تاليا: ركضنا كلنا فوك خفنا لا سوت شي بنفسها فتحت باب شفتهه واكعة بل كاع و تبجي.
-زينب حبيبتي ليش هيج تسوين ياروحي.
زينب: تالو الله يخليج احجي ويا فهمي ماكاعد يفهموني.
تاليا: جيبي تلفون و كومي غسلي، سمر ساعديهه فدوة.
سمر: اي اي كومي حبيبتي كومي كولي يا الله.
تاليا طلعت من غرفة شفت شباب كلهم على درج شفت تلفون بعدة اتصال مفتوح خليتة على اذني و جاوبت
-الو مرحبا عمو.
ابو زينب: هلا منو انتي؟
تاليا: اني صديقتها بل جامعة عمو اريد احجي وياك بس اريد تسمعني للأخير ولا تقاطعني.
ابو زينب: كولي اسمعج.
تاليا: عمو اليوم زينب اجتي و جانت مو تمام سألتها شبيج و كالتلي على موضوع زواج من ابن عمها شوف اني قنعتها تتزوج و ما تكسر كلامك بس لوووو تعرف شنو صار عمو.
ابو زينب: شنو صار؟
تاليا: كعدت بل صالة و شباب كلهم مقابيلي شفت زينب و سمر نزلو كعدو بصفي و اني كملت كلامي.
-عمو زينب اقتنعت تتزوج محمد بس ياعمو من طلعنا من محاضرة ما اشوفلك غير محمد جاي و ايد بإيد هو و فد بنية.
ابو زينب: منو بنية؟
تاليا: سويتة سبيكر و كملت كلامي، اي عمو هو زينب راحت سألتة منو هاي بنية كاللهه هاي حبيبتي و تاج راسج عمو زينب كالتلة زين مو راح نزوج شلون تجيب حبيبتك كدامي هو كاللهه ارفضيني خلي ابوج يفك ياخة مني ترة زودها.
ابو زينب: هاي محمد هيج حجة علية؟
تاليا: عمو اذا ما تصدكني عندي شاهدين، باوعت للشباب كلهم مصدومين.
ابو زينب: لا عمو اصدكج اي كملي.
تاليا: اي عمو ف زينب ما قبلت عليك هل حجي رادت تروح بإحترام اشو هذا جرهه و طاب ركعهه راشدي الجامعة و خلق الله كلها التمو علينة.
ابو زينب: شنوووو رفع ايدة عليهه اني ما رافع ايدي هو شلون يرفعها.
تاليا: اي عمو لو تشوف حلكهه صار ينزف كوة وكفنا نزيف خطية جبتها يمي شكد جبرتها تاكل ما اكلت من صبح ما حاطة شي بحلكهه، رفع عيوني شفتهم كلهم فاتحين حلكهم.
ابو زينب: بنتي خليها تاكل انتي مو صديقتها جربي وياهه اقنعيهه.
تاليا: سويت نفسي ابجي، عمو ماكملت عمو لو تعرف شنو صار بعدين.
ابو زينب: شبيج عمو ليش هل بجي شنو صار.
تاليا: عمو هذا محمد اجا لباب بيتي يهدد و حتى راد يضربني عمو تقبلهه.
ابو زينب: لا يا حقير يهد على نسوان اليوم ازين شاربة.
تاليا: بل موس فدوة.
ابو زينب: والله صار بس بنتي دير بالج على زينب.
تاليا: عمو زينب اخليهه بعيوني بس هي كل دقيقة تبجي لأن انت راح تزوجها شخص مثل محمد.
ابو زينب: يحلم يشوف اضفرهه.
تاليا: شفت زينب صارت تضحك و تبجي، اي عمو نسيت اكولك بعد اسبوعين تخرج اكيد راح تحضرون مو.
ابو زينب: اكيد هاي بنتي وحيدة رفعت راسي اكيد احضر.
تاليا: كلل هلا بيكم سلملنا على خالة ام زينب.
ابو زينب: هلا عمو هلا مع سلامة.
تاليا: سديت اتصال و ماحس غير زينب حضنتني كل قوتها.
زينب: لججج احبج يمة فديتج.
جواد: واحد يكرصني بسرعة هاي الفاهية حلت موضوع اكرصوني.
تميم: اني الي اريد واحد يكرصني.
سيف: تدللون تفضلو اصحو.
جواد و تميم: اخخ يابة.
سمر: شنو هذا يا تاليا والله ماعرفتج.
تاليا: اعجبكم، باوعت على يامان يضحك و يغمزلي الأدبسز.
تميم: اكول خوية زينب انتي من وين.
زينب: اني من بصرة.
تميم: والله ونعم بنت ولايتي على راسي.
زينب: سالم راسك انت هم من بصرة.
تميم: اي من بصرة.
زينب: على راسي خوية.
تاليا: جنت ملتهية و انداريت شفت علي شلون يباوع لزينب و من تضحك يبتسم هنا تأكدت عندة شي تجاهه.
سيف: يلا شباب نرفع زحمة.
يامان: وين.
سيف: والله ارجع للبيت هسه اختك تزعل علينا بية حيل اني.
تميم و علي: احنا هم نمشي شكرا للعزيمة.
يامان و تاليا: كلل هلا بيكم نورتونا.
تاليا: همه راحو وراهه جواد و سمر كعدو شوية و راحو لميت بيت و نضفتة اني زينب شفت يامان بيدة فراش نزل يريد ينام على قنفة.
زينب: تاليا اني فرشت بغرفة تايا اخجل اكول ليامان اخذو راحتكم بغرفتكم فلهذا اني اصعد انام يم تايا و انتو اخذو راحتكم.
تاليا: ماشي ياعمري، شفت زينب صعدت و اني رحت على يامان متمدد على قنفة يباوع للموبايل اتقربت كعدت بصفة.
يامان: ها حبيبي محتاجة شي.
تاليا: كوم نام فوك زينب تنام يم تايا.
يامان: لا ياروحي انتن صديقات أخذن راحتجن.
تاليا: بس اني ماكدر انام اذا مو انت تنيمني.
يامان: يا نبضة ليامان امشي قبلي هسه اجيب فراش و اجي.
تاليا: صعدت فوك طبيت للحمام غسلت و طلعت لبست برمودة و رحت انشف شعري طب يامان مبين من عيونة تعبان و نعسان بسرعة ذب نفسة على سرير و نام على بطنة اني نشفت شعري و طفيت ضوة رحت نمت بصفة.
...............
فاطمة: مشت الأيام بسرعة عمر كل يوم يجي يدك باب بس ما افتح ولا اخلي اخواني يفتحون حتى من يتصل ما جاوب رجعت لشغلي وية عمو ضليت اشتغل من عصر لحد الليل و من ارجع للبيت هلكانة بسرعة انام ماحس على نفسي  خلال هاي فترة عرفت اني متعلقة بعمر بس دفنت مشاعري لأن هو يستاهل احسن مني مشكلة مو بس عمر مشكلة حتى اخواني زعلانين و مو راضين يحاجوني لأن يحبون عمر مهم مثل كل يوم جنت راجعة من شغل بليل ساعة ١١ شفت سيارتة واكفة بل باب ركضت كل سرعتي لكيت باب حوش مفتوح طبيت جوة جان اشوف حنين و غسان كاعدين يلعبون وية عمر.
غسان: بخوف، فاطمة!
عمر: رفعت راسي شفتهه نفس ملابس الي تلبسهن كل مرة للشغل الوجه تعبان و هالات سود جوة عيونها.
فاطمة: منو فتح باب؟
غسان: فاطمة والله والله...
فاطمة: منوووو فتح باااب، شفتهم كامو يبجون اجة عمر لزم ايدي و جرني للمطبخ.
-اترك ايدييي اتركها.
عمر: لا تصيحين ما تشوفيهم يخافون.
فاطمة: اخواني و احاسبهم انت لا تدخل.
عمر: اي حاسبيهم اذا غلطو بس همة ما فتحو باب اني صعدت و طبيت من فوك باب.
فاطمة: شنووو؟
عمر: اي والله شنو يعني متعطل عليج تفتحين باب.
فاطمة: انت شلون تتجرأ منو سمحلك تفوت للبيت.
حنين: ناني(اني).
عمر: فديت حنونتي.
فاطمة: حنين امشي منا حياتي.
حنين: ماا ناني اعب عمل(ماا اني احب عمر).
عمر: شو تعاي ولج عمر هم يحبج خلي تولي اختج يمة بعدتني عنج اسبوع الي ما تخاف الله.
فاطمة: صدك تحجون ولك اخواني هذولة.
عمر: ياحلوين تريدوني لو لا.
غسان و حنين: اي.
فاطمة: وجعي ولو نامو بفراشكم يلا اني اعلمكم، وانت يلا روح.
حنين: مانام يمش الا عمل(مانام يمج الا عمر).
عمر: سمعتي ست فاطمة سمعتي يلا عوفينا براحتنا.
فاطمة: من عصبيتي رحت للحمام و طبكت باب كل قوتي اريد اصرخ ليش رجع ليش هسه شلون اقنع كلبي و عقلي ما يفكر بي ذبيت ملابسي غسلت شلون ماجان و بدلت بل حمام طلعت شفتهم نايمين و عمر بصفهم لفيت شعري بخاولي و رحت للمطبخ اريد اشرب مي ريكي يابس طلعت بطل من ثلاجة شربت شوية و شفت اكو خيال وراية انداريت ردت اصرخ لزم حلكي.
عمر: اشش يا مفضوحة تريدين تفضحينا.
فاطمة: اممم ، اكرص بي اعض بي بس يوخر ايدة.
عمر: اوخر ايدي بس بشرط تسمعيني للأخر.
فاطمة: هزيت براسي و وخر ايدة.
عمر: فاطمة والله نيتي مو سيئة وياج ولا تفكيري مثل كلام الي تكولة ناس صدفة طلعتي بدربي و ساعدتج و هم صدفة نسيتي علاجج و دورت عليج ولكيتج من شفت وضعكم حبيت اساعد لا أكثر و كلتلج عادي ترديلياهن من تتخرجين اي صح اني اعترف حبيتج و تعلقت بيج بس الله شاهد مو حقير لدرجة استغلج مارايد شي غير تحبيني كوني وياي لا تعوفيني
"تَرة أنيّ وَحيْد و إنتِ صْرتِي
أَهْلَة "
فاطمة:كلبي صار يدك بسرعة ماعرف شكول كلامة و هدوئة و المسافة الي مخليهه بيني و بينا و احترام الي اشوفة بعيونة خلاني اضل ساكتة.
عمر: ماتريدين تحجين شي.
فاطمة: انساني اني مو مثل مامفكر تندم اذا تعرف ماضيي.
عمر: ما يهمني ماضيج يهمني حاضرج و مستقبلج وياي.
فاطمة: اني بنية اريد اركز بدراستي و اخواني لا أكثر و انت تستاهل احسن مني ماريد كل يوم تجي و ناس تحجي ماتحمل افهمني كلشي ولا كلام ناس.
عمر: تمام خل نتفق اتفاق.
فاطمة: اتفاق شنو؟
عمر: ماراح اجي لبيتكم بس مرة بل اسبوع و كل ما اتصل تجاوبين و شغل ما تشتغلين تريدين شي تطلبينا مني.
فاطمة: بس.. شغلي.
عمر: ماكو شغل.
فاطمة: ماعوف شغلي مو لأن محتاجة لأن عمو محتاج من اكون ويا اكو شغل.
عمر:هواي حاولت امنعها من شغل ماكدرت ميبسة راسهه اخر شي كلتلهه
-ماشي بس اراقبج وقت تروحين و ترجعين.
فاطمة: هزيت راسي بإي.
عمر: اني راح اروح هسه.
فاطمة: تمام الله وياك، جر حسرة طويلة و طلع من مطبخ رحت ورا شفتة يلبس حذائة رفع راسة باوعلي و راح فتح باب حوش طلع و سد باب ورا اني هم
رجعت فرشت فراشي خليت راسي على مخدة ردت انام سمعت صوت تلفون كمت بسرعة ادور علي لا يكعدون اخواني لحكت ارد بسرعة جاوبت و اني الهث
-هاا الو.
عمر: فاطمة شبيج ليش تلهثين.
فاطمة: جنت ادور على موبايل هو يدك خفت لا يكعدون اخواني.
عمر: اسف اخاف ضوجتج.
فاطمة: لا عادي محتاج شي.
عمر: ها لا لا بس حبيت اشوف تجاوبين او لا.
فاطمة: تمام.
عمر: تصبحين على خير.
فاطمة: وانت من اهل خير، سديت اتصال و نمت.
...........
بشرة: سيففف اكعد سيففف يمعود شبيك بس كوممم.
سيف: ولج يوم جمعة عندي استراحة بس خليني ارتاح.
بشرة: والله ماكوووو كوممم اريد توصلني لبيت يامان بنات كلهن راح يجتمعون نروح للسوك.
سيف: حبيبتي اتصلي على يامان يجي ياخذج.
بشرة: ماشي اذا رجعت لهذا بيت الك حق ، مثلت على اساس اتصلت بيامان
-الو هاخوية شلونك احنا بخير الحمد لله، اكول يامان هذا سيف نايم ما يجيبني عليكم تعال انت اخذني، اي واذا ماكو زحمة اضل يمك اسبوع... اني كلت هيج سيف كام بسرعة ركض علية اخذ تلفون من ايدي عبالة صدك متصلة.
سيف: لا تجي خوية لاتجي
الوو..يامان..الووو.
بشرة: ماكدرت الزم ضحكتي و فطست من ضحك باوعلي و باوع للموبايل.
سيف: لا يلكعبة بشرةةة اليوم محللة كتلتج تعاي هنا.
بشرة: صرت اركض و هو يركض وراية
-سيف لا والله توبة سيفف ههههه ولك بس نتفاهم.
سيف: اني اعلمج بعد لشوكت و تبطلين هل سوالف.
بشرة: وكفت مكاني على اساس زعلانة، انت كلت ماوصلج خلي يامان يجي حقي اسوي هيج.
سيف: لا تباوعين هيج تعرفين نقطة ضعفي من تزعلين.
بشرة: اي لعد بدل و اخذني على بيت يامان لأن بنات يروحن لسوك ماضل شي لتخرج تاليا غير نحضر.
سيف: امشي أمري لله.
بشرة: فديت زوجي اني الي ما يرفضلي طلب.
سيف: هههه شلون لواكة.
بشرة: ها لواكة مو روح بعد ماحجي وياك صاير ماتحبني ماحس غير جرني من خصري و قربني لنفسة.
سيف: شعندي غيرج لج اشاقة شو خليني اتريك بهل خدود.
بشرة: سيف عوفني هسه يجون جهال.
سيف: ياربي شما اكول كبرنا من الزمج احس نفسي مراهق.
بشرة: تقربت و رفعت نفسي بستة بطرف شفتة
-انتَ احلى شي صار بحياتي صدكني بعمري ما ندمانة لأن اختاريتك.
سيف: هنيالي عليج اكول خلي نلغي طلعة و نرجع ننام سوة شنو رأيج.
بشرة: لاااا سيف مو وقتها ابد يلا تحرك يلا طب للحمام مجهزتلك كلشي، كوة دفعتة للحمام و هو ضل يضحك طلعت من غرفة اريد اشوف زينة و ايمن ابدللهم طبيت لغرفتهم لكيت زينة كاعدة تلعب ايمن ابتسمت وتقربت منهم.
-ماما زينة كومي بدلي نروح على بيت خالو يامان وانت يا حلو تعال ابدلك يمة فديت ابني.
زينة: ماما جهال يجون.
بشرة: اي ياروحي كلهم يجون.
زينة: لعد اروح البس فستاني جديد علمود ناخذ صور.
بشرة: اي ماما لبسي، زينة راحت تبدل و اني غير ملابس ايمن نزلت شايلة ايمن و احضر ريوك شوية و نزلو سيف و زينة طفيت جاي و كلتلهم كعدو تريكو بيت ما اروح ابدل.
سيف: روحي حبيبتي اني اصبلهم جاي.
بشرة: شكرا حبيبي، صعدت لغرفتي بسرعة بسرعة طلعت شي البسه و لفيت حجابي ما خليت مكياج ماريد وجهي يتعب من هسه عود وقت تخرج اخلي مهم كملت و حضرت جنطة لأيمن اخاف يحتاج ملابس نزلت خليت أغراض يم باب رحت للمطبخ مكملين ريوك سويت لفة جبن و شلت الباقي لملمت مواعين و الإستكانات غسلتهن و رتبت مطبخ.
سيف: بشرة كملتي.
بشرة: اي حبيبي كملت بس هذني جنط خليهن ورة ماعندي شي.
سيف: ماشي طلعي و قفلي باب جهال صعدو قبلج.
بشرة: طفيت كهربائيات و قفلت باب و طلعنا كلها مسافة طريق و وصلنا لبيت يامان جان سيارة جواد و هو هناك عرفت وصلو قبلنا نزلنا و دكينا باب و فتحلنا هود.
هود: اهلا وسهلاً  نورتونا تفضلو تفضلو وينة سيف.
بشرة: كاعد ينزل غراض هسه يجي شلونك خوية شخبارك.
هود: على الله بخير انتي شلونج.
بشرة: الحمدالله.
سيف: سلام عليكم شلونك هود.
هود: هلا بضلعي اني بخير انت شلونك.
سيف: بخير الحمد لله.
هود: تفضلو ليش واكفين بل باب.
بشرة: طبينا جوة شفت هوسة كل واحد بجهه و صياح جهال و الكبار دخلنا سلمنا
-سلام عليكم.
الكل: وعليكم سلام و رحمة الله.
بشرة: رحت على بنات بوستهن و سلمت عليهن.
تاليا: تأخرتي بشور وين جنتي.
بشرة ولجن كوة كعدتة خطية تعبان من شغل.
تاليا: الله يساعدة.
سمر: بشرةةةة جيتي و الله جابج تعاي حفي حواجبي بسرعة.
بشرة: ولجن على أقل شربوني كلاص مي يمعودات.
سارة: حبيبي اعذرينة بس احنا ميانتنا زفرة بسرعة نطلب.
سمر: بشيررررة يلا.
بشرة: امشي خية امشي لا تاكلين راسي.
تاليا: قبل ما نصعد احنا بنات سمعنا جواد يصيح.
جواد: الله وكيلكم اليوم راح يشتغل الشيرة و الخيط والمقشرات و مرطبات و كولو جواد ما كال.
يامان: شكد سرسري امشي اطلع برة امشي.
سيف: ماتصيرلة جارة.
.............
زينب: ضليت يومين يم تاليا حسيت بإحراج كلتلهه ارجع للأقسام هيج ارتاح اكثر مهم مر اسبوع و احنا نداوم و هذا علي ويانة مرات احسة يريد يحجي وياي بس اني مانطي مجال اتهرب مهم اتفقنا وية تاليا اليوم نطلع نشتري فساتين للتخرج و هي كالتلي راح يجون وياهه سمر و بنت عمهه و بنت حماهه اني بدلت و جهزت نفسي اخذت فلوس الي ابوية دزلياهن خليتها بل جنطة شلت تلفوني و طلعت من أقسام على شارع عام اريد أأجر تكسي سمعت صوت هورن وراية كلت اكيد واحد تافه يريد سوالف مكسرة ما التفتت مشيت شوية و حسيت سيارة تمشي وراي و مستمرة تدك هورن ضجت حيل التفتت اريد ارزلة شفت علي بل سيارة، هذا شيسوي هنا نزل من سيارة و اجة بتجاهي.
علي: احم شلونج.
زينب: زينة الحمدلله.
علي: وين رايحة تعاي اني اوصلج.
زينب: لا تسلم هسه اخذ تكسي.
علي: زينب لا تعانديني وين تريدين اني اوصلج.
زينب: اريد اروح لبيت تاليا.
علي: امشي اصعدي خل اوصلج.
زينب: صعدت ويا ماخاف لأن كل يوم هو يجيبنا و يودينا اني و تاليا، ضلينا ساكتين طول طريق لحد ما هو كسر صمت و سألني.
علي: انتي شكد عمرج؟
زينب: اني عمري ٢٣ سنة.
علي: شلون ٢٣ و راح تتخرجين.
زينب: مو جنت مستعجلة اروح للمدرسة رحت قبل بوقت.
علي: اها الله يوفقج.
زينب: انت شكد عمرك؟
علي: اني عمري ٢٩سنة.
زينب: عمر كلة، رجعنا لوضع صامت لحد ما وصلنا لبيت تاليا اتشكرتة ردت انزل استوقفني طلبة.
علي: زينب ممكن رقمج؟
زينب: ليش؟
علي: اذا ما تحبين ماريد.
زينب: عادي بس ليش تريد رقمي.
علي: علمود اذا بيوم ما اجيتي للدوام تخابريني.
زينب: ههه مابقة شي كلها اسبوع و ارجع للبصرة بس تفضل هذا رقمي.
علي: يعني بعد ما تجين لبغداد.
زينب: ماعرف لأن ماعندي صديقات غير تاليا و هي سمعت راح ترجع لسليمانية ما اعتقد راح ارجع لبغداد.
علي: بضوجة، تمام.
زينب: شكرا مرة ثانية للتوصيلة اتشرفت بيك باي.
علي: الله وياج.
زينب: هذا شبي اشو جان يبتسم و يحجي ليش طنكر اهوووو زينب امشي هسه وقتها انتي متأخرة، دكيت باب و فتحتلي سمر.
سمر: هلا بزنوبة هلا فوتي يروحي فوتي.
زينب: شلونج شخبارج سوسو.
سمر: بخير الحمد لله انتي شلونج.
زينب: بخيرررر اذا يخلص هل تخرج.
سمر: امشي امشي ان شاء الله تعدي على خير.
زينب: طبيت جوة كلهم كاعدين سلمت و سمر صعدتني فوك شفت تاليا و بنات ثنين يمهه سلمت عليهن.
تاليا: بنات اعرفجن هاي صديقتي زينب و زينب اعرفج هاي سارة بنت عمي و هاي بشرة اخت يامان.
زينب: اتشرفت بيجن حبيباتي.
تاليا: بنات يلا كل وحدة شالها و عبايتها خل نلحك نشتري شي مرتب.
زينب: اني جاهزة.
سارة: جهال وين نعوفهم.
سمر: معليج هسه شوي اتنعوص يم جواد هو والشباب يضلون بل بيت يم جهال.
بشرة: دروب سمر ولا وحدة تعرفلة.
سمر: اعجبج حبيبتي اعجبج.
تاليا: نزلت جوة شفت شباب معمرين نركيلة جواد يموت اذا ماكو نركيلة شفت جو البيت كلة دخان واني منا عندي ربو كمت اكح.
يامان: طفي ابن ك** طفي راح تموت بنية.
تاليا: كلهم كامو يضحكون.
جواد: لا تخاف عليهه هاي سبع أرواح تموتك و ما تموت.
تاليا: يامانننن.
سامان: عوفي بوية واحد جلب شتسويلة.
جواد: يا خاين الك يومممم
يامان حقير قبل زواج طلعاتك و طباتك و سهراتك كلها وياي هسه صرت جلب.
سيف: راح زمانك يا جوجو راحح.
تاليا: ياماني احنا راح نروح للسوك منو يضل يم جهال.
يامان: بوية انتو روحو احنا نضل يمهم.
تاليا: انت تعال ويانة وصلنا و جواد خلي يضل يم جهال.
جواد: تاكلين تبن شنييي جواد يشتغل عدكم.
تاليا: والله سمر كالت اخلي جهال يم جواد ياويلة اذا رفض.
جواد: اكلو نع*** انتي و سمر.
سمر: جوااااد شنووو ما سمعت.
جواد: جاي احجي على يامان و سيف حبيبتي مو يمج سالفة.
سمر: اي عبالي يلا تاليا تأخرنا لا تهتمين جهال يم جواد يضلون مو هيج زوجي حبيبي.
جواد: اي اكيد اكيد.
سيف: والله كفو من مرت اخوي.
هود: على كولة تاليا كل مرة تكول محد يكدر على جواد غير سمر.
جواد: انجبو لا اكوم اطلع حيفي كلة بيكم.
يامان: ههههه يلا بوية يلا صعدو بل سيارة بس اشرب مي و اجيكم.
سمر: بشرة...سارة...زنيبةةةة، ولجن يلا تأخرنا.
تاليا: البنات طلعن قبلي اني هم رحت ورة يامان للمطبخ اريد اطلب منة فلوس ماعندي شلون اروح اشتري بس خجلانة.
-احم احم ياماني.
يامان: ها ياروحة.
تاليا: هو راح اروح للسوك.
يامان: اي.
تاليا: اي مافتهمت.
يامان: شنو حبيبي؟
تاليا: اريد فلوس ماعندي.
يامان: ههههه عفية هذا الي جنت اريدة.
تاليا: شنو؟
يامان: ردت انتي تجين تطلبين فلوس بطلي خجل بوية ترة فلوسي فلوسج.
تاليا: نزلت راسي العب بأضافيري كلت، شسوي هذا طبعي.
يامان: فديتج و فديت طبعج انتظريني هنا اروح اجيب سويج والفلوس اجي.
تاليا: ماشي، بين ماعدلت حجابي يامان راح و رجع بيدة فلوس انطاني ٣٠٠الف.
-يامان هذني هواي.
يامان: لا بوية لا تخلين شي بخاطرج اشتري الي تحبي.
تاليا: تقربت بستة بخدة و كلتلة، شكرا.
يامان: هههه استري على نفسج و امشي.
تاليا: اي يلا يلا تأخرنا.
يامان: هههههه مسودنة و سودنتيني امشي حبيبي امشي.
تاليا: طلعنا شفت بنات مندمجات وية زينب كاعد يصورن صعدت بل سيارة و يامان هم صعد و انطلقنا للسوك يامان ضل ويانة لأن ماكو احد ويانة خاف لا مثل هذاك يوم احد يأذيني بدينا اني و زينب من محل فساتين.
بشرة: تالو يالون تختارين.
تاليا: سمائي وية لون عيوني.
سارة: تريد تسحل كلوب ناس تالو.
تاليا: هههه ابد مو هيج.
سمر: وانتي زينب يالون.
زينب: اني راح اخذ وردي فاتح يطلع حلو علية.
تاليا: جنا ندور على ثياب مال محجبات و ديزاين الي ببالنا اني و اخيراً لكيت الي يعجبني رحت لغرفة تبديل لبست فستان و طلعت افتر بي كدام بنات و يامان من بعيد يباوع يبتسم اشرتلة اوكي يعني حلو هز راسة و سوالي اوكي كلت للبنات خلص اني اخذ هاي.
سمر: اي لعد انتظرو زينب تطلع.
تاليا: بين ما طلعت زينب اني رحت بدلت و رجعت انتظر وية بنات يامان طلع علمود زينب ما تخجل ورة شوية طلعت زينب كلنا انصدمنا من جمالها.
بشرة: ماشاء الله كمر والله كمر.
سمر: طالعة تخبلين.
سارة: والله لو منج ما اشوف غير فستان كبل اخذ هاي.
زينب: يعني طالع حلو.
تاليا: يجنن.
زينب: لعد راح أخذه.
تاليا: أخذنا فساتين و حاسبنا صاحب محل طلعنا شفت يامان كاعد برة.
يامان: كملتو؟
سمر: بعدد بعدد يا خوية راح تتعب اليوم.
يامان: يهون كلشي لعيون سمائي.
تاليا: خجلت من كلامة مشينا شوية رحنا اشترينا كعب و نسقنا حجاب وية فساتين كملنا من اكسسوارات و الأشياء باقية كلت ليامان كملنا خل نرجع.
يامان: الله يساعدكم.
بشرة: و يساعدك اليوم تعبت ويانة.
يامان: لا تدللون.
تاليا: صعدنا بل سيارة اول شي وصلنا زينب بعدها رجعنا للبيت بس فتحت باب بيت كبل ذبيت حذائي و طبيت للصالة كعدت على تخم تعبانة.
جواد: هاااا الله يساعدجن.
تاليا: ويساعدك.
سمر: اخخ يابة رجلية ماحس بيهن.
جواد: اذا انتن فارات السوك فر اكيد ما تحسين برجليج.
هود: تالو يمتة تخرجج.
سارة: دباوع هذا اخوهه و ما يدري.
تاليا: ولك مو باجر عكبة.
جواد: انتي مو كلتي بعد اسبوع.
تاليا: اي بعد اسبوع حفلة تخرج قبعة و بعد يومين تخرج بل قاعة يختارون الأوائل.
هود: اها ان شاء الله اوائل.
تاليا: ادعولي.
سمر: ان شاء الله ياروحي.
سارة: حبيبي احنا نكوم.
هود: اي يلا حسين نايم اروح اجيبة انتي سبقيني شغلي سيارة.
يامان: ابقو هنا الليلة.
سارة: لا والله خوية لازم نرجع.
يامان: براحتكم.
تاليا: راحو هود و سارة بعدها بشرة و سيف ضلت سمر يمي سولفنا شوية و بعدين جواد كال نرجع شكد حاولت يباتون ماكو مهم همه هم راحو ضليت وحدي بل غرفة اعزل الي اشتريتة و دخل يامان.
يامان: حبيبي عوفي من ايدج كومي نامي اكيد تعبانة.
تاليا: لا هسه كملت ماضل شي، شفتة فتح لابتوب ضل يشتغل اجة ببالي سوأل و رحت كعدت مقابيلة على سرير.
-ياماني.
يامان: ها بوية.
تاليا: اذا ماطلعت اوائل تزعل علية؟
يامان: لا.
تاليا:زين اذا طلعت من اوائل شنو تجيبلي هدية.
يامان: لو تطلبين عيوني ما ابخل عليج.
تاليا: تمام عندي طلب لعد اذا طلعت اولة.
يامان: سمعيني.
تاليا: اريد نذبح ذبيحة و نوزعة على ناس محتاجة.
يامان: صار تدللين وعد بس تطلعين اولة يتنفذ هذا شي.
تاليا: طبكت لابتوب و فتحت ايدة نمت عليهه.
-هذا مكاني شكو لابتوب جاي ياخذة.
يامان: ههههه حتى لابتوب ماخلص من غيرتج.
تاليا: نمت بحضنة مأمنة و فرحانة لحد ثاني يوم كعدت على صوت اتصال من زينب جاوبتهه
-ها زوزة.
زينب: تاليا اتجهزي نروح نحجز صالون.
تاليا: ماشي دقايق و اتجهز، سديت اتصال و كمت من فراش طلعت ملابسي بدلت و يامان كعد على صوت خبصة بل غرفة.
يامان: حياتي وين رايحة اليوم ماعندج دوام.
تاليا: عندي يروحي بس محاضرة تبلش ساعة ١٠ و خلال هل وقت نروح اني و زينب نحجز صالون.
يامان: اصبري اني اوصلج.
تاليا: لا ياعمري اتصلت على علي هو يجينا انت ارتاح.
يامان: ماشي بس ديربالج على نفسج بوية.
تاليا: كملت لف حجاب تقربت بستة بخدة، تدلل حبيبي.
يامان: اكلي شي مو تنسين.
تاليا: طلعت بسرعة، ايي حبيبي صااار باي ياعمرييي.
يامان: بايات حبيبي.
تاليا: طلعت من بيت بيدي كيك و عصير شفت علي واكف بل باب صعدت بل سيارة سلمت.
-هلو علاوي شلونك.
علي: هلا خيتي بخير انتي شخبارج.
تاليا: بخير الحمد لله اذا تستعجل اكون ممنونة الك لأن زينب تنتظرني.
علي: صار هسه اطيرج هههه.
تاليا: ههههه اي يلا يلا، كعدت اكل و اراجع البحث اليوم اخر مراجعة الة ورة حفلة تخرج لازم نقدم كلها دقايق وصلنا للأقسام شفت زينب منتظرتنا اجت تركض.
زينب: صباح خير.
تاليا و علي: صباح نور.
زينب: امشي بسرعة بسرعة.
تاليا: شكو ولج؟
زينب: غير متأخرين يولو بل عباس بفهاوتج ما شايفة.
علي: ههههه.
تاليا: اني اعلمج يا فطيرة منو فاهية.
زينب: والله احلف اني مكعدتج من نوم.
تاليا: ترة جنت تعبانة من سوك.
زينب: يلا يلا معذورة.
تاليا: وصلنا للصالون نزلنا حجزنا عدهم و رجعنا للسيارة نروح علمود نلحك محاضرة بل طريق خطري سوأل.
-زنوب منو يجي للحفلة تخرجج كم شخص عزمتي.
زينب: ولج خل يطيرون الله وكيلج ولا واحد يسوة اعزمة راح اجيب امي و ابوي حتى اخواني ما جيبهم نسوانهم مسمومات.
تاليا: ولج عيب.
زينب: حفلة تخرجي و اعزم بس الي عزيزين على كلبي.
تاليا: زينب عزميني هههه.
زينب: انتي معزومة من زمان.
علي: لعد اني مو معزوم.
زينب: هااا.. اي ..بكيفك اذا تجي هلا بيك.
تاليا: شفت نظرات علي و ابتسامة شكت حلكة من كالت زينب تعال.
علي: مشكورين عيني طلعنا من عزاز كلبج الحمدالله.
تاليا:احم احم.
زينب: وصلنا وصلنا نزلي تالو تأخرنا على محاضرة.
تاليا: اي نزلي عيني نزلي.
زينب: نزلنا من سيارة نريد نمشي علي دك هورن التفتت غمزلي و راح فتحت حلكي على وسعها
-ياااا هذا مستخف شبي هذا.
تاليا: شبيج ولج ليش جمدتي امشي تأخرنا.
زينب: هاا... اي اي يلا.
تاليا: دخلنا للمحاضرة كملناها و طلعنا اكلنا شي بل كافتريا بعدها اجة علي أخذنا رجعت للبيت نفس روتين بليل حضرت ملابسي و حذاء و اكسسوارات كلها بجنطة علمود باجر كبل اروح للصالون اتجهز و ابدل هناك يامان جان طالع وية شباب رجع بليل هو دخل للحمام و اني من تعب كبل غفيت بعد ما حسيت بشي.
.............
-وينكككك.
-كول باشا.
-اريد تجهزولي اكبر باقة ورد لون احمر.
-حاضر باشا بس ليش؟
-سوي الي اكلك علي لا تسأل.
-صار باشا اكو شي بعد.
-اي و اطلب تخم ذهب نازك.
-بأمرك باشا.
-يلا امشي اطلع برة.
-تدلل باشا.