قصائد حسينية

رحل كل غالي عندي

باسم الكربلائي

رحل كل غالي عندي...بقت بوسه اعله خدي
مثل الدمع فوق الوجن طعمها

مثل كل ليلة طبعي لا ما تغمض العين...إذا ما أشوف أبويه و ألثم جف الحسين
عجيبة الليلة أسمع بس صوت القرائين...دخلت و شفت أبويه ناذر لي ركعتين
يقلي لله خليله...عفت عندك عليله
انطيها يا ربي الصبر و ألهمها

لمن خلّص صلاته القاني بيده تسبيح...خرز دمعي اعله جفه تتناثر مصابيح
جبت عيني اعله عينه لحظه و صفنت الريح...تمرجح قلب طفلة ما شافت مراجيح
أسمعك تدعي حاير...أحس دعوة مسافر
صارحني مو روحي اشتعل ألمها

شبگني الحضنه شبگه ذبحت كل الأحلام...لمن صرت اعله صدره ترست وجهي السهام
عصرت بإيدي جفه بيها جويت إخيام...أشم بنحره و أسمع موت و صرخة أيتام
أشوف بوجهه غربة...تفيض بعينه جربه
جربة دمع غدر الزمن سهمها

اشيحاجيني و يقلي و عينه اتسولف اوداع...الطير اليهوى عشه ينزل راسه للقاع
السفينة اشقد جبيرة بس بذمة اشراع...ضعت بين الليالي من بيتي البخت ضاع
بعد أهلي و أخوتي...هله بجيتك يموتي
ارحم عليلة خلها ما رحمها

خذت خيرة سفركم بوية شفت الإسراء...لون سرتوا بضعنكم تسمع عني الأنباء
إذا بابي طبقته أغدي آنا زهراء...أحط إيدي اعله ضلعي و أنخه قومي أسماء
مثل أمي الزجية...هجم دهري عليه
و البوسة سطره بوجنتي رسمها

لون رحتوا و مشيتوا اشيبقه بويه تذكار...أضم ضحكت رقية و أحجي الزغار
أضم كاروك خالي باقت عمره الأكدار...أضم بوسة اعله خدي ميتة بساحة الدار
بعد ذيجه عشرتي...إلك بوسة بوجنتي
كلما أحن الشوفتك أشمها