من جهة وحدوخرا قاعدين هو وهي
يشربو في قهوة ، وقت استراحة العمال ،
تسما هوما راحو يبروفيتيو .
جاد : ايهيه كيفاش يا لالة ما زدتي بنتي ما حوستي.
رنا : س سي ياك موالفين نهدرو بالميساج خطرات .
قالت هاد الجملة و هبطت راسها مالحشمة .
جاد : ايه راكي قلتيها خطرات ، و اصلا انا لي نبادر و نبعتلك لول ، لوكان ما نبعتش نتي ما تبعتيش. ولا بلاك ما تحبيش تهدري معايا .
هي لي طلعت راسها و قالتلو بالزربة : لالا لالا نحب ،
هو لي تبسملها تبسيمة تع راني حكمتك و هي فاقت مع روحها : ااه اححم قصدي نورمال ماشي مانحبش يعني...
هو قاطعها و مزالو يتبسم هاديك التبسيمة: فهمتك فهمتك .
مع كمل هدرتو ناضت و قالتلو : جابلي ربي الوقت ، هداك هو نروحو يكونو الخدامين رجعو .
دارلها ايه براسو و ناض
قاعدين يمشو حتى لحقو وين le parking مع جاو
يدخلو حبست الطونوبيل تع رياض
و شاف رنا مع جاد
رياض : تسما ما قبلتيش بيا على جالو ، اصبري تشوفي مالا .
هبط و بدا يعيطلها : رنا رنا احبسي كيما راكي ،
دارو رنا و جاد و هي تخلعت
شكون هادا لي راهو يعيط بآسمها هكا.
مع لي دارت و تشوف رياض جاي من جيهتها
و الجن الأحمر داير بيه
جا حكمها من يدها و زير عليها
رياض : شكون نتي حتا ما تقبليش بيا ، ولا خلاص عينيك زغدو لبلاصة وحدوخرا .
نحالو جاد يدو و طبعو
جاد و هو يعيط : واش حبيبنا جاي داخل فالطفلة و تعيط عليها هكا وين راك حاسب روحك .
طبعو رياض هو تان : نتا ما دخلش روحك .
حكم رنا زير على يدها و يجري فيها موراه : و نتي امشي معايا بش تقولي لباباك بلي راكي قابلة .
فنفس الوقت جا جاي إياد و أمير
و شافو رياض كيفاش يدير لرنا
و جاد عاود راح يجري جبد رنا موراه و ضرب رياض
طيحو فالارض و طاح عليه قتلو بالضرب
جاد و هو يضرب و ينهج: يا الرخيس ما شي قتلك ما توشيهاش، اه اليوم نهارك .
أمير و إياد لي جاو يجرو أمير جبد جاد
اما إياد طاح على رياض يكمل عليه.
أنت تقرأ
حياتي عبارة عن كذبة 💔. {باللهجة الجزائرية}
Fanfictionصعيبة شخص يكون عايش حياتو عادي بين عائلتو و اصدقائو.الكل يعرفو على اساس هذا فلان بن فلان ، حتى يجي نهار وين يعرف بلي هو ما ينتميش ليهم و انما هو شخص ثاني وليد عائلة اخرى ، بين ليلة و نهار تتقلب حياتو ، كل هادا على جال غلطة صرات من 23. سنة. هاذي هي ح...
