#حبك_نقش_بالروح💞💞
الحلقة#2
أحمد قرب منها وحط ايده على كتفها : قتلك توا انديرلك حل ما اتخافيش ..والله نقالك ايكون عندك اليوم
الاء بحتت فيه واعيونها مليان ادموع وهزت رأسها
أحمد يحكي مع ملاك : اخذيها للفصل توا ...أنا اشوي وانرد عليكن ..تمام
ملاك : تمام... اوكيه
عدا أحمد ..وملاك خذت الاء للفصل وهي تبكي وخايفة...
الاء ترجف من الخوف واتخيل في بوها لوكان يعلم قصة النقال ..بوها مفيش امعاه نقاش مش متفاهم 😥
بدأت الحصة الخامسة وأحمد مازال ما جاء ..الاء مش قادرة اتركز ..بعد اشوي الباب ايدق ويخش أحمد ..الاء اتبحت فيه لكن هو قمعز من غير ما ايبحت فيها ..
الاء قاعدة على اعصابها طول الحصة ..ماصدقت الحصة انتهيت كانت اخر حصة عندهم ..بدوأ الطلاب يطلعلوا ..الاء اتلم في كراساتها واتبحت في أحمد لكن أحمد يحكي مع صاحبه..الاء خلت اغلب الطلبة اطلعوا وجت لأحمد بحت فيها بتركيز كأنه مستغرب جيتها وهز رأسه يسال فيها بعيونه شن تبي ..صاحبه صبا وطلع
الاء في عينها دمعة : شن صار ..وين نقالي
أحمد : اي نقال
الاء منصدمة : كيف اي نقال ..نقالي اللي خذاه الاستاذ
أحمد : اها ..ماصارشي الاستاذ ماباش يعطيه ليا
الاء ادموعها انزلوا وابرمت تبي تطلع لكن أحمد صبا ومسكها
أحمد : تعالي وين ماشية ..انبصر امعاك
الاء بحتت فيه مش امصدقة واحمد طلع نقالها من جيبه
الاء حطت ايديها على وجهها : حرام عليك والله حرام عليك
أحمد : سامحيني والله ما نحسابكش اتخافي هك
الاء ابتسمت وهي تمسح في ادموعها وخذت منه النقال
الاء : لا عادي ..اهم حاجة النقال جاني
أحمد : ليش خايفة ..نقال سري
الاء انحرجت منه : أمي عندها العلم بس ...😔..بابا ماعندش علم بموضوع النقال وخفت منه
أحمد : امم حصل خير ..انتبهي اكثر لاني ماقبل قنعت الاستاذ يعطيني النقال
الاء : مش عارفة شن انقولك ..بس أنت للمرة الثانية تنقذ فيا ..بجد أنا منحرجة منك
أحمد ابتسم وبحت في اعيونها : في اي وقت ماعندكش مشكلة
الاء انحرجت من طريقة نظرته لها ..ومعاش اعرفت شن اتقول..لكن أحمد قرب منها
أحمد : الاء أنا ,,,,
لكن أحمد سكت وبرم وجهه لان ملاك خشت الفصل
ملاك : شن صار يالولي
الاء : تمام أحمد جابه ليا
ملاك : صاح ..باهي كنت خايفة عليك
الاء اتبحت في أحمد : لا الحمدالله انتهت على خير
والتفتتت في ملاك ..هيا نمشوا
ملاك : هيا
طلعت الاء وملاك ..وأحمد غمض اعيونه وتنهد ..كان يبي يحكي امعاها لكن مافيش نصيب
بعد اليوم هذا تما في اعجاب بين أحمد والاء وكل يوم ايزيد الاعجاب والنظرات بينهم ..أحمد كان كل يوم ايجي للمدرسة لكن ماينزلش من السيارة الابعد ايشوف الاء اتجي للمدرسة ..استمر الوضع اسبوعين لعند في يوم الاء طالعة هيا وملاك من الفصل لاستراحة الفطور ..وهن نزلات من الدروج الاء حست بحد قاعد فوق ..ارفعت اعيونها شافت أحمد امصبي فوق في اخر دور ويبحت فيها ..طبست الاء رأسها ولما بحتت فيه اخرى أحمد قاللها تعالي براسه
الاء حست قلبها ايدق بسرعة وخافت اول مرة في حياتها اتعيش اللحظات هذه 💓💓
انزلت الاء وحكت الملاك ..كانت تبي تمشي تحكي امعاه بس في نفس الوقت خافت ..معاش اعرفت شن ادير لكن الخوف سيطر عليها وماقدرتش تمشيله💔💔
انتهيت استراحة الفطور والاء رقت للفصلها مع ملاك واول ما خشت ملاقتش أحمد قاعد ..بدات الحصة واحمد جاء لكن مابحتش في الاء بلكل
الحصتين اللي بعدها أحمد ما مابحتش فيها وكان يحكي معا الشباب والبنات والاء ماعرفتش ليش تغير عليها ممكن زعل منها ..
نهاية الدوام أحمد طلع من الفصل على طول من غير ما ايبحت في الاء ..اللي كانت اتبحت فيه وهو طالع ومستغربة شن صارله ..أحمد كان كل يوم مايطلعش الا بعد تطلع الاء من الفصل ..ثاني يوم الاء جات للمدرسة لكن مالاقتش أحمد برا في السيارة نفس كل يوم ..خشت وفي اول حصة جاء أحمد ..الاء كانت محبوبة في الفصل والا ما ايجي واحد من الشباب ويحكي معها والا يسالها او ايبصر امعاها
الاء وملاك بين الحصتين كانن امصبيت ويحكن امعا مجموعة طلبة وايبصرن امعاهم ..لكن الاء كل ما اتبحت في أحمد تلقاه ايتخزر فيها 😒
هي عرفت ان أحمد مش عاجبه انها تحكي مع الشباب استاءذنت منهم ومشت قمعزت في درجها
جاء وقت استراحة الفطور الطلبة اطلعوا كلهم ..الاء ردت على الفصل تبي تاخذ كتاب لكن لاقت أحمد في الفصل ..اول ماشافته تلخبطت لكن كملت عادي ..افتحت شنطتها وخذت الكتاب ..وأحمد كان ايبحت فيها وهي حست بنظراته عليها ..الاء بحتت فيه وأحمد صبا وجاها
الاء انحرجت وطبست
أحمد قرب منها : شن اخبارك
الاء من غير ما اتشوفله : تمام الحمدالله
أحمد : ليش ماجيتيش أمس
الاء : وين
أحمد : الاء بحتي فيا ..أنتي فاهمة وعارفة شن نقصد
الاء : شن تبي
أحمد : نبي نحكي امعاك
الاء : احكي هنا نسمع فيك
أحمد : مايصير شي هنا ..شوفي الشباب واحد خاش واحد طالع ..عندي كلام نبيك تسمعيه وتعرفيه بس مش هنا
الاء : خايفة ..مانقدرش
أحمد تنهد :شوفي أنا مش حنضغط عليك ..كل يوم حنستناك في نفس المكان ..لما اتحسي نفسك مستعدة أنك تحكي امعاي ..تلقايني انراجي فيك
الاء حست براحة وابتسمت : انشوف مش عارفة ..خايفة بلكل
أحمد : عدي توا ..وأنا نستنى فيك كل يوم ..ماطوليش عليا
