*************************
سأصبر حتى يعجز الصبر عن صبري
*************************
تذكره من البارت السابق
محسن : رغده بنتي احنه انطيناج فصليه لاهل عادل وباجر يجي اخو ياخذج وياه يعقد عليج .....
***********************************
رغده : ما انطيت اي ردت فعل بقيت صافنه وامي تبجي عافونه وطلعو واني بعز صدمتي طلعت للحديقه رفعت راسي للسماء وصرخت بأغلى صوتي ليش يااااااربي لييييش كل هذا ديصير ويانه يا الله تعبت ارحم بحالنه انت ارحم الراحمين اللهم لاجزع بس تعبت منا كسرت ضهري بأبويه منا اخويه وهسه يردون ينطوني فصليه ليش شنو الي سويته بحياتي حتى اتعاقب هيج ليش كعدت بالكاع وابجي بحركه قلب حسيت ايد على كتفي باوعت الها امي اااه يا امي اجت كعدت بصفي
هاله : يمه رغودتي اني ما بأيدي شي عليج واسوي والله قلبي دينمرد مرد عليج وعلى اخوج بس ما باليد حيله وكلي امرج لرب العالمين وهو كفيل بكل شي كومي يمه حبيبتي طبي جوه الجو حار كومي يعمري انتي
رغده : كمت وياها طبينه جوه رحت لغرفتي كعدت افكر بالصار والي رح يصير افكر بمستقبل مجهول زين شنو رح يصير وياي شنو رح اواجه زين الولد رح يتقبلني واني اخت قاتل اخو شلون رح يعاملوني اكيد رح يعذبوني بس اني مالي ذنب ياربي تعبت من التفكير يارب وكلت امري الك وحدك لا شريك لك انت ارأف بحالي نمت ودموعي على خدي كعدت المغرب غسلت وجهي رحت شفت امي كاعده بالصاله صافنه بس شافتني كامت تبجي رحت كعدت يمها حضنتني وتكول
هاله : والله ما اخليهم ياخذوج مني ما اكدر بدونج والله لو على ذبحي ما انطيج
رغده : لايمه اني اريد اروح ما اريد اخويه يتأذه او يصير شي عليه وبعدين يايمه هذي قسمتي من الحياة واختبار من ربي لصبري واني ان شاء الله انجح بهذا الاختبار ويمه متضيق الا تفرج واني راضيه بأمر الله ليضل بالج حبيبتي عفتها ورحت لغرفتي صليت وكملت رفعت ايدي للسماء وقلت يا الله يا الله يا الله يامجيب دعوه المضطرين ياكاشف كرب المكروبين ويا غياث المستغيثين ويا صريخ المستصرخين يا الله ارحم عبدك الضعيف يامولاي الهي انت ارحم بحال عبادك فأرحم حالي بحق لا اله الا انت يامجيب. اجبني
وقريت دعاء الكساء وسورة ق هواي احبها وملتزمه بيها كل خميس اقراها وكلي ثقه انو حتلو اوكع بضيق الله رح يفرج عني خلصت ولميت سجادتي رحت كعدت على السرير طلعت كتبي اباوعلهن وابجي بحركه على تعبي وحلمي الي راح بيوم وليله تعب ١٢ سنه يروح بيوم حلمي الي جنت احلم بي مراح اكد احققه
ضليت كاعده ما اجاني نوم شفتها ساعه ٣ الفجر رحت سبحت وصليت الفجر وبدلت ملابسي وكعدت انتضر اتصير الساعه ٦ حتى تكعد امي كعدت اقره قرآن الى ان سمعت صوت المشي مالت امي صدقت وكمت طلعت شفتها دتسوي ريوك واتلوج بالها مشغول يم فارس
قلبي انمرد عليها واني اشوفها اتلوب على اخويه الي ما ادري وينه اختفه اليوم صار ثلاثه ايام ماعدنه خبر منه ولا ندري بي ميت عدل الشرطه ادور عليه للان بس ما لكو اوف يافارس ليش هيج ضعت وضيعتنا وياك عفتها ورحت فتحت قرآن بالتلفزيون من اسمع قران ارتاح
اجت امه هستونه انريد نتريك اندكت الباب كمت من مكاني اركض واني اسمع صياح امي وحجيها الي بحركه
هاله : بنتي ما انطيها لو اموووت وشسوون سوو افتهمت محسن وصيحت بأخر كلمه
محسن : لا مو بكيفج اني عمها وانطيتها مو ردتي انرجع ابنج ماكو غير هذا الحل حتى يرجعلج ابنج المجرم يله وخري من كدامي الناس منتضره
رغده : دفع امي وطب وكف كدامي كلي
محسن : يله امشي انوديج للعالم يردون يعقدون
رغده : ماحجيت ولا كلمه طبيت لغرفتني واني ابجي لميت ملابسي اباوع على مكان مكان بغرفتي اودعها اودع العز والدلا وراحتي اودع طفولتي وشبابي الي عشتهن بهذا المكان مسحت ادموعي ولبست صايه وشال وطلعت لكيت امي واكفه باب الصاله تبجي رحت حضنته وبجينه بصوت عالي طلعنه كل القهر الي بقلبنه
هاله : اااه يايمه فدوه اروح لطولج بنت قلبي ولك يا ضالم عوفها للطفله شلون ينطيك قلبك تنطي بنت اخوك فصليه لو بنتك جان سويت هيج لا والله مستحيل متسوي هيج بس هذي عبن ماعدها ابو وضهر هيجي سويتو بيهال حسبي الله ونعم الوكيل
محسن : اذا تردين تتحسبين ف اتحسبي على ابنج هو الي وصل اخته لهذا الشي
رغده : سحبني من ايدي وخذ جنطه الملابس وصعدنه بالسياره امي تبجي ورايه واني دمعتي على خدي مانشفت ابد هذي اخر مره اشوف بيها امي اخر مره احضنها واشتم عطرها اااخ يايمه مشت السياره واني عيني على امي الان اختفت ما اشوفها بعد
وصلنه يم بيت جبير كلش نزل عمي ونزلت وياه شايل بيده الجنطه سلم على الحارس وما ادري شنو حجه وياه صاحلي رحت يمه
محسن : يله امشي ندخل
رغده : امشي وياه وشايله جنطت ملابسي طبيت مضيف جبير كلش وبس رجال كبير بالعمر ولد شباب ورجال معمم كمشت بجنطي قوي من الخوف وامشي خطوات بطيئه كأنو واحد ديروح لاعدامه برجله
سلم عمي عليهم وكعد اني كعدت بصفه كالو يله اتأخر السيد يريد يعقد عمي كله يله اتفضلو
بلش السيد يحجي عن الحياة الزوجيه وعن الموده والرحمه وكال ( رغده عمار هادي ) هل تقبلين بالزواج من ( جبل سلطان سلمان ) فأن رضيتي قولي نعم انت وكيلي ضليت ساكته وابجي عمي كلي كولللي
رغده : ن ن نعم انت وكيلي وبجييت هاهيه انعدمت حياتي
السيد : (جبل سلطان سلمان ) هل تقبل الزواج من ( رغده عمار هادي ) زوجتاً لك
جبل : نعم قبلت
رغده : جنت مدنكه وبس اسمع اصواتهم ماشفت احد كام السيد طلع هو وعمي واني بقيت كاعده سمعت صوت خشن يكول
جبل : كومي جوه يم البنات
رغده : رفعت راسي شفت رجال طويل ضخم شعره اسود فاحم ولحيه مرتبه ولابس زي العربي لون عيونه عسلي وبشرته حنطيه كلش حلو
ضليت صافنه بي لحد ما كلي
جبل : ها رح اتضلين صافنيه بوجهي يله كومي
رغده : كمت وياه مشيت وراه واني خايفه منه دخلت للصاله واشوف نسوان كاعدات لابسات اسود وكلهن يباوعن عليه بحقد جان يصيح بصوت عالي
جبل : سما وينج تعالي
رغده : اجت سما بنيه بعمري لابسه اسود شعرها طويل رافعته بيضه وعيونها عسلي
سما : ها خويه كول يبعد اختك
جبل : هاج خيتي اخذي هذي الحيوانه خليها اتنضف وتشتغل ما اريد احد يساعدها
سما : حاضر خويه
يتبع .......❤️
هلو حبايبي شلونكم اسفه كرزاتي الحلوين اتأخرت عليكم بس شويه مشغوله هل فتره لتنسون الدعم والتصويت احبكم هوااي دمتم في رعايه الله وحفظه
