************************
كافي يادنيا بعد مابيه حيل
فاركت حد ما طلع بعيوني شيب
************************
تذكره من البارت السابق : فارس : بقيت وحدي وكعدت اتذكر ايامنه اني وعادل وابجي اتذكرت موقف خلاني افقد
###############
فارس : جنت كاعد بره بالشارع وشفت عادل اجه من بعيد من شفته ردت روحي اجه يمي وكال
عادل : هلو عضيدي شلونك
فارس : الحمد لله بخير وانتي شلونك
عادل :بخيير وفرحااان هواي
فارس : دوم يارب فرحني وياك
عادل : كوم وياي وانت تعرف
فارس : وين انروح
عادل : كوم لكيتلك شغل امشي انروح لصاحب الشغل
فارس : ضدك تحجي والله مامصدك
رحنه اني وياه لصاحب الشغل حجي جواد التفتت على عادل وكتله صدك عدوله ماكتلي شلون لكيتلي شغل
عادل : والله ياخويه صارت صدفه اني جنت طالع للاسواق دا اشتري كم شغله وشفته رجال كبير سلمت عليه
حجي جواد : عليكم السلام اتفضل ابني
عادل : حجي بلا زحمه اريد بطل مي وعصير
حجي جواد : ادلل وليدي موجوده بهذيج المجمده
اعذرني ما اكدر اكوم وامشي انت اخذهن مناك
عادل : اشكرك حجينه رحت جبت المي والعصير ورحت احاسب وردت اطلع استوقفني من كال
حجي جواد : وليدي اني رجال كبير واحتاج عامل وياي وانت امبين عليك خوش ولد وابن اوادم شنو رأيك تشتغل وياي
عادل : والله يا حجي الي الشرف والله اشتغل وياك
بس اني هسه طالب ودا ادرس وما اكدر اشتغل بس اذا اتريد عامل اني عندي صديقي مثلي ولد مرتب وابن اوادم وفقير واني ادك صدري عليه هو حالتهم كلش تعبانه ابو متوفي وهو شايل مسئوليه البيت واخته وامه وديدور على شغل اذا ماعندك مانع يجي يشتغل يمك
حجي جواد : والله ياوليدي اذا مثل متكول ويتيم وخوش ولد اي شكو بيها ياريت خلي يجي شوفه شوكت يحب يباشر بالشغل
عادل : حجي هسه اجيبه واجي ما اتأخر عليك
هذا كل الي صار من البدايه للنهايه
فارس : حضنته حييل انت اخويه وصاحبي الي شاد ضهري بي ما اعرف شلون ارد الك هذا الجميل
عادل : شنو هل حجي احنه مابينه هاي السوالف انت اخوي وبين الاخوه ماكو جميل وفضل افتهمت يله امشي خلي انروح
قاطع صفنتي صوت الباب دخل رسول من شاف حالي ضل مصدوم ويباوع عليه صار اربعه ايام مماكل شي ولا مبدل كنت بس اروح الحمام واشرب مي وهاهيه
رسول : ولك فارس شبيك خويه حاجيني ليش هيج مسوي بروحك الي راح راح وعادل الله يرحمه هذا يومه ومكتوبله يموت بهل يوم وانت مؤمن ولازم تأمن بقضاء الله وقدره كوم ياخويه غسل وبدل جبتلك ملابس واكل كوم بين ما احضر الاكل
فارس : فاصل عن العالم ما ارد عليه ولا اباوعله سحبني من ملابسي كومني وضربني راجدي ويصيح ولللك كااافييي ليش هيج مسوي بروحك مو كافي خسرت عادل اتريد انت هم اخسرك ولك ماعندي بالدنيا غيركم عادل عافني وراح وانت هم اتريد اتعوفني ولك وين اروح ماعندي لا اب ولا ام ماعندي بس انتو دفعته واني اصيح ولللك اني الكتلته انيييي كتلته بيدي وشردت وعفت اخوي وصاحبي غركان بدمه يااااارب ارحمننني اخذني وخلصني مدا اتحمل كل هذا
سحبني لحضنه وضل يبجي بصوت عاالي اني وياه حالنه حال الميت اخو عادل جان اخونه وصاحبنه وفقدنا هو جان اعز واحد بينه قريب من الكل دخل علينه محمد اجه ركض عليه حضني ويبجي ويكول ولك ابجي عليك لو على عادل الي عافنه وراح
سحبني رسول من ايدي ودخلني الحمام وكال لمحمد يحضر الاكل اني مثل الميت ما انطي اي ردت فعل بس اتحرك وياه وفاتح عيوني نزعني ملابسي بقاني بالشورت وفتح عليه الدوش عيوني ماوكفن دموعها وهو هم يبجي وياي مسح عيونه بردن القميص وطلع جابلي ملابس لبسني وحط الاكل كدامه مشاوي وفواكه وعصير واني بس صافن سحب صمونه سوالي لفه وقدمها يم حلكي واني بعدني بصفنتي الى ان حجه
محمد : فارس بروح ابوك اكل بروح عادل لتسوي هيج احجي كول شي لتبقه صافن والله كلبي ينمرد عليك كافي ياخويه هذا قضاء الله وقدره والصار مو ذنبك هذا الله الكاتبه اكل لخاطري
فارس : اخذتها من ايده واكلت اول لكمه ماكدرت اكل احسها وكفت ابلاعيمي من اتذكرت عادل وشلون جان يباوعلي كمت اكح رسول بسرعه جابلي مي ودك على ضهري باوعتلهم بمعنى مابيه شي عفتهم ورحت اتمددت بفراشي كام محمد طلع ورجع بيده فراش جديد كلي
محمد : كوم نام هنا الكاع حاره عليك
فارس وهم حاره على عادل وهو نايم جواها ونزلت ادموعي محمد عافنه وطلع بره ورسول دنك ماحجه شي رجع ورى نص ساعه عيونه حمر دم ورسول هم عيونه حمر عفتهم وما ادري شلون غفيت كعدت ما لكيتهم بس لكيت الاكل والفراش باقيات
يتبع 🔥
هلو حبايبي شلونكم اعتذر كلش هواي على التأخير بس والله هوااي مشغوله ومدا اكدر انزل البارتات اريد تفاعلكم الحلو وفرحوني بتعليقاتكم الي اتجننن واكتبولي توقعاتكم شنو صار ويه رغده
احبكم هواي دمتم في رعايه الله وحفظه
كتبت القصه بقلم : ايه محمد ❤️
