عذابي الأزلي

البارت التاسع عشر

البارت التاسع عشر

بقلم الكاتبة الزهيرية الزهيرية

لا تفعل الحرام بحجة ان الجميع
يفعله ،وتذكر ستحاسب وحيداً

مينا /  طبعاً الحياة تعلم اكثر ما تعلمنه المدرسة هذا تأكدت منه ميه بالميه لان المدرسه تعلمنه القراءة والكتابة فقط بس الحياة تعلمنه گد ما الدنيا تكفخ بينه نتعلم اكثر نتعلم من نتعرض للخيانه نتعلم من اعز ناسك يغدر بيك وكل موقف نتعرض اله صح بالبدايه تنهز ثقتك بنفسك بس بعدها لازم نوگف على رجلنه ونواجه الحياة

واني من وصلت يم امي وربي چنت منهاره وبوقتها كتبت رقم فرح بموبايل امي واتصلت بفرح ويمكن اتصلت بفرح اكثر من 5 مرات وما جاوبت وبعدين دزيت رساله الها وظليت انتظر عسى شوف الرساله وتتصل بيه

أنوار/ گومي يمه اسبحي وذبي حملچ على الله وهو يحلها الچ

مينا / وگمت بتثاقل وگوه اسحل بروحي ودخلت للحمام وامي جابت الي من ملابسها واني سمينه وامي ضعيفه لهذا ملابسها ما صارت عليه ورجعت على ملابسي ولساعة متاخرة من الليل يله اتصلت

فرح / شنو هاي بدلتي رقمچ ذيچ الايام اتصل على رقمج ماكو مغلق اتصلت على زوجچ يگول موبايلها عطل وبعدني ما جايب موبايل الها وحتى جوانا خطيه قلقه عليچ وين رحتي

نزلت دموعي وحچيت كل شي لفرح وحتى بلغتها اني يم امي

فرح / الگواد الساقط يگلي احترگ موبايلها ولچ شبيچ يا خايبه چان خليتي يدخل للغرفه هو وهاي الساقطه يقين واحرگ بيهم الغرفه

مينا / اي حتى اروح تسعه بأسود وابتلي بيهم وانسجن وهمه اثنينهم قندره ما يسوون

فرح / على رائيچ همه اثنينهم جدر وتلگه القبغ مالته اطلگي منه احسن الچ ترى إذا رجعتي اله وحق وربچ صيرين خدامه

مينا / هاي إلا ما عندي عقل يله آقبل ارجع اله اگلچ فرح جوانا شلونها دى تختبريها تخابرچ

فرح / ولچ اي هي هم قلقه عليچ راح انطيچ رقمها واتصلي عليها

مينا / وامي اخذت الموبايل مني وظلت تسولف ويه فرح بين عتب من الطرفين وبين أمي توضح شصار وياها وبعدها انطتنه رقم ام ميمو وانتبهت على الساعه عبرت 1 بليل استحيت اتصل

وامي سوت عشا الي والها وگعدت گبالي تباوع عليه
أنوار/ تدرين اني بالبداية گلت عسى الله يكون وهب السعاده لمينا بس سبحان الله الام اذا ما عدها حظ البنات هم يطلعن ما عدهن حظ لا انتي عندچ حظ ولا فرح ولا جوانا تدرين أكثر وحده انقهر عليها هي جوانا طفله ما شافت شي من عمرها

مينا / تدرين يمه مهما كان احنه موجودات بس صدگين إذا اگلچ كل ليلة احلم بتقى

أنوار/ اني ابد ما تغيب عن بالي تقى وباليوم العن نفسي الف مرة وين چان عقلي اتمنى لو يرجع الوقت بيه بس الصار بعد صار