عذابي الأزلي

البارت الثاني والعشرون

البارت الثاني والعشرون

بقلم الكاتبة الزهيرية الزهيرية

الأمر ليس بالملح او الخبز
الناقص يبقى ناقصاً حتى لو أطعمته
لحماً

مينا/  مرات نضطر نعفي عن ناس مو لان سامحناهم لا مسامحه شي ونعفي شي ثاني بعيد كلش عن المسامحه لهذا اني من عفيت عن مصطفى حتى آخذ حقوقي واتفقت ويه فرح انه تبلغ اهل مصطفى بطلباتي
وفرح ما قصرت عن طريق زوجها وبالبداية چان الحچي انه خمس ملايين على ضربها وتريد مقدم وهي حرگت الغرفة واني من بلغوني انه اهل مصطفى ما قبلوا على طلباتي اني رجعت خبر الهم انه نبقى على القانون

وبقيت ساكته ومر يومين ورجعولي خبر انه موافقين ينفذولي كل طلباتي  وأنطوا مستمسكات مالتي ومالت مصطفى وتصدق عقد زواجنه وبنفس الوقت نرفعت قضية طلاگ ومن رحت للمحكمه اجتي عمتي وأخو مصطفى اني طلبت تعويض 5 ملايين ومقدمي ومؤخري عشرة أنطوني 15 مليون وبحضور المحاميه جنى واثنين شهود من طرفهم وتنازلت عن حقي من ضربني بقى عليه بس الحق العام وهو 6 شهور

ورجعت للبيت ومن عرفت گرايب امي فهيمه واني أصيحها خاله انه استلمت فلوس اقترحت عليه خوش اقتراح

فهيمه/ ولچ مينا هذني الفلوس روحي اشتري بيهن بيت بالزراعي وآجري وأخذي فلوس اصرفي بيهن على نفسچ ترى من يظلن جوه ايدچ ينصرفن

مينا / اني ما اعرف بهاي الاشياء يعني وين الگى هيچ بيوت ومعقوله اكو بيوت بهيچ رخص

فهيمة / ولچ هسه اشوفلچ هذا الدلال ابو مشتاق كلشي يعرف

مينا/ وما مر اسبوع حتى لگيت بيت طابو زراعي وسجل بأسمي وخوش بيت وحمد لله البيت اكو ناس مأجرته وحتى من اشتريته عبالهم راح اطلعهم بس طمنتهم انه راح يبقون والإيجار تجي امي تستلمه منهم
وهذا چان واحد من انتصاراتي وبعد فتره تقريباً اقل الشهر حصلت على الطلاگ

واكذب إذا اگول ما تأثرت لان خلال زواجي من مصطفى حبيته ومثل ما يگولون فتحت عيني عليه بس مرات الشخص حتى إذا تكونين تحبين شخص وتموت عليه بس إذا اكو شراكه بيه ويه شخص ثاني الافضل الك انه تنسحب يا تكون بحياة حبيبك وحدك وماكو شراكه يا تكون وحدك افضل

لهذا اني انسحبت من حياة مصطفى ومر على طلاگي اشهر بخلال هاي الأشهر صرت اشعر بالملل وبيوم الظهر خابرتنه

أم ميمو وگالت / جوانا تخربطت وصاير عدها هبوط واحنه بالبيت إذا تگدرون تجون شويه تحچون وياها تتغير نفسيتها

مينا / ورحنه اني وامي وچانت معلگين الها مغذي ونايمه بس وجهها اصفر شاحب

ام ميمو / والله اسألوها مدللتها دلال شتريد وشتأمر اگللها حاضر بس صار 5 ايام گاطعه الاكل والشرب وتبچي اگللها شبيچ تگلي احس روحي محتصره وما اشتهي لا اكل ولا مي وشگد حاولت اخليها تاكل أو تشرب شي ابد والبارحه بالليل گوه گومتها حتى بس اخليها تسبح تخربطت ووگعت وهمزين هذا جيرانه دكتور اجى قاس ضغطها طلع عدها هبوط ضغط حاد
واليوم هم اجى خله الها مغذي وبي إبرة مال منوم وهسه نايمه شبيها والله ما ادري إذا ما صير عليچ زحمه ام فرح خلي اختها مينا يمها هاي الليله شويه تغير من نفسيتها وباچر والله اني اجيبها الچ بتكسي