عذابي الأزلي

البارت واحد والعشرون

البارت الواحد والعشرون

بقلم الكاتبة الزهيرية الزهيرية

اسامح الف عدو لي ولا اسامح
شخصاً قد أمنته على قلبي
فأستهان به ودمره

مينا / الي يظلمك عوفه بيد رب العالمين لان سبحان الله تدور الدنيا ويرجع الزمن يسوي بينه اكثر ما سووه بيك الزمن بارع بتصفيات الحسابات واني چنت كل شي متوقعه بس مال اهل مصطفى يتوسلون حتى بس اتنازل بصراحه هاي ما چنت متوقعتها ابد ولا خطرت على بالي واني چنت ما اصرف إذا ما أستشير جنى لان هي بالقانون افهم مني لهذا من رحنه اني جوانا عليها وحچيت تفاصيل شلون اهل مصطفى يتوسلون بيه في سبيل اتنازل

جنى / شوفي مينا أني كمحاميه انصحچ انه تتنازلين بس بشروطچ

جوانا/ يعني جنى هي اشتكت وانحكم غير ينحبس حتى ياخذ جزاءه على السوى بمينا

جنى / شوفي جوانا أحنه إذا بس نكتفي بسجن مصطفى ما راح نستفاد شي يعني بس تحصل على طلاگ لا آكثر وحتى مقدم هي تعتبر ماخذته هو ذهب وغرفة ويگلچ القاضي روحي اخذيهن من بيته والمؤخر يبقى دين عليه لما يطلع من السجن لان إذا هو بالسجن منين ينطيچ مؤخر واذا گال للقاضي ما عندي أمكانيه ادفع المؤخر نقد تتقسط كل شهر حسب امكانياته بس انتي هسه مسيطره عليهم  لهذا اگلچ خلي نقبل بالتفاوض ونأخذ كل حقوقچ وبعدها تنارلي عنه وحتى اذا تنازلي عن حقچ يبقى الحق العام وهو ينسجن 6 اشهر

مينا / يعني ست بشنو تنصحيني

جنى/ اول نصيحة الچ المؤخر مالتچ غرفتچ والذهب كله ينطوا الچ فلوس وانتي تحددين سعرهن اضافةً اطلبي مبلغ مالي لكونه ضربچ واطلعي منه بمبلغه محترم وخلي يروح الله ويا صدگيني هو ما راح ينقهر على غيابچ راح ينقهر على الفلوس الدفعهن وهاي عقوبه عليه اكبر من السجن

جوانا/ اي والله يمكن حتى ينجلط هو وامه

مينا/ وبعد اتفاقنه ويه جنى طلعنه ومن دى نمشي بالگراج وجنى ويانه والمعروف عند الكل انه النسوان يذكرن كل السوالف وره الباب الرئيسي يعني من تخلص الزيارة الحچي كله يصير وره الباب واني بالبداية ما انتبهت اكو شباك يطل على الحديقة چان واگف بي ولد شاب اسمر طويل بعدها يله انتبهت عليه بس جوانا ظلت سولف بحيث السوالف طولت اكثر من السوالف من بداخل بيتهم وجنى چانت ظهرها للحديقة اما إني وجوانا مقابيل الحديقة وبعد ما طلعت روح جنى يله سلمنه عليها اخيراً طلعنه من بيتهم بس جوانا آحسها راح تموت من الفرحه ورجعنه لبيت ام ميمو

وجوانا سحبتني على غرفة الاستقبال وسالتني
جوانا/ اني بصراحه عجبني مقترح جنى بابا اخذي فلوس احسن الچ وعيشي حياتچ وانسي مصطفى واهله

مينا / اگلچ جوانا خطيه انتي موعتي اذان جنى بالسوالف وعلى فكرة ترى سوالفچ كلها ما آلها داعي خطيه جنى رجلها نملت من الوگفه بس هذا الولد الواگف بالشباك ولا يستحي شكو واگف شيسوي واگف يصنط علينه