بسم الله الرحمن الرحيم
لا اله الا الله وحده لا شريك له يحيي وميت له الملك وله الحمد وهو على كل شيء قدير
نادر بيبرق لها بعينيه بغضب وبيقول لها :
_انت لسه ليكي عين تكلمي بعد اللي عملتيه !
لسه ليكي عين تطلبي وتشاوري وانت اللي زيك تدفن نفسها بالحياه على اللي عملته ما تفتحش بقها نهائي .
حطت ايدها على وشها وبكت جامد وقالت له :
_والله العظيم انا مظلومه ما عملتش حاجه انا مش فاهمه اصلا ازاي ده حصل ولا قادره افتكر اني عملت كده في يوم من الايام اكيد في حاجه غلط سيبني اخرج واكتشفها بنفسي .
برق نادر عينيه بغضب وقال لها بفحيح :
_طيب قربي من الباب ده يا هبه واخرجي وشوفي هعمل فيك ايه هتشوفي مني وش عمرك ما شفتيه في حياتك مش كفايه القرف اللي انا مستحمله معاكي لا وكمان لك عين تبجحي وتتكلمي وتطلبي .
قال لها الكلمتين دول وسابها وخرج وقعدت هي تعيط وتحاول تفتكر اللي حصل لها من شهر واحد بالظبط وهي عايشه في كابوس ودوامه ما بتنتهيش ،
فلاش باك
ماشي ابو هبه في القاعه بيضرب كف على كف من الدهشه والاستغراب من اللي حصل وبيكلم بنته :
_كده ما ينفعش يا هبه منظرنا بقى وحش قدام الناس وعريسك ده كله لسه مجاش والماذون اللي هيكتب كتابكم مصر ان هو يمشي انا كده اتفضحت فضيحه ما يعلم بها الا ربنا .
مراته قعدت تهدي فيه وقالت له :
_بس يا اخويا اهدى انت عندك السكر والضغط ما تضغطش على اعصابك وربنا هيحلها دلوقتي .
وعد عليهم ساعتين كمان لحد الساعه ما قربت على 11 والمعازيم بدات تمشي من الفرح وابو هبه بقى اللي على حامي ولا على بارد وهبه كمان الدموع بتفر من عينيها على عريسها اللي سابها يوم فرحها والفضيحه اللي اتفضحتها ومستغربه ازاي خطيبها اللي بيعشقوا بعض والنهارده فرحهم يمشي ويسيبها وما يجيش يوم زي ده ،
فاخوه الكبير راح على ابو هبه وقال له علشان ينقذ الموقف :
_حقك عليا يا عم الحاج والله انا عمال ارن عليه واحاول ابعث له ناس يشوفوه في الاماكن اللي بيروحها وكل ده ومش عارف اوصل له انا ممكن انقذ الموقف واتجوزها لحد ما يظهر ونشوف ايه اللي حصل انا مرضاش الفضيحه ليك ولا للانسه هبه في يوم فرحها .
ابو هبه حس ان طوق النجاه واقف قدامه وهينقذه هو وبنته من الفضيحه اللي اهله مش هيسكتوا عنها وطبعا طوق نجاه يعني فرج لازم يمسك فيه بايديه وسنانه فرد عليه وقال له :
_والله يا ابني تبقى عملت فيا خير ومعروف عمري ما هنساه لك العمر كله وربنا يسامحه اللي كسر قلب بنتي في يوم فرحها حسبي الله ونعم الوكيل فيه .
