بسم الله الرحمن الرحيم
لا اله الا الله وحده لا شريك له يحيي ويميت له الملك وله الحمد على كل شيء قدير
#غصب_عني_ضعفت
#بقلمي_فاطيما_يوسف
بتكلم زهره جوزها في التليفون وبتقول له بملل :
_مش هترجع بقى من السفر كفايه انا مش عارفه اعيش حياتي انا والعيال لوحدنا من غيرك ارجع الفلوس مش هتنفع والعمر بيضيع والغربه بتاخد من عمرنا وشبابنا ،
انا خلاص ما بقيتش مستحمله بعادك وانك تبقى جنبنا وناكلها عيش وملح ولا تبقى بعيد عننا وناكلها احسن اكل .
اتأفف عاصم من كلامها اللي كل شويه تقوله له :
_يعني عايزاني ارجع واسيب شغلي واجي اشتغل مدرس واخد اخر كل شهر 2000 جنيه ما يأكلناش عيش حاف ،
بتفكري في نفسك وبتفكري في متعتك ما بتفكريش ان عندك طفلين ليهم مسؤوليات علينا وهما اولى بتفكيرنا والخوف عليهم احسن ما نخاف على نفسنا .
قالت له زهره الكلام اللي بتقوله له على طول:
_ انت ممكن ترجع وتدي دروس بجنب الوظيفه وانا هساعدك انت عارف انا ليا في مهنه التصميم والتطريز وعندي المكنه وهقف جنبك بس تكون في حضني وفي حضن ولادنا ارجوك توافق يا عاصم بقى لك 10 سنين في الغربه من ساعه ما اتجوزنا ما بشوفكش غير كل تلت سنين شهر كفايه كده انا ما بقتش قادره استحمل ،
وكملت كلامها والدموع نازله على وشها :
_في العشر سنين دول اللي عشناهم مع بعض ما عشتش معاك فيهم اربع شهور بقيت بحس اني اتجوزت عشان اربي عيال وانت تبعت لنا فلوس وخلاص فين العيله واللمه والألفة ،
فين حضنك واحتوائك اللي ما بحسش اني واحده ست زيي زي اي حد الا في الشهر اللي بتبقى موجود فيه غير كده انا عايشه جسد بلا روح .
رد عليها عاصم كالعاده وقال لها :
_خلاص يا حبيبتي اوعدك اني افكر في الموضوع ده ما تزعليش وما تضايقيش نفسك وباذن الله ربنا هيسهلها وهتبقى عال العال .
خلصوا كلامهم كالعاده وهي فقدت الامل ان هو يرجع بقى لها اكتر من تلت سنين بتتحايل عليه وهو زي ما هو وفوضت امرها لله ،
وعدت الايام والشهور زي ما بتعدي على زهره كالعاده وفي يوم واحد دخل لها على الخاص وقال لها :
_تسمحي لي اخذ البوست الاخير اللي إنتي منزلاه لأن كلامك فيه عجبني جدا وما ينفعش اخده من غير ما استاذنك .
استغربت جدا زهره مين اللي دخل لها وقال لها الكلام ده وردت عليه :
_اتفضل يا فندم سمحت لك ان انت تاخده وتسلم على ذوقك واحترامك .
رد عليها الاستاذ اللي بعت لها وقال لها :
_ما تتصوريش كلامك ده من امبارح وانا قاعد بقرا فيه كله احساس ان اللي كاتبه عايش مغمور جوه دوامه الدنيا والحياه اللي ما بتنتهيش فكرني بنفسي وبحالي وحسيت ان هو لايق على المرار اللي انا عايش فيه .
