حب_اما_عذاب
بارت10
لأننا بنفس الكبرياء سيطول صمتنا .
صعدت ودموعي عشره عشره تنزل عله خدي
راح اشوفهم ماصدگ راح التقي بيهم بعد كل هلمده
بقيت گاعده افكر شويه واسمع صوت صگر صعد مسحت دموعي
وتمددت بفراشي
دخل وباوعلي گال شلون صارت ايدچ
گتله الحمدلله احسسن
يعني بيچ حيل تروحين باچر ؟؟
ان شاء الله
نزع ملابسه واجه تمدد
وبقه گاعد واني هم ماعرف شلون غفيت والفجر هوه گعدني
گال گومي هم يالله نطلع
يي گايمه ... دخلت سبحت وبدلت وحته ايدي تبللت
بس جففتهه بلسشوار من غير ميعرف
خلي كولشي يصير بيه بس المهم اروح
بدلت واخذت عباتي ونزلت جوه صبحت عله ماما
صبتلي چاي شربته ماگدرت اتريگ وطلعنه
كتله تعالي صعدي يمي بلورى ماريد صگر يشتت انتباهي
طول الطريق واني الف فكره صارت براسي
شنو شعوري من راح اشوفهم وشراح اسوي وا وا
وصلنه بعد وقت طويل ....دخلنه للمقبره وهاي اول زياره اليه
اباوع المقابر متمدده لمساحه كولش چبيره اوووف
شكم حلم بحلم اندفن هنا شكم فرحه وراحه اندفنت هنا
توجهنه لاهل ماما واقاربهم وقرينالهم الفاتحه وغسلوًالقبور
چانت ماما تنوح وتبچي صوته يقهر ولهفته لاهله تكسر الخاطر
صح خانگتني العبره بس ماگدرت ابجي ادور بعيوني
بلكي اشوف اسم واحد بيهم
طلعنه واخذنه صگر من غير طريق وگف واشرلي عله
قبر باوعتله يعني شنوو ؟؟ گال والدچ
من گال هيج روحي راحت وجليه گامت ترجف
ودموعي طفرت من وحدهه توجهت للقبر امشي عله كيف
وماما تمشي ورايه وتنوح دموعي تجري بدون صوت
ماعرف شنو هذه الاحساس غرييب
من تقربت اكثر صارت عيني عله قبر علاوي اخوييه
وبصفه بابا وبصف بابا اختي وماما المسافه بيناتنه مترين
تقريبا بس اني هذه حدي ،،،
بعد ماگدر گعدت بلگاع والنفس يطلع من صدري بصوت
عالي
معقوله اهلي هنا ؟؟ سندي وخيمتي هنا نايمين
راحه بالي وعافيتي هنا سنين عٍّــمـٍّري الحلوه هنا
من شفتهم نايمين جوه التراب يله حسيت فعلا اني يتيمه
گومتني ماما من مكاني وقربتني الهم گعدت يم قبر بابا
وبچيت وبچيت لحد ماخلصن دموعي وعيت عله روحي ابچي
بصوت عالي واناشغ مثل الطفل وماما تنوح گاعده يمي
بست قبره وتوجهت لقبر علاوي بسته وقبر ماما واختي
نسيت كل الي صار بس ماگدر انسه بعدهم عني
ماگدرت انسه انانيتهم تركوني وراحو گمت ونكتت التراب
وقريت الفاتحه ....التفتت وشفت صگر واگف ورايه
وجگارته بحلگه ....مدنگ راسه وعينه بلگاع
گالتله ماما جيبلنه مي وراح جاب غسلنه القبور وخلينه بخور
وقريتلهم سوره ياسين ودعيت الهم
صگر گال هم يالله نزور الامام ونطلع
طلعت امشي وكل شويه التفت عليهم واريد ارجع
ياربي اريد احفر گبر وانام هنا
لزمتني ماما وگالت يايمه مايصلح تلتفتين عليهم هيج
ماما موبيدي والله احسس عفت روحي يمهم ومشيت
حقج يايمه ذوله اهلج بس هم مايصلح تبقه ارواحهم متعلگه بيج
