جمعنا القدر

03

الحلقة 03:
   طحت قدام رجليه _واش درتي لييليا وشراني نسمع هزي راسك وجاوبيني صح وشراهم يهدرو ؟؟، رفعت راسي لاخاطر واثقة من نفسي اني مدرت والو _بابا ياك تعرف تربيتي؟! وتعرف بلي مستحيل ندير حاجة تخالف شرع ربي ولا تشوه سمعتي وسمعتك القصة ومافيها اني شفت هذوك ليتامى وحبيت نعاونهم ، بديت نحكيلو وهو يسمع فيا بابا شخصيتو هاادية وفي نفس الوقت صارم يعطيك الرهبة وفي نفس الوقت الراحة ، كي كملت حكيتلو قالي انا عارف وش ربيت ونعرفك مليح بصح غلطتك لكبيرة كي دخلتي  لدار راجل غريب هك علمتك اناا؟_ اسمحلي بابا والله غاضوني لولاد برك حبيت ندير لخير _خلاص نوضي من قدامي ، فوتها سمانة وانا تحت الضغط من بابا اوقات يعاتبني واوقات يشك فيا كون نوقف قدام التاقة يتوسوسلي زادو سمعو خاوتي من برا دخلو قلبو الدار عليا سلكني غير بابا منهم قالهم ماكاش لي يدخل وهدرة الناس مادات ماجابت يجي نهار ويسكتو خاوتي بعد كلمة بابا ماعندهم ما يزيدو مي بقاو يشنفو عليا سيرت كي يدخلو من برا  ، رجعت لقرايتي بعد ماحبسني بابا سمانة على امل تحبس هدرة الناس مي هيهات تعرفو عبادنا هات يلقاو حكاية يحكيو فيها برك مايطلقوهاش حتى تجي حكاية تشبهلها ، بصح بعد مارجعت للقراية ولا بابا لي يديني ويجيبني ، خرجنا صباح بكري نمشيو ولجيران غير يشوفو فيا حسيت ب بابا كي تقلق وولا يكبر في خطوتو حتى خرجنا من لكارتيي  تاعنا ورحنا جيهة الجامعة اصلا قريبة مشينا شوية لحقنا قبل ماندخل  قتلو على لوقت وقتاه نكمل باه يرجع لعندي ، دخلت نقرا كي العادة مي بالي بعيد ومش مركزة طول تخمامي مع الموصيبة لي طحت فيها ؛ لعشية جا بابا يديني لحقنا للبلوك تاعنا جينا طالعين تصادفنا مع جارنا هو ووليدو الطفل كي شافني تفكرني طلق يد باباه وجا يجري عندي تحضني شفت لبابا وجهو تبدل راح طول لهذاك الراجل قالو وش بينك وبين بنتي يسما هدرة الناس صحيحة؟؟ ، من الخوف خليتهم يتهاوشو وطلعت نجري لدار فتحت لباب دخلت وانا نجبد فالنفس بسيف  ومن زهري لقيت خاوتي فدار سمعو لعياط بعدوني من لباب وهبطو شوي وعاودو طلعو وجوهم مايتفسروش حكموني قتلوني بضرب واحد يطلقني ولوخر يحكمني قتلوني بضرب جبدتني يما منهم على اخر نفس دخلتني للشومبرا وغلقت عليا بالمفتاح نسمع غير فخاوتي يتحلفو فيا ويما تهدن فيهم ، قعدت في لرض عظم ماهو جامل خوه كسروني تكسار اغلبية الضرب جا في جسمي حطيت راسي على لرض نبكي ونخمم كفاه حتى وصلت للهنا درت الخير رجع عليا وليت فالضرب والإهانات بابا لي طول عمرو يشوفني البنت المثالية ضك عاد يشوف فيا احقر وحدة حتى خاوتي جامي هزو يدهم عليا ليوم قتلوني بالضرب ااه ياربي راني صابرة على وراضية علابالي كاين حكمة من هاذ شي (وَمَا يُلَقَّاهَا إِلَّا الَّذِينَ صَبَرُوا وَمَا يُلَقَّاهَا إِلَّا ذُو حَظٍّ عَظِيمٍ )   ؛ فاتو عليا يامات جحيم نخرج من لاشومبر كي يخرجو خاوتي وكي يدخلو نعاود نرجع مانخليهمش طوول يلمحوني في هاذو ليامات الهدرة تمشي ونتاشرت كثر وصلت حتى للدشرة وعيطو عمامي لبابا قالولو واش هاذ الهدرة لي لحقتنا حتى هذيك شيبة النار متحبسش طول تضال فالبلوك تاعنا تهدر فيا عند نسا الجيران وزاد توتر الجو كثر ولاو ديما المشاكل فدارنا ديما الحس خاوتي كل مايقلقو يجيو راح يضربوني غير بابا مسكتهم قالهم خلاص خليوني انا ندبر راسي مالقري وجهي مايشوفش فيه مي مخلاهمش يعاودو يقربو ليا  ، مع لعشية واقفة فالكوزينة نزرب نطيب فالعشا باه نكمل ونهرب قبل مايجو خاوتي ونتلاقاهم دخل بابا وقف عند الباب و ليت نرجف خفت يزيد يهاوشني ولا يضربني شاف فيا ...