جمعنا القدر

02

الحلقة 02:
   شفت ورايا لقيتها عجوز كبيرة الشر يقطر منها تعيط بأعلى صوت _نتتتتي لي خربتي دار بنتي نتتتتي لي قت*لتيلي بنتي الله يجيبهالك يا لمطلوقة يالي دوري برجال مزوجين يا يلي مراباوكش ماليك يال*** ، تشوكيت من هدرتها مالا هاذي جدة لولاد بصح انا وش درتلها لي راها دير هك بهدلتني سمعت بيا امة محمد ، وقفت نرجف في دقيقة لبستني تهمة بلى تهمة لساني تربط اول مرة نتحط في موقف هكذا ومانيش فاهمة مامبا واش درت خرجت من الدار هاربة لدارنا وهي تبع فيا وتعيط وتتمادى كثر وكثر في هدرتها ،لحقت للباب نلقا الجيران كامل متلايمين وقفت نشوف فيهم نضرات الشك والخذلان في عينيهم ( من نهار رحلنا للهنا الناس كامل تشوف فيا صورة البنت المثالية لاخاطر ديما نخرج مستورة وخاطيني كلش وعارفيني بلي انا من حفظة القرآن ونص وقتي يفوت في المدرسة القرآنية حتى جات الموصيبة هاذي وشوهتلي سمعتي ووليت سيرة على كل لسان) ، الناس يشوفو فيا ويقولو بين بعضاهم _والله ماضنيناها هكا واخرين يقولو _الساكت خاف منو ، وبزاف هدرة لي زادت عليا ، جيت طالعة دخل بابات لولاد لي اصلا منعرفش اسمو وهذيك شيبة النار تهمتني بلي معاه فعلاقة حتى هو شوفتو كملت واش بقا فيا عندو وحد الرهبة تقدرو تقولو لي صرا فيا قبل دقايق وحدو وشوفة هاذ الراجل وحدها كي شاف ناس متلايمين قدام دارو ونسيبتو تعرش جا عاقد حواجبو ويتخنزر ، شفت فيه من لفوق للتحت جاي طويل وڨرونطاي (كي عاد طويل مبانش بلي سمين شوي) منحي شعرو اكل حتى لحية مفيهش ملامحو عادية جدا بصح من عينيه يبان واعر والوعارة تقطر منو نطق بصوت خشين _واااش كااين هنا، خليتهم واقفين يهدو معاه وطلعت نجري لدارنا مي لعجوز مطلقتنيش وتبعتني تعيط بأعلى صوت _ماااالا نتي لي كان يخرج معاك راجل بنتي ياخطافة الرجال وريلي داركم نهدر معاهم باه يحكمو فيك لاتزيدي تخربي ديار ناس اخرين بنتي قتلتيها وتزيدي تفوتي لعايلات اخرين بصح معامن نهدر معاك نتي؟؟ راكي موالفة بالحرام ومش راح تتأثري وريلي مك وباباك هوما يلي يربيوك ، خلاص زودتها معايا وبلغ السيل الزبى قبيل سكت من الصدمة بصح ضك كثرت على ماوصاوها درت ليها _خلاص ياشيبة النار درتيلي تهمة بلا والو الراجل وين وانا وين في دقيقة درتي فيلم وبهدلتيني قدام الناس انا حبيت ندير الخير برك غاضوني الملايكة ونتي جاية تلصقي فيا التهم حسبي الله ونعم الوكيل فيك ، حكمتني من ذراعي _يالمطلوقة ياتاع رجال عدتي تعرفي تهدري وتحلي فمك ، ضربتها لذراعها حتى خبطت فالحيط دورت راسي نسا الجيران واقفين فسكالي و يطلو ويتغامزو خرجت يما لونها مخطوف تسقسي وش صرا جيت نحل فمي ولات لعجوز تعيط حكمتني يما راح دخلني لدار حتى سمعت صوت بابا يعيط ويقول وشكاين ، منكذبش عليكم هنا الموت دخلتني من رجليا قلبي يخبط شفت فيه راح نهدر نطفة شيبة النار بدات كي لعادة تعيط وتهدر في هذيك الهدرة ( بابا انسان صارم وطبعو صعيب بزاف هو صح فحياتو ماضربني وماعلى صوتو عليا ويحبني ويعززني على خاوتي بصح نخاف منو بزاف ومنتجرأش ندير حاجة تخالفو ) عيط عليها قالها راني عارف واش مربي ونعرف بنتي مليح طيري منا ولا ندير فيك حاجة سمعتي بينا امة محمد ، جات تنطق هز يدو راه يعطيها حتى جبداتو يما قاتلو خلينا منها حاوزها برك تخطينا ، هبطت وهي تمتم وتسمع في ناس دخلنا لدار انا هربت لشمبرتي جسمي يرجف من لخلعة
بابا دخل لصالو شوي هك سمعتو يعيط ليييليااا ، فشلت رجليا ماقدروش يهزوني زاد عاود عيط بصوت اقوى رحت نجري لعندو نبكي طحت قدام رجليه ...