جمعنا القدر

04

الحلقة 04:
    وقف فالباب قالي راه جا خطبك صاحبك وراني مديتك ليه ، كنت هازة كاس طاح من يدي طاح عليا هاذ لخبر كي الصاعقة ماتوقعتش توصل الأمور للهنا حسبت يزعفو يامات وينساو القصة يعني هك كلش راح وتبخر راحو احلامي وطموحاتي كنت نحلم نقرا ونتخرج ونخدم بقرايتي ونستقل ماديا ونعوض نفسي على كل لي فاتني كنت نحلم نخرج ونشوف الدنيا على الاقل في مدينتنا معليش مي مع الاسف راح كلش راح تعب السنين وراحو احلامي بابا كي تاخذ قرارو  مستحيل يرجع فيه خطوة للور ماعندي حتى جهد ناقشو ونبدلو رايو واصلا مش راح يعطيني فرصة نهدر معاه ونقنعو حتى يما دورها شبه غائب تالمو تخاف من بابا وجامي تتنفس معاه سيرتو كي يكون في هاذ الحالة كيما يقول تقولو هي إيه ، حطيت من يدي وجريت لشمبرتي ودموعي ماليين عينيا تمنيت نلقا حل لروحي ولا نرفض مي مع بابا وربعة خاوتي رجال وتمهمة لاصقة فيا مستحيل نفتح فمي ، لحق ليل وروحو خاوتي  وتالمو نسكنو في باطيمات لي يهدر في صالو ولا شومبرا لخرى يسمع لوخر نسمع في بابا يقولهم راه خطبها يلي دارت معاه لفضيحة (حسيت روحي زنيت معاه ولا درتها كبيرة وانا بريئة من كلش) وراني مديتها وغدوة نروحو نقراو الفاتحة في المسجد خلاص باراكات من هدرة الناس كلاو لحمنا عدنا منقدروش نخرجو من الدار ، يما وخاوتي قالولو ايه هذا هو صواب _انا كنت متردد لاخاطر راهم عرب وحنا قبايل وما صراتش من قبل فعايلتنا باه نجيبو من لعرب ولا نمدولهم هوما مايحملونا وحنا مانحملوهم بصح نرجعو لقول الرسول عليه افضل الصلاه والسلام "لافرق بين اعجمي ولا عربي الا بالتقوى" لازم عليا نزوجها فأقرب وقت ونتهنا من فضيحتها ، غدوة لعشية دخل بابا قالي راني مديتك وقرينا الفاتحة في المسجد من غدوة روحي اخدمي لوراقي تاوعك باه تعقدي سمانة لجاية ،جيت نحل فمي نحاولو ولا نقنعو _خلاص ماتناقشيني ماتهدري كلمة الرجال خرجت ، من قوة الصدمة وليت نبكي ونضرب فروحي نجبد فشعري ونبكي وين كنت ووين وليت في ضرف يومين وليت مرت راجل ضيعت حياتي ومستقبلي الله يجيبهالك يا شيبة النار والله مانسمحلك بقيت فحالتي حتى وصلت لمرحلة الإنهيار ومع الاسف خممت ننتاحر بصح ايماني كان اقوى من هاذا في اخر دقيقة تراجعت وستغفرت ربي على ذنبي وليت غير ندعي فربي يغفرلي فحياتي ماتوقعت اني نلحق لهاذ الدرجة من ضعف الايمان خممت كفاه نقابل ربي وانا طول عمري ماشية بما يرضي الله ونحفظ القرآن والحديث نعلت الشيطان وحاولت نتقبل واقعي والشي لي كتبولي ربي  ، من غدوة خرجت نخرج لوراقي ستغليت الفرصة ورحت لأستاذتي  في المدرسة القرآنية مع شفتها تحضنتها وبكيت في حضنها نبكي ونحكي وهي تمسحلي على راسي ، خلاتني بكيت وفرغت قلبي ممبعد قاتلي يابنتي توكلي على الله لأنو راه خيرك انتي بالضبط باه تربي هاذ ليتامى وماتنسايش حديث الرسول عليه افضل الصلاه والسلام "انا وكافل اليتيم كهاتين في الجنة واشار الى السبابة والوسطى " خلاص ليليا اتوكلي على ربي وشوفي الجانب المشرق من الشي لي صرا ، قعدت تحكي وتمدلي في الادلة بالحديث والقرآن على اليتيم والقضاء والقدر ولازم نرضاو بالقضاء والقدر خيره وشره ، خرجت من عندها بتخمام متبدل  ونفس مرتاحة صح انا ربي اختارني وسخرني لهاذ اليتامى نعلت الشيطان ورضيت بقدري ، روحت لدار توضيت وصليت دعيت ربي يغفرلي على تخمامي بالإنتحار ودعيت يوفقني في تربية هاذ ليتامى ان شاء الله نكون ليهم ام وعوض ...