كنت قالس فطرونسبور ساد عينيا ومداير ليكيت ديالي وكوجاكا ففمي وتانسمع ل cigarettes after sex" شوية حسيت بالطرونسبور وقف وطليت من شرجم بان ليا وقف فواحد البلاصة لي تانعرفها مزيان وتلقائيا بتاسمت مني شفت لؤي ومنير طالعين لطرونسبور حيدت لكيت وهوما جاو دغيا قلسو حدايا فاللور
"ايي منير لؤي اش هاذ زين على صباح!"
ضحكو وخدا مني لؤي لكوجاكا وجاوبني بكل ثقة فالنفس:
"عارف عارف راني تانحمق بلا ماتقولي.."
قبل مايكمل هضرتو جاتو بونيا فكرشو سكتاتو من عند منير ودار راسو مادار والو وشاف فيا وضحك
"ماديش عليه هذا عندو الايقو طالعة بزاف،المهم عينيك لي زوينين انجم"
الطريق كاملة دازت هكذا حتى وصلنا لليسي ديالنا وحرفيا فينما تنشوفها مازال تانتصدم وتانقول كيفاش دخلت ليها واش انا مزهار لهاذ درجة!؟ ليسي كبيرة بزاف ومن برا باينة بلي ديال ناس لي لاباس عليهم زعما لاباااااااااس عليهم وتايقراو فيها حتى الاجانب تدخل للمدرسة تحس راسك ف أوروبا وعندك جوج طرق باش دخل ليها الطريقة لولة هي تخلص لملاين فالملاين والطريقة الثانية ولي هي نادرة هي ديال لمازاليط بحالي وهي تقرا وتبلع الكتوبة باش تقرا فيها فابور وتخلص غار ترونسبور وكتوبتك وكذا وانا جبت معدل طالع بزاف فالكوليج وقبلوني ولكن تا زهر دار معايا المزيان حيت حتى شحال من واحد تنعرف بغا يدخل ليها وماقبلوهش
هزيت شكارتي ونفس شي مع لؤي و منير وهبطنا من الطرونسبور
وانا ولؤي بدينا تانتسابقو على شكون يوصل للباب لول كنت غادي تانجري وماتانشوف والو قدامي من غير لباب وبلا مانوعا لقيت راسي تزادحت مع حيط....
بعدت راسي وشديت ففمي ونيفي حيت ضروني
"اههه"
هزيت راسي دغيا وانا نلقا ضورسو قدو قداش قدامي
وستوعبت بلي ماشي حيط لي ضربت ،دار عندي مول ضورسو وشافيا بقيت مصنم شوية فملامحو وتفاصيل جسدو ولكن ماعيقتش،فداخلي مكرهتش نحبس الوقت ونبقا نتأملو تايشبعو عينيا منو ولكن كان عليا ندوي دغيا حيت بديت تانحس بعينيه تايختارقوني
"سمح ليا كنت زربان مقصدتش نضربك سمح ليا بزاف،واش قصحتك!؟"
تجاهل سؤالي وجاوبني بواحد الصوت وواحد الاكسنت متقدرش تتخطاه ولا تنساه
"Never mind,be careful next time "
(لا تهتم،كن حذرا في المرة القادمة)
جاوبني ومشا مع صاحبو دخلو وانا مصنم فبلاصتي تحنيت هزيت شكارتي وجاو عندي لؤي ومنير
"نجم واش صاڤا؟"
سولني منير حيت كان شاف اش طرا ولؤي مافاهمش حيت كان همو يوصل لباب وبان ليه غا لخر فاش آدم مشا من حدايا
